រដ្ឋមន្រ្តីក្រសួងកសិកម្ម៖ បច្ចុប្បន្នកម្ពុជាមានសត្វផ្សោតចំនួន ១០៥ក្បាល

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា បច្ចុប្បន្ន កម្ពុជាមានសត្វផ្សោតទន្លេមេគង្គចំនួនប្រមាណ ១០៥ក្បាល ខណៈអត្រាកើត បានកើនឡើងពី ៦ក្បាល ក្នុងឆ្នាំ២០២២ ដល់ ៨ក្បាល នៅឆ្នាំ២០២៣។

នៅក្នុងពិធីប្រារព្ធទិវាមច្ឆាជាតិ នៅព្រឹកថ្ងៃទី១ ខែកក្កដា ឆ្នាំ២០២៤នេះ ក្រោមអធិបតីភាពរបស់ សម្តេចធិបតី ហ៊ុន ម៉ា ណែត នាយករដ្ឋមន្រ្តីនៃកម្ពុជា ឯកឧត្តម ឌិត ទីណា បានរាយការណ៍​ឲ្យ​ដឹង​ថា ក្នុងអនុវិស័យជលផល ក្រសួងកសិកម្ម ដែលមានរដ្ឋបាលជលផលជាសេនាធិការ តែងតែ​យក​ចិត្តទុកដាក់ខ្ពស់ក្នុងការគ្រប់គ្រង អភិរក្ស និងអភិវឌ្ឍធនធានជលផល ប្រកបដោយ​និរន្តរ​ភាព ដោយរក្សាតុល្យភាពរវាងការអភិរក្ស និងការអភិវឌ្ឍ។ ពាក់ព័ន្ធនឹងការងារគ្រប់គ្រង និង​អភិរក្ស​ធនធានជលផល ក្រសួងបាននិងកំពុង​ចាត់​វិធានការ​ច្បាប់យ៉ាង​ម៉ឺង​ម៉ាត់​លើ​បទ​ល្មើស​នេសាទ និងការផលិត​ចែក​ចាយ​ឧបករណ៍​នេសាទ​ដែល​បំផ្លិច​បំផ្លាញ​ធ្ងន់ធ្ងរ​ដល់​ធន​ធាន​ជល​ផល, ជំរុញចលនាលែងត្រីមេពូជ និងត្រីរងគ្រោះថ្នាក់ចូលក្នុងធម្មជាតិវិញ, ចាត់វិធាន​ការ​គ្រប់​គ្រង​​ម៉ឺង​ម៉ាត់ក្នុងរដូវបិទនេសាទ, សាងសង់​ជណ្តើរ​ត្រី​ដើម្បី​ជួយ​សម្រួល​ដល់​ការ​ផ្លាស់​ទី​របស់​ត្រី និង​សង្គ្រោះត្រីមេពូជនៅតាមកន្លែងអភិរក្សដែលរីងស្ងួតនៅរដូវប្រាំងដោយសារអាកាសធាតុឡើង កម្តៅ​ខ្លាំង និងអូសបន្លាយពេលយូរ ដោយបានធ្វើការស្តារ បូមទឹកបញ្ចូល ឬជីក​ប្រឡាយ​បង្ហូ​រ​ទឹក​ចូល​។

ឯកឧត្តមរដ្ឋមន្រ្តី ឲ្យដឹងទៀតថា ជាលទ្ធផលនៃកិច្ចខិតខំប្រឹងប្រែងនេះ អត្រាស្លាប់​របស់​សត្វ​ផ្សោត​ទន្លេមេគង្គត្រូវបានកាត់បន្ថយគួរឱ្យកត់សម្គាល់ គឺពី ១១ក្បាល នៅឆ្នាំ២០២២ មកត្រឹម ៥ក្បាល នៅឆ្នាំ២០២៣។ ឯកឧត្តម បានបន្តថា សម្រាប់រយៈពេល ៦ខែ ដើមឆ្នាំ២០២៤ ផ្សោតកើតកូនបាន ៨ក្បាល និងស្លាប់តែ ២ក្បាលប៉ុណ្ណោះ ដែលនេះគឺដំណឹងដ៏គួររំភើបរីករាយ។

បើ​តាម ឯកឧត្តមរដ្ឋមន្រ្តី ក្រោមកិច្ចសហការជាមួយដៃគូអភិវឌ្ឍតាមរយៈគម្រោង អច្ឆរិយៈ​ភាព​នៃ​ទន្លេ​មេគង្គ ចាប់ពីឆ្នាំ២០២០មក កម្ពុជាបានលែងត្រីមេពូជចំនួន ២១,៣៦៣ក្បាល រួមមាន៖ បបែលទឹកសាប ត្រីរាជ ត្រីគល់រាំង ត្រីប្រាធំ និងត្រីត្រសក់ក្រហមជាដើម ចូលទៅក្នុងធម្មជាតិវិញ ដោយមានកិបស្លាកភ្ជាប់ប្រព័ន្ធតាមដាន ដើម្បីសិក្សាអំពីបម្លាស់ទីរបស់មច្ឆជាតិទាំងនោះ។

សូមបញ្ជាក់ ទាក់ទិននឹងសត្វផ្សោតទន្លេមេគង្គនេះ ត្រូវបានអ្នកវិទ្យាសាស្រ្ត ចាត់ថ្នាក់​ក្នុង​បញ្ជី​ក្រហម​របស់អង្គការ IUCN ជាប្រភេទជិតផុតពូជ។ នៅកម្ពុជា សត្វផ្សោតទាំងនេះកំ​ពុងរស់​នៅ​តាម​ទីជម្រកសំខាន់ៗនៃទន្លេមេគង្គ ក្នុងខេត្តក្រចេះ និងខេត្តស្ទឹងត្រែង៕