ពលរដ្ឋអ្នក​ចិញ្ចឹមជ្រូកក្នុងស្រុក មានការបារម្ភពីតម្លៃ ខណៈឃើញមានការនាំជ្រូកចូលពីប្រទេសជិតខាងរាល់ថ្ងៃ

ប្រជាពលរដ្ឋប្រកបមុខរបរចិញ្ចឹមជ្រូកក្នុងស្រុក កំពុងមានការបារម្ភពីតម្លៃ ខណៈឃើញមានការនាំជ្រូកចូលសារជាថ្មីមកពីប្រទេសថៃ តាមច្រកទ្វារព្រំដែនអន្តរជាតិអូរស្មាច់ ក្នុងភូមិសាស្រ្តខេត្តឧត្តរមានជ័យ រាល់ថ្ងៃនោះ។

ពលរដ្ឋម្នាក់ឈ្មោះ ទ្រី រស់នៅចំណុចភូមិដើមជ្រៃ សង្កាត់អូរស្មាច់ ក្រុងសំរោង ​ខេត្តឧត្តរមានជ័យ បានលើកឡើងថា ក្រុមគ្រួសារ​របស់គាត់​ប្រកបមុខ​របរ​ចិញ្ចឹមសត្វជ្រូក​នេះ​ អស់រយៈពេល ២០ឆ្នាំមកហើយ ដោយបិទស្រាយកបាយធ្វើជាចំណីអាហារ​សម្រាប់​ផ្គត់ផ្គង់​ប្រចាំថ្ងៃ។

ពលរដ្ឋរូបនេះ បានឲ្យដឹងថា ការ​ចិញ្ចឹមសត្វ​ជ្រូក​បច្ចុប្បន្ន​តម្លៃ​លក់ចេញលើទីផ្សារ​ហាក់មាន​តម្លៃខ្ពស់​បន្តិច​ដោយក្នុងមួយគីឡូ​បានតម្លៃប្រាំបួនពាន់រៀល ​ទៅមួយម៉ឺនរៀល ។ប៉ុន្តែក្នុង​រយៈពេលប៉ុន្មានថ្ងៃនេះ តម្លៃនៃការលក់ចេញឲ្យទៅក្រុមឈ្មួញក្នុងស្រុកហាក់មានតម្លៃធ្លាក់ចុះបន្តិច ខណៈឃើញមានការដឹកជញ្ជូននាំសត្វជ្រូកឆ្លងដែនចូលពីប្រទេសថៃមកកម្ពុជា តាមច្រកទ្វារព្រំដែនអូរស្មាច់ ក្នុងភូមិសាស្រ្តខេត្តឧត្តរមានជ័យ របស់ក្រុមហ៊ុនឌឿន សាមិត នោះធ្វើឲ្យពលរដ្ឋដែលជាអ្នក​ប្រកបររបរចិញ្ចឹមសត្វជ្រូក​ក្នុងស្រុក​មាន​ការ​បារម្ភពីតម្លៃលើទីផ្សារក្នុងស្រុក អាចនិងប្រឈមទៅនឹងការធ្លាក់ចុះថ្លៃនៅថ្ងៃខាងមុខផងដែរ។

យ៉ាងណាម៉ិញលោក ​តាញ់ បុត្តា​ ប្រធានការិយាល័យផលិតកម្ម និង​បសុព្យាបាលនៃមន្ទីរកសិកម្ម​ខេត្ដឧត្ដរមានជ័យ ​បានឱ្យដឹងថា សត្វជ្រូករស់នាំចូលពីប្រទេសថៃ តាមច្រកអូរស្មាច់ ក្នុងភូមិសាស្រ្ត​ខេត្តឧត្តរមានជ័យ ​និងដឹកជញ្ជូនបន្តទៅប្រទេសវៀតណាម​ គឺ​មាន​ច្បាប់អនុញ្ញាត របស់​ក្រុមហ៊ុន ឌឿន សាមិត ចេញពី​អគ្គនាយកដ្ឋាន​សុខ​ភាពសត្វ និងផលិកម្មសត្វរបស់ក្រសួង​កសិកម្មរុក្ខា​ប្រមាញ់ និងនេសាទ និង​មិន​មាន​ផល​ប៉ះពាល់ និង​មានការ​ចែកចាយ​សម្រាប់​ទីផ្សារ​ក្នុងស្រុកនោះទេ៕