សមាជិកបក្សភ្លើងទៀនចំនួន៣៩នាក់ សុំចូលជីវភាពជាមួយគណបក្សប្រជាជនកម្ពុជា ខេត្តកោះកុង

ក្រុមសកម្មជនគណបក្សភ្លើងទៀនចំនួន៣៨នៅក្រុងខេមរភូមិន្ទ និងម្នាក់ទៀត​នៅ​ស្រុក​បូទុមសាគរ បានសុំចូលជីវភាពរួមរស់ជាមួយគណបក្សប្រជាជនកម្ពុជាខេត្តកោះកុង។

តំណាងសមាជិក សមាជិកាគណបក្សភ្លើងទៀនដែលមកពីសង្កាត់ដងទង់ ក្រុងខេមរភូមិន្ទ និង​ឃុំ​កណ្តោល ស្រុកបូទុមសាគរ សរុប៣៩រូប បានស្មោះចិត្ត​សុំ​ចូល​ជា​សមាជិក​ជាមួយ​គណបក្ស​ប្រជាជន​កម្ពុជាខេត្តកោះកុង ដោយប្តេជ្ញាចិត្តយ៉ាងមុតមាំថា នឹងរស់នៅ គោរពស្រឡាញ់​ និង​អនុវត្ត​តាម​គោលនយោបាយបក្សឥតរុញរាល គ្រាពួកគាត់អស់ជំនឿលើគណបក្សភ្លើងទៀន។

ក្នុងពិធីប្រកាសបញ្ចូលសមាជិក សមាជិកាគណបក្សប្រជាជនកម្ពុជាខេត្តចំនួន៣៩នាក់ រសៀល​ថ្ងៃ​ទី២៣ ខែមិថុនា ឆ្នាំ២០២៤ លោកជំទាវ មិថុនា ភូថង ប្រធាន​គណបក្ស​ប្រជាជន​កម្ពុជា​ខេត្ត​កោះកុង​យល់ថា ការចូលជីវភាពរួមរស់ជាមួយគណបក្សប្រជាជនកម្ពុជា ជាគ្រួសារ​តែមួយ​នៅ​ពេល​នេះ​គឺ​ជាការត្រឹមត្រូវ និងមានការវិនិច្ឆ័យបានច្បាស់លាស់។

លោកជំទាវ មិថុនា ភូថង បានបន្ថែមថា នេះពុំមែនជាលើកទី១ទេ ដែលមាន​សមាជិក​គណបក្ស​ផ្សេងៗ​ចុះ​ចូលជីវភាពរបស់គណបក្សប្រជាជនកម្ពុជា។ ជាក់ស្តែងកាលពីថ្ងៃទី២៥ ខែមីនា ឆ្នាំ​២០២២ មានសមាជិកដ៏ទៃទៀតសរុបចំនួន៣១នាក់បានធ្វើសមាហរណកម្ម។

លោក​ជំទាវ ប្រធានគណបក្សប្រជាជនកម្ពុជាខេត្តកោះកុង គូសបញ្ជាក់ដែរថា គណបក្ស​ប្រជាជន​កម្ពុជា បានដើរតួនាទីស្នូលក្នុងការបង្រួបបង្រួមជាតិ កសាងប្រទេសជាតិ រីកចម្រើន​ជា​បន្ត​បន្ទាប់​លើ​គ្រប់​វិស័យ គួរជាទីមោទកៈ ក្នុងឋានៈជារដ្ឋឯករាជ្យ នីតិរដ្ឋ និងឈរលើមូលដ្ឋាន នៃ​លទ្ធិ​ប្រជា​ធិបតេយ្យ សេរី ពហុបក្ស។ គ្រប់មន្រ្តីបក្សទាំងអស់ រក្សាបាននូវស្មារតី សាមគ្គីភាព ឯក​ភាព​ផ្ទៃ​ក្នុង​ដ៏រឹ​ងមាំ ជាពិសេសថ្នាក់ដឹកនាំកំពូលរបស់គណបក្ស បានពុះពាររាល់ការលំបាកគ្រប់បែបយ៉ាង ដើម្បី​បុព្វហេតុបម្រើជាតិ និងប្រជាជនរស់នៅជាមួយប្រជាជនគ្រប់កាលៈទេសៈ ដោយបាន​ធ្វើ​ជា​កម្លាំង​ស្នូល​តែមួយគត់ក្នុងការរំដោះជាតិ ស្តារកសាង និងអភិវឌ្ឍន៍ឱ្យប្រទេសជាតិ មាន​ការ​រីក​ចម្រើន​ជា​បន្តបន្ទាប់លើគ្រប់វិស័យ ក្រោមដំបូលសន្តិភាព ដ៏ពេញលេញទូទាំងផ្ទៃប្រទេស៕

អត្ថបទ: BTV NEWS