និស្សិតវិស្វកម្មអគ្គិសនីចែករំលែកបទពិសោធន៍ពាក់ព័ន្ធការសិក្សាជំនាញបច្ចេកទេស និងឱកាសការងារ

ក្នុងពិធីប្រារព្ធទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ក្រុម​និស្សិត​ផ្នែក​វិស្វកម្ម​អគ្គិសនី បានអំពាវនាវដល់យុវជន ងាកមកចាប់អារម្មណ៍រៀនជំនាញវិជ្ជាជីវៈ និង​បច្ចេក​ទេស​ ព្រោះជាជំនាញដែលកំពុងមានទីផ្សារ និងតម្រូវការខ្ពស់ពីបណ្តាក្រុមហ៊ុន រោងចក្រ​ទៅ​ថ្ងៃខាង​មុខ។

យុវជន ហៃ សុភ័ក្រ្ត និស្សិតឆ្នាំទី២ ជំនាញវិស្វកម្មអគ្គិសនី នៅវិទ្យាស្ថានអភិវឌ្ឍន៍ជំនាញកម្ពុជា-ថៃ ​បានឲ្យព័ត៌មាន ប៊ីធីវី ដឹងថា មូលហេតុចាប់យកជំនាញអគ្គិសនី ដោយសារ​ចំណង់​ចំណូល​ចិត្ត​ផង​ និងដោយសារប្រទេសកម្ពុជាកំពុងមានតម្រូវការ និងរីកចម្រើន​លើ​វិស័យ​ថាមពល​អគ្គិសនី​នេះ​ខ្លាំង​ផង ដែលធ្វើឱ្យទីផ្សារការងារ​មាន​កង្វះ​កម្លាំង​ធន​ធាន​មនុស្ស​មាន​ជំនាញ​ច្រើន។ យុវជន​រូប​នេះ បានឲ្យដឹងទៀតថា ក្រោយពីបញ្ចប់ការសិក្សារបស់និស្សិតលើបរិញ្ញាបត្ររង និង​បរិញ្ញាបត្រ ពួកគាត់មានទទួលបានឱកាសការងារធ្វើច្រើន និងមានប្រាក់ខែសមរម្យផងដែរ។

យុវជន ជុំ វិច្ឆិកា និស្សិតឆ្នាំទី២ ជំនាញវិស្វកម្មអគ្គិសនី ដូចគ្នាខាងលើនេះ បានលើកឡើងថា ការ​សម្រេច​ចិត្ដ​មកចូលរៀនលើមុខជំនាញអគ្គិសនីនេះ ដោយមើល​ឃើញពីត្រូវការ​ទីផ្សារ​ការងារ​នៅ​ក្នុង​ប្រទេសកម្ពុជា កំពុងមានតម្រូវការច្រើន លើកការអភិវឌ្ឍអគារ និងហេដ្ឋារចនាសម្ព័ន្ធជាច្រើន និង​មានប្រាក់ខ្ពស់។ ជាពិសេស​ចូលរួម​អភិវឌ្ឍន៍​ប្រទេសជាតិ​ឱ្យ​កាន់​តែ​រីក​ចម្រើន​លើវិ​ស័យ​អគ្គិសនី​នេះ​ផងដែរ។ វិច្ឆិកា បានបន្ថែមថា បច្ចុប្បន្ននេះ មានក្រុមហ៊ុន​ជា​ច្រើន​បាន​មក​ទាក់​ទង​និសិ្សត​ក្នុង​វិទ្យាស្ថានច្រើន ដើម្បីបំពេញតម្រូវការងារក្នុងក្រុមហ៊ុនរបស់ខ្លួន លើមុខជំនាញ​អគ្គិសនី និងវិស្វករទាំងពីរភេទ។ ប៉ុន្ដែវិទ្យាស្ថានបណ្ដុះបណ្ដាលនិស្សិត មិនទាន់​បាន​គ្រប់​គ្រាន់​នៅ​ឡើយ​នោះ​ទេ។

សូមបញ្ជាក់ថា រាជរដ្ឋាភិបាលកម្ពុជាអាណត្តិទី៧នេះ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានយកចិត្តទុកដាក់អាទិភាព គន្លឹះក្នុងការ​បណ្តុះ​បណ្តាល​ជំនាញ​បច្ចេកទេស និងវិជ្ជាជីវៈ ដើម្បីប្រែក្លាយកម្ពុជាពីប្រទេសអតិពលកម្ម ទៅជាប្រទេស​ដែល​ប្រើ​ប្រាស់​កម្លាំងពលកម្មជំនាញ។ ទន្ទឹមនេះ កាលពីថ្ងៃទី១៤ ខែវិច្ឆិកា ឆ្នាំ២០២៣កន្លងទៅ រាជ​រដ្ឋាភិបាលកម្ពុជា បានដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់​យុវជន​មក​ពីគ្រួសារក្រីក្រ និងងាយរងហានិភ័យចំនួន ១លាន ៥សែននាក់ ដោយរៀន​ជំនាញ​មិន​បង់​ប្រាក់ និងទទួលបានប្រាក់ឧបត្ថម្ភប្រចាំផងដែរ៕

អត្ថបទ ឈិត បូរ៉ាវី