វិទ្យាល័យទេពប្រណម្យរៀបចំពិព័រណ៍បង្ហាញសមិទ្ធផលស្នាដៃសិស្សចំនួន ១៥០គម្រោង

វិទ្យាល័យទេពប្រណម្យខេត្តកណ្ដាល នៅថ្ងៃទី១ ខែកក្កដានេះ បានរៀបចំព្រឹត្តិការណ៍ពិព័រណ៍ស្នាដៃសិស្ស ដោយមានការដាក់តាំងបង្ហាញសមិទ្ធផលស្នាដៃសិស្សចំនួន ១៥០គម្រោង ដែលមានសិស្ស និងមាតាបិតាសិស្សចូលរួមទស្សនាជាង ២០០០នាក់។ ព្រឹត្តិការណ៍ពិព័រណ៍នេះ ក៏មានការចូលរួមដាក់ស្ដង់បញ្ជរផ្សាយតម្រង់ទិសអាជីពដល់សិស្សានុសិស្សពីសំណាក់ស្ថាប័នរដ្ឋ និងវិស័យឯកជនចំនួន៩ស្ថាប័នផងដែរ។

ព្រឹត្តិការណ៍នេះ គឺត្រូវបានរៀបចំឡើងក្នុងគោលបំណងផ្ដល់ឱកាសដល់សិស្សានុសិស្សក្នុងការប្រកួតប្រជែង និងបង្ហាញនូវសមិទ្ធិស្នាដៃសិក្សាស្រាវជ្រាវរបស់ខ្លួនដល់មិត្តរួមសាលារៀន មាតាបិតា អ្នកអាណាព្យាបាល ព្រមទាំងជាផ្នែកមួយនៃការជំរុញស្មារតីប្រកួតប្រជែងចំណេះដឹងរបស់សិស្សផងដែរ។

គួររំលឹកថា ក្នុងក្របខណ្ឌនៃការអនុវត្តស្ដង់ដាសាលារៀនគំរូ ការរៀបចំពិព័រណ៍ស្នាដៃសិស្ស ក៏ជាសូចនាករសំខាន់មួយ ដែលសាលារៀនត្រូវអនុវត្តឱ្យបានរឿយៗដើម្បីលើកកម្ពស់ស្មារតីប្រកួតប្រជែង និងនវានុវត្តន៍របស់សិស្ស៕