កម្ពុជា-អាមេរិក បន្តដុសខាត់កិច្ចសហប្រតិបត្តិការសេដ្ឋកិច្ច និងវិនិយោគឱ្យកាន់តែប្រសើរ

នៅថ្ងៃទី២៤ ខែមិថុនា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុម​ប្រឹក្សាអភិវឌ្ឍន៍កម្ពុជា បានអនុញ្ញាតឱ្យលោក Andrew Herrup ភារធារី​នៃ​ស្ថានទូត​អាមេរិក​ប្រចាំ​កម្ពុជា ចូលជួបសម្ដែងការគួរសម និងពិភាក្សាការងារ ក្នុងបរិយាកាសកក់ក្តៅ និងរាក់ទាក់។

មានប្រសាសន៍ក្នុងជំនួបនាឱកាសនេះ លោកភារធារី Andrew Herrup បានថ្លែង​អំណរ​គុណ​ជូន​ចំពោះ​ឯកឧត្តមឧបនាយករដ្ឋមន្ត្រីដែលបានអនុញ្ញាតឱ្យលោក និងសហការី​ចូលជួប​សម្ដែង​ការ​គួរសម និងពិភាក្សាការងារ ហើយក្នុងនោះលោក​បាន​បញ្ជាក់​អំពី​ការ​តាំង​ចិត្ត​ក្នុង​ការ​លើក​កម្ពស់​ទំនាក់​ទំនង​ទ្វេភាគី ពាណិជ្ជកម្ម រួមទាំងកិច្ចការងារវិនិយោគរវាងគ្នានិងគ្នាផងដែរ។

បន្ថែមពីនេះ លោក Andrew Herrup ក៏បានលើក​ឡើង​អំពី​លទ្ធភាព​ធ្វើ​ការ​រួមគ្នា​ដើម្បី​ដោះស្រាយ​​កង្វល់មួយចំនួន ដើម្បីបង្កបរិយាកាស​ឱ្យ​កាន់​តែ​មាន​ភាពទាក់​ទាញ​ សម្រាប់​វិនិយោគិន​បន្ថែមទៀតពីសហរដ្ឋអាមេរិក។ ឆ្លៀតក្នុងឱកាសនេះ លោក Andrew Herrup ក៏បាន​សម្តែងនូវចំណាប់អារម្មណ៍ជាវិជ្ជមានចំពោះលទ្ធផលនៃដំណើរទស្សនកិច្ចរបស់ឯកឧត្តមឧបនាយក​រដ្ឋមន្ត្រីទៅកាន់សហភាពអ៊ឺរ៉ុប ក្នុងគោលដៅទាក់ទាញការវិនិយោគបន្ថែមទៀតផងដែរ។

ឯកឧត្តមឧបនាយករដ្ឋមន្ត្រី មានសេចក្តីសោមនស្សរីករាយចំពោះចំណាប់អារម្មណ៍ជាវិជ្ជមាននេះ ហើយ​ឆ្លៀតជម្រាប​ជូន​ត្រួសៗ​អំពី​លទ្ធផល​ប្រកប​ដោយ​ផ្លែផ្កា​ពី​បេសកកម្ម​គោះទ្វារ​វិនិយោគនៅ​សហភាពអ៊ឺរ៉ុប កាលពីថ្ងៃទី៩-១៨ ខែមិថុនា កន្លងទៅនេះ។ ដកស្រង់​ពី​បទ​ពិសោធន៍ និង​លទ្ធផល នៃ​ដំណើរទស្សកិច្ចទៅសហភាពអឺរ៉ុប ឯកឧត្តមឧបនាយករដ្ឋមន្ត្រី បានជម្រាប​ជូន​ភាគី​មិត្ត​ពី​លទ្ធភាពនៃការធ្វើការរួមគ្នារវាងក្រុមប្រឹក្សាអភិវឌ្ឍន៍កម្ពុជា និងស្ថានទូតអាមេរិក ដើម្បី​ពិនិត្យ​លទ្ធភាពក្នុងការសម្របសម្រួលរៀបចំព្រឹត្តិការណ៍ជំរុញវិនិយោគនៅសហរដ្ឋអាមេរិក តាម​រយៈ​ការរៀបចំជាវេទិការធុរកិច្ច និងការគោះទ្វារ​វិនិយោគ​តាម​ក្រុម​ហ៊ុន​ដែល​មាន​បំណងពង្រីក​ខ្សែច្រ​វាក់​ផលិត និងផ្គត់ផ្គង់ក្នុងតំបន់ ដើម្បីបញ្ជ្រាបព័ត៌មានវិនិយោគ និងកញ្ច​ប់​លើក​ទឹក​ចិត្ត​នានា ជូនដល់ធុរជនអាមេរិក។

បន្ថែមពីលើកិច្ចខិតខំប្រឹងប្រែងបញ្ជ្រាបការឈ្វេងយល់ពីច្បាប់និងបទប្បញ្ញត្តិពាក់ព័ន្ធនឹងការវិនិយោគ ឯកឧត្តមឧបនាយករដ្ឋមន្ត្រី ក៏បានជម្រាបជូនទៅលោក Andrew Herrup ពីលទ្ធភាព​ធ្វើ​កា​រ​រួម​គ្នាដើម្បីដោះស្រាយកង្វល់របស់វិនិយោគិនអាមេរិកនៅកម្ពុជា តាមរយៈការ​រៀបចំ​នូវ​យន្ត​ការ​រួម​សម្រាប់កិច្ចសន្ទនាជាប្រចាំលើកិច្ចការងារវិនិយោគ ដើម្បីអាចឱ្យកម្ពុជា​មាន​លទ្ធភាព​សម្រប​សម្រួល​ដោះស្រា​យបញ្ហានានារបស់វិនិយោគិនអាមេរិកបានកាន់តែឆាប់រហ័ស៕

អត្ថបទ:  BTV NEWS