យុទ្ធនាការ «១ម៉ឺនរៀល១ម៉ឺននាក់» មានសប្បុរសជនបរិច្ចាគជាង២០ម៉ឺននាក់ បានថវិកាជិត ៣លានដុល្លារ

យុទ្ធនាការ «១ម៉ឺនរៀល ១ម៉ឺននាក់» ជាយុទ្ធនាការដ៏សំខាន់ ក្នុងការរៃអង្គាសថវិកា ជួយគាំទ្រ​ដល់​មន្ទីរ​ពេទ្យគន្ធបុប្ផា។ យុទ្ធនាការមានរយៈពេលពេញ ១ខែ ដោយចាប់ផ្ដើមពីដើមខែមិថុនា ដល់​ចុងខែមិថុនា ឆ្នាំ ២០២៤នេះ។ ស្របពេលដែលថ្ងៃបញ្ចប់យុទ្ធនាការខិតចូលមកដល់ ចំនួន​អ្នក​ចូល​រួមបរិច្ចាគថវិកាគាំទ្រក្នុងយុទ្ធនាការនេះ បានកើនឡើងដល់ជាង ២០ម៉ឺននាក់ និងទទួល​បាន​ថវិកា​រហូតដល់ជិត ៣លានដុល្លារ។ នេះជាការចូលរួម ដ៏ល្អប្រសើរហួសក្ដីរំពឹងទុក។ នេះ​ជា​ការ​លើក​ឡើងរបស់ ឯកឧត្តមបណ្ឌិត ចន ណារិទ្ធ នាយកប្រតិបត្តិនៃមូលនិធិគន្ធបុប្ផាកម្ពុជា។

យុទ្ធនាការ« ១ម៉ឺនរៀល ១ម៉ឺននាក់» សម្រាប់ឆ្នាំ ២០២៤នេះ ជាយុទ្ធនាការ​ក្រោម​ការផ្ដួច​ផ្ដើម​ដោយលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃ​មូល​និធិ​គន្ធ​បុប្ផា​កម្ពុជា​។ យុទ្ធនាការនេះ មានបេសកកម្មសំខាន់ គឺជំរុញឱ្យសប្បុរសជន ជាប្រជាពលរដ្ឋ មន្ត្រីរាជការ អ្នក​ប្រកបអាជីវកម្ម គ្រប់មជ្ឈដ្ឋានទាំងអស់ ចូលរួមបរិច្ចាកជាថវិកា ១ម៉ឺនរៀល សម្រាប់​ជួយ​គាំទ្រ​ដល់​ដំណើរ​ការមន្ទីរពេទ្យគន្ធបុប្ផា ឱ្យមាននិរន្តរភាព។

សម្រាប់រយៈពេល​ជិតដល់ថ្ងៃបិទបញ្ចប់យុទ្ធនាការនេះ ឯកឧត្តម បណ្ឌិត ចន ណារិទ្ធ នាយក​ប្រតិបត្តិ​នៃមូលនិធិគន្ធបុប្ផាកម្ពុជា មើលឃើញពីការចូលរួមជាច្រើន ហួសពីការរំពឹងទុក។ អ្នក​ចូល​រួម​មានទាំង ប្រជាពលរដ្ឋទូទៅ អ្នកប្រកបរបរធាក់ស៊ីក្លូ អ្នកប្រកបរបរអាជីវកម្មនានា និង​មន្ត្រី​រាជការជាដើម។ ឯកឧត្តមបណ្ឌិតបញ្ជាក់ថា គិតត្រឹមព្រឹកថ្ងៃនេះផ្ទាល់ អ្នកចូលរួម​បរិច្ចាគ​សរុប​មាន​ចំនួន​ជាង ២០ម៉ឺននាក់ ដោយទទួលបានថវិកា ២, ៩លានដុល្លាររួចមកហើយ។

ស្រប​ពេល​ដែលថ្ងៃបិទបញ្ចប់យុទ្ធនាការ « ១ម៉ឺនរៀល ១ម៉ឺននាក់» ខិតចូលមកដល់នេះ ឯកឧត្តម បណ្ឌិត ចន ណារិទ្ធ នាយកប្រតិបត្តិនៃមូលនិធិគន្ធបុប្ផាកម្ពុជា ក៏បាន​អំពាវ​ទៅ​កាន់​សប្បុរសជនទាំងអស់ សូមបន្តចូលរួមបរិច្ចាកថវិកា ដើម្បីទ្រទ្រង់បេសកកម្មមន្ទីរពេទ្យ ក្នុង​ការ​ជួយ​កុមារ​កម្ពុជា។ ការបរិច្ចាគគឺអាចធ្វើបានគ្រប់ពេលវេលា ទោះបីយុទ្ធនាការបិទបញ្ចប់ក្ដី។

សម្រាប់​អាណាព្យាបាល ដែលតែងជូនកូន ជូនចៅ មកទទួលការព្យាបាលនៅមន្ទីរពេទ្យគន្ធបុប្ផា សម្ដែង​ការដឹងគុណដល់មន្ទីរពេទ្យមួយនេះ។ ពួកគេលើកឡើងថា មន្ទីរពេទ្យគន្ធបុប្ផា មាន​គុណ​តម្លៃ​ជា​ខ្លាំង ក្នុងការជួយដល់កុមារកម្ពុជា ឱ្យរស់រានមានជីវិត។ ការព្យាបាល​ប្រកប​ដោយ​ការ​យក​ចិត្ត​ទុក​កដាក់ និងពុំមានការគិតកម្រៃថវិកា។ ភ្ជាប់ជាមួយការដឹងគុណដល់មន្ទីរពេទ្យគន្ធបុប្ផា ពួក​គេ​ជាប្រជាជនក៏សូមដឹងគុណចំពោះអ្នកជួយគាំទ្រផ្គត់ផ្គង់មន្ទីរពេទ្យឱ្យមានដំណើរការ និង​សូម​អំពាវនាវឱ្យមានការចូលរួមបរិច្ចាកជានិរន្ត។

សូម​ជម្រាបថាមន្ទីរពេទ្យគន្ធបុប្ផា ក្នុងពេលបច្ចុប្បន្ននេះ ត្រូវការថវិកាក្នុងរង្វង់ជាង ៤០លាន​ដុល្លារ​ក្នុង​មួយ​ឆ្នាំក្នុងការបំពេញបេសកកម្មជួយកុមារកម្ពុជា។ នេះជាការលើកឡើងរបស់ ឯកឧត្តម បណ្ឌិត ចន ណារិទ្ធ។ មន្ទីរពេទ្យគន្ធបុប្ផា បច្ចុប្បន្នមាននៅរាជធានីភ្នំពេញចំនួន ២ទីតាំង និង​ស្ថិត​នៅ​ខេត្ត សៀមរាប ចំនួន ១ទីតាំង៕