ព័ត៌មាន

ស្ថានទូតឥណ្ឌា និងកម្ពុជា រៀបចំទិវាយោគៈអន្តរជាតិ លើកទី១០

ស្ថានទូតឥណ្ឌាប្រចាំកម្ពុជា រួមទាំងតំណាងក្រសួងស្ថាប័ននៃរាជរដ្ឋាភិបាលកម្ពុជា បានរៀបចំ ទិវាយោគៈអន្តរជាតិ លើកទី១០។ ការរៀបចំនេះ ធ្វើឡើងនៅទីតាំងពហុកីឡដ្ឋានជាតិអូឡាំពិក នៅព្រឹកថ្ងៃទី ១៩ ខែមិថុនា ឆ្នាំ ២០២៤នេះ។

ស្ថានទូតឥណ្ឌា ក្រោមវត្តមានលោកជំទាវ ឯកអគ្គរដ្ឋទូត Devyani Khobragade រួមទាំងតំណាងមកពីក្រសួង ទេសចរណ៍ ក្រសួងអប់រំ យុវជន និងកីឡា និងតំណាងមកពីក្រសួងវប្បធម៌ និងវិចិត្រសិល្បៈបានចូលរួមរៀបចំ ទិវាយោគៈអន្តរជាតិលើកទី ១០។ ការរៀបចំទិវានេះ ក្រៅពីវត្តមានគណៈអធិបតី ក៏មានវត្តមាន សាធារណជន ក៏ដូចជាវត្តមានសិស្សសាលាចូលរួមផងដែរ ដោយសកម្មភាពការហាត់យោគៈបានចាប់ផ្ដើមតាំងពីព្រឹកព្រលឹម នៅពហុកីឡដ្ឋានជាតិអូឡាំពិក។

សម្រាប់ការរៀបចំទិវាយោគៈនេះឡើង លោកជំទាវ ឯកអគ្គរដ្ឋទូត Devyani Khobragade លើកឡើងជាការអរគុណដល់គ្រប់ភាពគីពាក់ព័ន្ធ ដែលបានចូលរួមរៀបចំឱ្យមានកម្មវិធីនេះឡើង។ លោកជំទាវបន្តថា សម្រាប់ទិវាយោគៈក្នុង ឆ្នាំ ២០២៤នេះ រៀបចំឡើងប្រធានបទ « យោគៈសម្រាប់ខ្លួនឯង យោគៈសម្រាប់សង្គមជាតិ»។ លោកជំទាវបន្តថា ការជ្រើសរើសប្រធានបទនេះ គឺដោយសារតែយោគៈ ជាផ្នែកសំខាន់មួយក្នុងការផ្សព្វផ្សាយពីសារសន្តិភាព នៅក្នុងសង្គមជាតិរបស់ពួកយើង និងក្នុងពិភពលោកជារួម។ លោកជំទាវ ឯកអគ្គរដ្ឋទូត លើកឡើងបន្ថែមថា ការហាត់យោគៈ ក្រៅពីផ្ដល់ផលវិជ្ជមានលើរូបរាងកាយ ការហាត់យោគៈក៏ផ្ដល់ជាអត្ថប្រយោជន៍សម្រាប់ផ្លូវចិត្តផងដែរ។ លោកជំទាវ ពិតជាសប្បាយចិត្ត នៅពេលដែលប្រជាជនកម្ពុជាកាន់តែច្រើន ចាប់ផ្ដើមហ្វឹកហាត់យោគៈ។

ក្នុងពិធីដដែលនេះ ឯកឧត្តម ហ៊ុល សីលា អនុរដ្ឋលេខាធិការក្រសួងទេសចរណ៍ បានលើកឡើងដែរថា កន្លងទៅក្រសួងទេសចរណ៍ បានសហការជាមួយស្ថានទូតឥណ្ឌាប្រចាំកម្ពុជា រៀបចំទិវាយោគៈអន្តរជាតិចំនួន ៩លើករួចមកហើយ នៅតាមគោលដៅទេសចរណ៍សំខាន់ៗរបស់កម្ពុជា។ ការរៀបចំទាំងនេះ បានទាក់ទាញឱ្យមានការចូលរួមជាច្រើនពីសាធារណជន ភ្ញៀវទេចរជាតិ និងអន្តរជាតិផងដែរ។

ឯកឧត្តមលើកឡើងបន្ថែមថា ការរៀបចំទិវាយោគៈនៅថ្ងៃនេះ ក៏មានសារៈសំខាន់ក្នុងការជំរុញផ្សព្វផ្សាយសក្ដានុពលទេសចរណ៍កម្ពុជា លើកឆាកអន្តរជាតិ ក៏ដូចជាការពង្រឹងកិច្ចសហប្រតិបត្តិការកម្ពុជា-ឥណ្ឌា តាមរយៈការលើកកម្ពស់ទំនាក់ទំនង សង្គម វប្បធម៌ សេដ្ឋកិច្ច រវាងប្រជាជន និងប្រជាជន ព្រមទាំងអបអរសាទរការហោះហើរត្រង់លើកដំបូងរបស់ក្រុមហ៊ុនអាកាសចរណ៍ពីភ្នំពេញ ទៅញូដេលី និង ពីញូដេលី មកភ្នំពេញ៕