គិតត្រឹមថ្ងៃទី១៩ខែមិថុនានេះយុទ្ធនាការ “១ម៉ឺនរៀល ១ម៉ឺននាក់” ទទួលថវិកាបរិច្ចាគជាង ២,៧លានដុល្លារ

គិតចាប់ពីបើកយុទ្ធនាការ “១ម៉ឺនរៀល ១ម៉ឺននាក់” ពីថ្ងៃទី១ រហូតត្រឹមព្រឹកថ្ងៃទី១៩ ខែមិថុនា ឆ្នាំ២០២៤នេះ មូលនិធិគន្ធបុប្ផាកម្ពុជា ទទួលបានការរិច្ចាគពីសប្បុរសជនមក​ពីគ្រប់ទិសទី​ចំនួន​ប្រមាណ​ជាង ១៧ម៉ឺននាក់ គិតជាទឹកប្រាក់ចំនួនប្រមាណ ២,៧២៤លានដុល្លារអាម៉េរិក។

ក្នុងសន្និសីទសារព័ត៌មានផ្សព្វផ្សាយវឌ្ឍភាពយុទ្ធនាការ «១ម៉ឺនរៀល ១ម៉ឺននាក់» របស់​មូល​និធិ​គន្ធ​បុប្ផា​កម្ពុជា នៅព្រឹកថ្ងៃទី១៩ ខែមិថុនានេះ ឯកឧត្ដមបណ្ឌិត ចន ណារិទ្ធ អនុរដ្ឋលេខាធិការ​ក្រសួង​សេដ្ឋកិច្ច និងហិរញ្ញវត្ថុ អគ្គលេខាធិការក្រុមប្រឹក្សាជាតិគាំពារសង្គម និងជានាយកប្រតិបត្តិ នៃ​មូលនិធិគន្ធបុប្ផាកម្ពុជា បានបញ្ជាក់ឲ្យដឹងថា មូលហេតុ​នៃ​ការ​បង្កើត​យុទ្ធនាការ​នេះ​ឡើង ក្នុង​បំណងចំនួន២គឺ ១.ដើម្បីលរួមអបអរសាទរទិវាកុមារអន្តរជាតិ ១មិថុនា និង​ការ​បំផុសស្មារតី “ខ្មែរជួយខ្មែរ” តាមរយៈការ​អំពាវ​នាវ​ឱ្យ​មាន​ការ​ចូលរួម​បរិច្ចាគ​ជូន​មូល​និធិ​គន្ធបុប្ផា​កម្ពុជា និង​ទី២.ដើម្បីរួមគ្នាផ្តល់ក្តីស្រលាញ់ដល់កុមារនៅកម្ពុជា។

ឯកឧត្តម​បានបញ្ជាក់បន្ថែមថា ទាក់ទងយុទ្ធនាការនេះដែរ សព្វថ្ងៃគណៈកម្មការ​ទ្រទ្រង់​មូលនិធិ​គន្ធបុប្ផា​កម្ពុជា​ប្រចាំក្រសួង-ស្ថាប័ន, រដ្ឋបាលរាជធានី-ខេត្ត និងក្រុមហ៊ុន-សហគ្រាសសំខាន់ៗ បាន​និងកំពុងរៀបចំចលនាកៀរគរការបរិច្ចាគនេះដើម្បីចូលរួមគាំទ្រយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៤ របស់មូលនិធិគន្ធបុប្ផាកម្ពុជានេះផងដែរ។

ជាមួយគ្នានេះ ឯកឧត្តម នេត្រ ភក្រា្ត រដ្ឋមន្រ្តីក្រសួងព័ត៌មាន បានអំពាវនាវសាធារណជន និង​សប្បុរជន​ទាំង​ក្នុងនិងក្រៅស្រុក បន្តចូលរួមការបរិច្ចាគនេះបន្ថែមទៀត ទោះបីជាយុទ្ធនាការ​ជិត​បញ្ចប់​ក្តី ក៏នៅមានតម្រូវទៀតដែរ ដើម្បីទ្រទ្រង់ឲ្យមន្ទីរពេទ្យដំណើរការទៅមុខបន្តទៀត ខណៈ​ក្នុង១​ឆ្នាំ មន្ទីរពេទ្យគន្ធបុប្ជាចំណាយប្រាក់ដើម្បីពិនិត្យព្យាបាលកុមារប្រមាណជាង ៤២លាន​ដុល្លារ​។

សូមជម្រាបថា យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ ធ្វើឡើងរយៈពេល១ខែ ចាប់​ពី​ថ្ងៃ​ទី១ រហូតដល់ថ្ងៃទី៣០ ខែមិថុនា ឆ្នាំ២០២៤។ យុទ្ធនាការនេះ ទទួលបានការគាំទ្រ​យ៉ាង​ច្រើន​ពី​បង​ប្អូនប្រជាពលរដ្ឋខ្មែរ។ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បាន​ថ្លែង​អំណរ​គុណ​ចំពោះ​ការ​គាំទ្រយ៉ាងផុលផុស ក្នុងស្មារតីសាមគ្គីភាព «ខ្មែរជួយខ្មែរ» របស់ប្រជា​ជាតិ​យើង​ទាំងមូល និងបានអំពាវនាវ​ដល់​សប្បុរសជន​ដែល​មាន​បំណង​ចូលរួម​បរិច្ចាគ​ក្នុង​យុទ្ធនាការ​នៃ​ការ​រក្សា​និរន្តរភាពកិច្ចដំណើរការរបស់មន្ទីរពេទ្យគន្ធបុប្ផា សូមមេត្តាបន្តចូលរួមគាំទ្រ រហូតដល់​ថ្ងៃ​បិទ​យុទ្ធនាការ៕

អត្ថបទ ឈិត បូរ៉ាវី