កម្ពុជាប្រើថវិកា២៥៧លានដុល្លារ សាងសង់រោងចក្រទឹកស្អាតបាក់ខែងទី៣ ឆ្លើយតបកំណើន​ពលរដ្ឋ

រាជរដ្ឋាភិបាលគ្រោងប្រើប្រាស់ថវិកាសរុបចំនួន ២៥៧ លានដុល្លារ សម្រាប់​គម្រោង​រោងចក្រ​ប្រព្រឹត្ត​កម្ម​ទឹកស្អាតបាក់ខែងជំហានទី៣ មានសមត្ថភាពផលិតទឹកស្អាតបានចំនួន ១៩៥ ពាន់​ម៉ែត្រ​គូបក្នុងមួយថ្ងៃដើម្បីផ្គត់ផ្គង់ ឆ្លើយតបទៅនិងកំណើននៃការកើន ឡើងរបស់​ប្រជាជន​នៅ​ជាយ​ក្រុង និងតំបន់រណបនៅក្នុងទីក្រុងភ្នំពេញ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​លើក​នៅ​ក្នុង​ពិធីសម្ពោធដាក់ឱ្យដំណើរការជាផ្លូវការនូវ «រោងចក្រប្រព្រឹត្តកម្ម​ទឹកស្អាតបា​ក់ខែង​ជំហាន​ទី២ និងបើកការដ្ឋានសាងសង់ជំហានទី៣» នៅថ្ងៃទី២៥ ខែ មិថុនា ឆ្នាំ២០២៤នេះថា គម្រោង​សាងសង់រោងចក្រប្រព្រឹត្តកម្មទឹកស្អាតបាក់ខែងជំហានទី៣ ដែលបានបើក​ការដ្ឋាន​សាងសង់​នា​ពេលនេះនឹងគ្រោងប្រើថវិកាសរុបចំនួន ២៥៧ លានដុល្លារ ដោយមាន​ប្រភព​មូល​និធិ​រួមមាន៖ ប្រាក់កម្ចីចំនួន ២១០ លានដុល្លារ ពីទីភ្នាក់ងារ AFD, ៥ លានដុល្លារ ខណៈ​នៅ​សល់​ពី​ជំហានទី១ និងជំហានទី២ របស់ AFD, និងការវិនិយោគចំនួន ៤២ លានដុល្លារ ពីរដ្ឋាករ​ទឹក​ស្វយ័ត ក្រុងភ្នំពេញ ទន្ទឹមនឹងនេះ, សហភាពអឺរ៉ុបគ្រោងផ្តល់ជំនួយឥតសំណងចំនួន ១២ លាន​ដុល្លារ​សម្រាប់គម្រោងនេះផងដែរ។

ទាក់ទិនគម្រោងខាងលើនេះដែរ, ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុក​ជា​អគ្គនាយករដ្ឋាករទឹក ស្វយ័តក្រុងភ្នំពេញ លើកឡើងថា ចំពោះការ​សម្ពោធ​ដាក់​ឲ្យ​ប្រើប្រាស់​រោងចក្រ​ប្រព្រឹត្តកម្មទឹកស្អាតបាក់ខែងជំហានទី២ពិតជាមាន សារៈសំខាន់ណាស់ ដើម្បី​បំពេញ​នូវ​តំបន់​សេវា​ដែលនៅសេសសល់ ក្នុងនោះសម្រាប់ជំហានទី៣វិញ រដ្ឋាករទឹកស្វយ័តក្រុងភ្នំពេញ បាន​គិតគូរឲ្យផលិតកម្មទឹកស្អាត ឲ្យឆ្លើយតប​ទៅ​និង​តម្រូវ​ការ​នៃ​ប្រជាជន​ប្រើ​ប្រាស់​ក្នុង​រាជ​ធានី​ភ្នំពេញ ដែលគម្រោងនេះនឹងចាប់ ផ្តើមពីឆ្នាំ ២០២៣ ដល់ឆ្នាំ ២០២៧ ខាងមុខ ។

ជុំវិញ​ទឹកស្អាតនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តី​ក្រសួង​សេដ្ឋកិច្ច និងហិរញ្ញវត្ថុ ស្នើឱ្យក្រុមប្រឹក្សា ភិបាល, ថ្នាក់ដឹកនាំ និងមន្ត្រី-និយោជិតគ្រប់​លំដាប់​ថ្នាក់​នៃរដ្ឋាករទឹកស្វយ័តក្រុងភ្នំពេញ បន្តយកចិត្តទុកដាក់លើការងារអាទិភាពមួយចំនួន ដោយ​ក្នុង​នោះក្រសួង-ស្ថាប័នរដ្ឋបាលថ្នាក់ក្រោមជាតិ និងភាគីពាក់ព័ន្ធ ត្រូវបន្ត​សហការ​ជិតស្និទ្ធ​ជាមួយ​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីអនុវត្តច្បាប់​ស្តីពីការ​គ្រប់​គ្រង​ទឹក​ស្អាត សំដៅធានាឲ្យបាននូវប្រភពទឹកគ្រប់គ្រាន់, ដោយមិនបង្ក​ផល​ប៉ះពាល់​អវិជ្ជមាន​ដល់បរិស្ថាន​៕

អត្ថបទ៖ សុន រ៉ាឌី