សាលា TVET បានបន្តបើកថ្នាក់ថ្មីជាច្រើនបណ្តុះបណ្តាលជំនាញវិជ្ជាជីវៈជូនយុវជនគ្រួសារក្រីក្រ

នៅដើមខែកក្កដាឆ្នាំ២០២៤នេះ បណ្តាសាលាបណ្តុះបណ្តាលជំនាញវិជ្ជាជីវៈទាំង៣៧ របស់​ក្រសួងការងារ និងបណ្តុះបណ្តាលវិជ្ជាជីវៈ បានទទួលការចុះឈ្មោះ និងបន្តបើកថ្នាក់ថ្មី បណ្តុះ​បណ្តាល​ជំនាញវិជ្ជាជីវៈជូនយុវជន មកពីគ្រួសារក្រីក្រ និងគ្រួសារងាយរងហានីភ័យ បានចំនួន​ជាង៧០០០នាក់បន្ថែមទៀត។

លោក ច្រឹង ណារី នាយកវិទ្យាស្ថានជាតិពហុបច្ចេកវិទ្យាតេជោ សែន ក្រុងតាខ្មៅ ខេត្តកណ្តាល ថ្លែងថា នៅថ្ងៃទី១ ខែកក្កដានេះ វិទ្យាស្ថាន​បានបើក​ថ្នាក់​ថ្មី​បណ្តុះ​បណ្តាល​ជំនាញ​វិជ្ជាជីវៈ​ជូន​យុវជន បានចំនួន៣ថ្នាក់ សិក្សា៣ជំនាញផ្សេងៗបន្ថែម ហើយការបើកថ្នាក់ថ្មីនេះ គឺបាន​ធ្វើ​ឡើង​អម​ជាមួយ​នឹងវិទ្យាស្ថាន បានទទួលជំនួយឧបត្ថម្ភ អង្គការKOICA របស់ប្រទេសកូរ៉េខាងត្បូង ២​ម៉ឺន​ដុល្លារអាមេរិក សម្រាប់បើកដំណើការបណ្ណាល័យ ដើម្បីឲ្យបណ្តាយុវជន​កំពុង​សិក្សា​ជំនាញ​នានា​មាន​ឱកាសសិក្សាស្រាវជ្រាវចំណេះដឹងជំនាញរបស់ខ្លួនបន្ថែម។

លោក ច្រឹង ណារី បន្តថា នៅក្នុងដំណើរការបើកថ្នាក់រៀនថ្មីនេះ គឺមានយុវជនជា​ច្រើន​បាន​ដាក់​ពាក្យ​ស្នើ​សុំ​ការបណ្តុះបណ្តាលចុងសប្តាហ៍ ថ្ងៃសៅរ៍ និងថ្ងៃអាទិត្យ ដោយសារ ភាគច្រើន យុវជន​ជាប់​រវល់​ការងារខាងក្រៅ និងមានឱកាសឈប់សំរាកតែថ្ងៃចុងសប្តាហ៍។

បណ្តាក្រុមយុវជន ដែលបានចុះឈ្មោះរៀនជំនាញវិជ្ជាជីវៈ ក្នុងកម្មវិធីផ្តល់អាហារូបករណ៍ សម្រាប់​ការ​បណ្តុះបណ្តាលវិជ្ជាជីវៈ ជូនយុវជន ១.៥លាននាក់ ថ្លែងប្តេជ្ញាថា នឹងខិតខំរៀនចប់ រៀន​ឲ្យ​ចេះ ងាយស្រួលស្វែងរកការងារធ្វើ បង្កើនប្រាក់ឲ្យបានសមរម្យ និងសូមថ្លែង​អំណរគុណ​រាជ​រដ្ឋាភិបាលដែលបានអនុវត្តកម្មវិធីផ្តល់អាហារូបករណ៍បណ្តុះបណ្តាលវិជ្ជាជីវៈនេះឡើង។

ឯកឧត្តម កក្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និង​បណ្តុះ​បណ្តាល​ជំនាញ​វិជ្ជាជីវៈ បានថ្លែងថា មកដល់ថ្ងៃទី១ ខែកក្កដា ឆ្នាំ២០២៤នេះ មានយុវជន​នាំគ្នា​ចុះ​ឈ្មោះចូ​ល​រៀន​ជំនាញ​វិជ្ជាជីវៈ និងបច្ចេកទេស ក្នុងកម្មវិធីផ្តល់អាហារូបករណ៍របស់រាជរដ្ឋាភិបាល សម្រាប់​ការ​បណ្តុះ​បណ្តាលជំនាញវិជ្ជាជីវៈជូនយុវជន ១.៥លាននាក់ មានចំនួនជាង ៤ម៉ឺន២៦០០នាក់ ក្នុង​នោះ​មានយុវជនមកពីគ្រួសារក្រីក្រ និងងាយរងហានីភ័យ ចំនួនជិត១៦០០០នាក់ និងមាន​យុវជន​កំពុង​រៀនសរុបចំនួន ១៨៣៣៦នាក់ ក្នុងនោះមានយុវជនមានបណ្ណរក្រីក្រី និង​ងាយ​រង​ហានីភ័យ៧ពាន់៤៣៣នាក់៕

អត្ថបទ: ស៊ុម សុខជា