ពលរដ្ឋខ្មែរអាមេរិក ប្រកាសគាំទ្រព្រែកជីកហ្វូណនតេជោ ខណៈគម្រោងនេះ​នឹងសម្ពោធ​បើកការដ្ឋានសាងសង់នៅដើមខែសីហាខាងមុខនេះ

បងប្អូនប្រជាពលរដ្ឋរស់នៅទីក្រុង ម៉ូដេសស្តូ រដ្ឋកាលីហ្វ័រញ៉ា សហរដ្ឋអាមេរិកគាំទ្រ បាន​ចេញ​វិដេអូ​ឃ្លីប ប្រកាសគាំទ្រគម្រោង «ព្រែកជីកហ្វូណនតេជោ» ខណៈគម្រោងដ៏ធំមួយនេះ នឹង​បើក​ការដ្ឋាន​សាងសង់ ជាផ្លូវការនៅថ្ងៃទី៥ ខែសីហា ឆ្នាំ២០២៤ខាងមុខនេះ ក្រោមអធិបតី​ភាព​សម្តេច​ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

តាមរយៈវិដេអូឃ្លីប របស់បងប្អូនប្រជាពលរដ្ឋខ្មែរ ដែលបានបង្ហោះតាមបណ្តាញសង្គមនាថ្ងៃនេះ បាន​លើកឡើងថា ក្នុងនាមពួកគេជាពលរដ្ឋខ្មែររស់នៅអាមេរិក ពិតជាមាន​ការ​គាំទ្រ​យ៉ាង​ខ្លាំង​ចំពោះ​គម្រោងព្រែកជីកហ្វូណនតេជោនេះ ដែលមានគំនិតផ្តួចផ្តើមឡើងដោយសម្តេចតេជោ ហ៊ុន សែន អតីតនាយករដ្ឋមន្រ្តី និងបន្តអនុវត្តដោយសម្តេចធិបតី ហ៊ុន ម៉ាណែត នាយករដ្ឋមន្រ្តី​កម្ពុជា​។​

គម្រោងព្រែកជីកហ្វូណនតេជោមានអត្ថប្រយោជន៍ដ៏មហាសាលសម្រាប់កម្ពុជាពោលគឺ វាអាច​កាត់​បន្ថយ​រយៈពេលចម្ងាយ និងតម្លៃនៃការ​ដឹកជញ្ជូន​ដែល​អំណោយ​ផល​ដល់​ភាព​ប្រកួត​ប្រជែង​នៃ​ទំនិញ​កម្ពុជា។ អាចបង្កើតតំបន់ពាណិជ្ជកម្ម មជ្ឈមណ្ឌលភស្តុភារកម្ម និងការអភិវឌ្ឍ​ផែរណប​ថ្មីៗ​ជាច្រើន។ ក្រៅពីនោះ ព្រែកជីកនេះក៏អំណោយផលដល់ការអភិវឌ្ឍកសិកម្ម ប្រព័ន្ធ​ធារា​សាស្ត្រ វារីវប្បកម្ម និងការចិញ្ចឹមសត្វផងដែរ។ ព្រែកជីកនេះ​ក៏នឹង​ជួយ​គាំទ្រ​ដល់​ការ​អភិវឌ្ឍ​ប៉ូល​សេដ្ឋកិច្ច​ទី៤​របស់កម្ពុជា ដោយបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែ​ស្វយ័ត​ភ្នំពេញ និងកំពង់ផែផ្សេងៗទៀត ថែមទាំងជួយជំរុញការអភិវឌ្ឍផ្នែកនគរូបនីយកម្ម ក៏​ដូច​ជា​ផ្នែក​អចលនទ្រព្យ។ នៅមានផល​ប្រយោជន៍​ជាច្រើន​ទៀត​ដែល​ពលរដ្ឋ​រស់​នៅ​តាម​ដង​ព្រែក​ទទួល​បាន​។ ផលប្រយោជន៍ដ៏មហិមានេះហើយ ដែលជំរុញឱ្យប្រជាពលរ​ដ្ឋ​ខ្មែរ​គ្រប់​ទិស​ទី​ផ្តល់​ការ​គាំទ្រ​ដោយឥតរារែករហូតដល់សព្វថ្ងៃនេះចំពោះ គម្រោងដ៏មានអត្ថ ប្រយោជន៍របស់​ជាតិ​ទាំង​មូលមួ​យនេះ​៕

អត្ថបទ៖ បាន ចក់