ផ្ទះប្រជាពលរដ្ឋ៩ខ្នង ក្នុងសង្កាត់ផ្សារឆ្នាំង បាក់ស្រុតខូចខាត តែមិនបណ្តាលឲ្យមានមនុស្សរងរបួសឡើយ

តាមការបញ្ជាក់របស់លោក ហ៊ីង ភ័ព្វមីនា អភិបាលក្រុងកំពង់ឆ្នាំង នាព្រឹកថ្ងៃទី០១ ខែកក្កដា ឆ្នាំ២០២៤នេះថា ផ្ទះប្រជាពលរដ្ឋចំនួន៩ខ្នង(៨ខ្នងខូចខាតធ្ងន់ធ្ងរ) ផ្ទះប្រកស័ង្កសី ស្មើនឹង១២គ្រួសារ ដែលមានប្រជាពលរដ្ឋរស់នៅ៦៥នាក់ ស្រី២៩នាក់ ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង បានបាក់ស្រុតខូចខាត ដោយ​មិនដឹង​មូល​ហេតុ​កាល​ពី​យប់​ថ្ងៃទី២៩ ខែមិថុនា ឆ្នាំ២០២៤ តែមិនបណ្តាលអោយមានរងរបួសបងប្អូនណាម្នាក់ឡើយ។

លោកអភិបាលក្រុងបានបន្តថា ប្រជាពលរដ្ឋទាំង១២គ្រួសារនេះ បាន​មក​រស់​នៅ​លើ​ទីតាំង​ដី​នេះ​តាំងពីឆ្នាំ១៩៨៥មក មិនដែលជួបបញ្ហាបែបនេះឡើយ។ តែនៅវេលាម៉ោងប្រមាណ១០យប់ ថ្ងៃ​ទី២៩ ខែមិថុនា ឆ្នាំ២០២៤ បានស្រុតដីផ្នែកខាងមុខផ្ទះចុះទៅក្រោម ធ្វើអោយ​ផ្ទះ​ចំនួន​៩ខ្នង​រង​ការ​ខូចខាតមិនអាចរស់នៅបាន ។ ក្រោយពេលរងការបាក់ស្រុត រដ្ឋបាលក្រុងកំពង់ឆ្នាំង បាន​បម្លាស់​ទីប្រជាពលរដ្ឋទាំង១២គ្រួសារ អោយមករស់​នៅលើ​ដី​ទំនេរ​មួយ​កន្លែង​នៅខា​ង​មុខ​ដីបាក់ស្រុតនោះបណ្តោះអាសន្ន។ ដោយឡែកក្រុមការងារនៃមន្ទីរពាក់ព័ន្ធ រួមនឹង​អាជ្ញាធរ​មាន​សមត្ថកិច្ច កំពុងស្រាវជ្រាវថាតើការបាក់ស្រុតនេះ បណ្តាលមកពីមូលហេតអ្វី? តែនៅខាង​ក្រោយ​ផ្ទះ​របស់​ពួកគាត់ គឺមានបឹងចំណាស់មួយ អាចថាដីបាក់ស្រុតចូលទៅក្នុងបឹងនោះក៏ថាបាន។

នៅ​ថ្ងៃទី៣០ ខែមិថុនា ឆ្នាំ២០២៤ លោកជំទាវ ជូ ប៊ុនអេង ប្រធាន​ក្រុម​ការងារ​រាជ​រដ្ឋាភិបាល​ចុះមូលដ្ឋានក្រុងកំពង់ឆ្នាំង និងជាប្រធានកិត្តិយសអនុសាខាកាបាទក្រហមកម្ពុជាក្រុង និង​ឯកឧត្តម ស៊ុន សុវណ្ណារិទ្ធិ អភិបាលខេត្ត និងជាប្រធានសាខាកាកបាទក្រហមខេត្តកំពង់ឆ្នាំង រួម​និង​លោកឧត្តមសេនីយ៍ អ៊ុំ សុភា មេបញ្ជាការប្រតិបត្តិការសឹករងកំពង់ឆ្នាំង និងអភិបាល​ក្រុង​កំពង់ឆ្នាំង បានចុះសួរសុខទុក្ខប្រជាពលរដ្ឋដែលបានរងគ្រោះដោយស្រុតផ្ទះចំនួន០៩ខ្នងផ្ទះ ដោយ​បានឧបត្ថម្ភនូវគ្រឿងឧបភោគបរិភោគ ថវិកា និងស័ង្កសីជូនភ្លាមៗផងដែរ ៕

អត្ថបទ: កាំង ហុងវាស្នា