តុលាការសម្រេចឃុំខ្លួនអតីតអ្នកឧកញ៉ាម្នាក់ដាក់ពន្ធនាគារបណ្ដោះអាសន្នក្រោមការចោទប្រកាន់បទល្មើស Online Scam

ចៅក្រមសាលាដំបូងរាជធានីភ្នំពេញ បានសម្រេច​ឃុំខ្លួន​អតីត​អ្នក​ឧកញ៉ា​ម្នាក់​ដាក់​ពន្ធនាគារ​បណ្ដោះ​អាសន្ន បន្ទាប់ពីរងការចោទប្រកាន់ពីបទឆបោកតាមប្រព័ន្ធបច្ចេកវិទ្យា។

លោក ឆៃ វិវឌ្ឍនៈ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១៥ ខែមករា ឆ្នាំ​២០២៦ បានសម្រេចចេញដីកាបង្គាប់ឱ្យឃុំខ្លួនបណ្ដោះអាសន្ន អតីតអ្នកឧកញ៉ា ឈ្មោះ លី គួង អាយុ ៥០ឆ្នាំ ដោយដាក់ឱ្យស្ថិតក្រោមការពិនិត្យពីបទ ការជ្រើសរើសដោយ​មិន​ស្រប​ច្បាប់​សម្រាប់​កេង​ប្រវ័ញ្ច ​បទឆបោកមានស្ថានទម្ងន់ទោស ជាក្រុមមានការចាត់តាំង និងបទសម្អាតប្រាក់ ដែល​បាន​ប្រព្រឹត្ត​នៅក្នុងប្រទេសកម្ពុជានិងទីកន្លែងផ្សេងទៀត កាលពីអំឡុងឆ្នាំ២០១៩ រហូត​មក​ដល់​បច្ចុប្បន្ន​។

យោងតាមដីកាបង្គាប់ឱ្យឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ អតីត​អ្នក​ឧកញ៉ា ​លី គួង ប្រឈមនិងបទល្មើសដែលមានបញ្ញត្តិឱ្យផ្ដន្ទាទោសតាមមាត្រា ១២ នៃច្បាប់​ស្ដីពី​ការ​ប្រឆាំង​អំពើជួញដូរមនុស្ស និងអំពើធ្វើអាជីវកម្មផ្លូវភេទ មាត្រា ៣៧៧ មាត្រា ៣៨០ នៃ​ក្រម​ព្រហ្ម​ទណ្ឌ និងមាត្រា ៣៨ នៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភារវកម្ម។

ចៅក្រមស៊ើបសួរសាលាដំបូងរាជធានីភ្នំពេញបានបង្គាប់ឱ្យភ្នាក់ងារមានសមត្ថកិច្ចនៃកងកម្លាំងសាធារណៈនាំខ្លួនជនត្រូវចោទដែលមានឈ្មោះ លី គួង ទៅដាក់ពន្ធនាគាររាជធានីភ្នំពេញ PJ ។

ទាក់ទិនទៅនឹងករណីឆបោកតាមប្រព័ន្ធបច្ចេកវិទ្យា កម្លាំងសមត្ថកិច្ចកម្ពុជាបានធ្វើការស្រាវជ្រាវ និងបង្ក្រាបបានជាបន្តបន្ទាប់ បើគិតតាំងពីឆ្នាំ២០២៥ មកដល់ខែមករា ឆ្នាំ២០២៦ សមត្ថកិច្ច និង​ប្រព័ន្ធតុលាការកម្ពុជាបានអនុវត្តនីតិវិធីសំណុំរឿងធំៗចំនួន ៣៧ករណី ដើម្បីផ្ដន្ទា​ទោស​មេ​ខ្លោង ​និងបក្សពួកជាង ១៧០នាក់ និងកំពុងបន្ត​ស្រាវជ្រាវ​ដើម្បី​ឈាន​ទៅ​ដល់​ការ​ឃាត់​ខ្លួន​អ្នក​ពាក់​ព័ន្ធ​ដែលនៅពីក្រោយករណីឆបោកតាមប្រព័ន្ធបច្ចេកវិទ្យានេះ៕ អត្ថបទ៖ ប្រាក់ វ៉ាន់ដា