ក្រុមការងារឆៀកចល័តផ្តើមដំណើរការចុះធ្វើឆៀករថយន្តនៅមន្ទីរសាធារណការ និងដឹកជញ្ជូនខេត្ត

នៅព្រឹកថ្ងៃទី២ ខែកក្កដាឆ្នាំ២០២៤នេះ ក្រុមការងាររថយន្តត្រួតពិនិត្យ​លក្ខណៈបច្ចេកទេស​យានយន្ត​​ចល័ត ឬហៅថាឆៀកចល័ត ផ្តើមដំណើរការចុះប្រតិបត្តិការធ្វើឆៀករថយន្ត ដើម្បីត្រួត​ពិនិត្យ​លក្ខណៈបច្ចេកទេសយានយន្តគ្រប់ប្រភេទ​ដែលផុតការកំណត់​ជូនពលរដ្ឋ ដែលមានរថយន្ត​ប្រើប្រាស់ផុតសុពលភាពមកទទួលធ្វើឆៀករថយន្តរបស់ខ្លួនឱ្យបានរួសរាន់ ​មានរយៈពេលប្រាំថ្ងៃ ចាប់ពីថ្ងៃទី១ហូតដល់ថ្ងៃទី៥កក្កដាឆ្នាំ២០២៤ នៅបរិវេណមន្ទីរសាធារណការ និងដឹកជញ្ជូនខេត្តឧត្តរមានជ័យ។

លោក ពីវ ពិឆេង ប្រធានការិយាល័យបច្ចេសទេសយានយន្ត​នៃមន្ទីរសាធារណការ និងដឹកជញ្ជូន​ខេត្ត​ឧត្តរមានជ័យ បានឲ្យដឹងថា ការត្រួតពិនិត្យលក្ខណៈបច្ចេកទេស​រាល់គ្រប់យានយន្ត​គ្រប់ប្រភេទ​របស់បងប្អូន និងម្ចាស់អាជីវកម្មដែលមានរថយន្តធំៗដឹកទំនិញ ដើម្បីពិនិត្យរាល់​លក្ខណៈបញ្ហា​ប្រឈមនានា ដើម្បីធានាថា រថយន្តរបស់បងប្អូនមានលក្ខណៈល្អប្រសើរ និង​មាន​សុវត្ថិភាពក្នុងការបើកបរប្រកបដោយភាពល្អ​ប្រសើរដោយមិនមានបញ្ហាប្រឈម ក្នុងការបើកបរលើដងផ្លូវនោះទេ ។

លោកបញ្ជាក់ថា ក្នុងការត្រួតពិនិត្យលក្ខណៈបច្ចេកទេសយានយន្តចល័ត​នាពេលនោះដែរ គឺមាន​យានយន្តជាច្រើនគ្រប់ប្រភេទមិនមានលក្ខណៈបច្ចេកទេស​បានត្រឹមត្រូវស្របតាមស្តងដារនោះទេ ភាគច្រើន​គឺបញ្ហាប្រឈមទៅ និងសំបកកង់រថយន្តសឹក ​បញ្ហាភ្លើងហ្វាកោត គ្រឿងក្រោម ។ កត្តា​ទាំងអស់នេះហើយ ដែលតម្រូវឲ្យបងប្អូនដែលជាម្ចាស់យានយន្ត​ត្រូវធ្វើការត្រួតពិនិត្យ ​យានយន្ត របស់ខ្លួនឲ្យបានត្រឹមត្រូវមានលក្ខណៈល្អប្រសើរឡើង ដើម្បីការបើកបរធានាបានសុវត្ថិភាព​នៅលើ​ដងផ្លូវផងដែរ៕

អត្ថបទ: BTV NEWS