ព័ត៌មាន

ឯកឧត្តម អ៊ឹម ឈុនលឹម អញ្ជើញនិវត្តន៍មកមាតុប្រទេសវិញ បន្ទាប់ពីចូលរួមសន្និសីទអន្តរជាតិ នៃតុលាការធម្មនុញ្ញសហព័ន្ធរុស្ស៊ី

នៅថ្ងៃទី១ ខែកក្កដា ឆ្នាំ២០២៤ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានដឹកនាំគណៈប្រតិភូក្រុមប្រឹក្សាធម្មនុញ្ញ និវត្តមកមាតុប្រទេសវិញ ក្រោយបញ្ចប់បេសកកម្មដោយជោគជ័យក្នុងការចូលរួមសន្និសីទអន្តរជាតិនៃតុលាការ ធម្មនុញ្ញសហព័ន្ធរុស្ស៊ី ក្រោមប្រធានបទ “ការការពារសិទ្ធិ និងការពិនិត្យធម្មនុញ្ញភាព” ដែលបានប្រព្រឹត្តទៅ នាទីក្រុង St. Petersburg របស់សហព័ន្ធរុស្ស៊ី ចាប់ពីថ្ងៃទី២៦ ដល់ ថ្ងៃទី២៨ ខែមិថុនា ឆ្នាំ២០២៤ ។

នៅក្នុងសន្និសីទអន្តរជាតិខាងលើ ឯកឧត្តមកិត្តិនីតិកោសលបណ្ឌិតប្រធាន បាន ថ្លែងបទអន្តរាគមន៍ ចែករំលែកអំពីសមត្ថកិច្ច និងពិសោធន៍របស់ក្រុមប្រឹក្សាធម្មនុញ្ញនៃ ព្រះរាជាណាចក្រកម្ពុជា ដោយផ្តោតលើយន្តការនៃការលើកកម្ពស់ និងការការពារសិទ្ធិ និងសេរីភាពរបស់ប្រជាពលរដ្ឋ ដែលមានចែងក្នុងរដ្ឋធម្មនុញ្ញ ក្នុងក្របខណ្ឌនៃការ ពិនិត្យធម្មនុញ្ញភាពនៃច្បាប់។

សន្និសីទអន្តរជាតិ ដែលតុលាការធម្មនុញ្ញនៃសហព័ន្ធរុស្ស៊ី តែងប្រារព្ធធ្វើប្រចាំឆ្នាំ គឺជាវេទិកាមួយមានសារសំខាន់ណាស់ ដោយលើកឡើងនូវគោលការណ៏សំខាន់ៗ នៃរដ្ឋធម្មនុញ្ញ និងច្បាប់ រួមទាំងផ្តល់ឱកាសដល់តុលាការ ឬក្រុមប្រឹក្សាធម្មនុញ្ញនៃបណ្តាប្រទេស ជាសមភាគីធ្វើការពិភាក្សាផ្លាស់ប្តូរ ចែករំលែកបទពិសោធន៍ពីគ្នាទៅវិញទៅមក ស្របតាមបរិបទនៃប្រទេសនីមួយៗ ក្នុងទិសដៅអភិវឌ្ឍប្រព័ន្ធធម្មនុញ្ញ និងប្រព័ន្ធច្បាប់ស្របតាមការវិវត្តនៃសភាពការណ៍ប្រែប្រួលរបស់ពិភពលោក។

សូមបញ្ជាក់ថា សន្និសីទអន្តរជាតិរបស់តុលាការធម្មនុញ្ញនៃសហព័ន្ធរុស្ស៊ីប្រចាំ ឆ្នាំ២០២៤នេះ មានការអញ្ជើញចូលរួមពីបណ្តាតុលាការធម្មនុញ្ញ ក្រុមប្រឹក្សាធម្មនុញ្ញ និងតុលាការកំពូលមកពី២៤ប្រទេស ដែលក្នុងនោះមានប្រទេសសមាជិកអាស៊ានចំនួន៥ គឺ កម្ពុជា, ឥណ្ឌូណេស៊ី, ថៃឡង់ដ៍, មីយ៉ាន់ម៉ា, និងម៉ាឡេស៊ី ខណៈមានអង្គការអន្តរជាតិ និងអន្តររដ្ឋាភិបាល ចំនួន២ បានចូលរួមផងដែរ គឺ Court of the Eurasan៕