អភិបាលខណ្ឌ៧មករា ជំរុញដល់មន្រ្តីក្រោមឱវាទបន្តពង្រឹងការងារសន្តិសុខ សណ្តាប់ធ្នាប់សាធារណៈក្នុងមូលដ្ឋាន

កម្លាំងគណៈបញ្ជាការឯកភាពខណ្ឌ៧មករា បានប្រជុំបន្តដាក់ផែនការ ដល់មន្ត្រីក្រោម​ឱវាទ​ជំនាញ​ពាក់ព័ន្ធ ពង្រឹង និងត្រួតពិនិត្យ ការងារសេវាសាធារណៈ សន្តិសុខសុវត្ថិភាព​បរិស្ថាន​អនាម័យ​សណ្ដាប់​ធ្នាប់សាធារណៈជូនដល់ប្រជាពលរដ្ឋក្នុងមូលដ្ឋានបន្ថែមឲ្យបានដាច់ខាត។

កិច្ចប្រជុំបានធ្វើឡើងនៅព្រឹកថ្ងៃទី០២ ខែកក្កដា ឆ្នាំ២០២៤ ក្រោមអធិបតីភាពលោក ថេង សុថុល អភិបាល នៃគណៈអភិបាលខណ្ឌ៧មករា និងជាប្រធាន​គណៈ​បញ្ជាការ​ឯកភាព​រដ្ឋបាល​ខណ្ឌ​៧មករា និងមានការចូលរួមពីលោកអភិបាលរងខណ្ឌ លោកអធិការនគរបាលខណ្ឌ លោក​មេ​បញ្ជា​ការរងមូលដ្ឋានកងរាជអាវុធហត្ថខណ្ឌ គណៈនាយករដ្ឋបាល លោក-លោកស្រីប្រធាន អនុ​ប្រធានការិយាល័យទាំង១១ លោក-លោកស្រីចៅសង្កាត់ទាំង០៨ លោកនាយ​ប៉ុស្ដិ៍​នគរបាល​រដ្ឋបាល​ទាំង០៨ និងមន្រ្តីពាក់ព័ន្ធ។

នៅក្នុងកិច្ចប្រជុំនេះដែរលោក ថេង សុថុល អភិបាលខណ្ឌ៧មករា បានមានប្រសាសន៍ថា សូមឲ្យ​មន្ត្រី​ជំនាញពាក់ព័ន្ធបន្តរឹតបន្តឹង ពង្រឹង និងត្រួតពិនិត្យការងារសេវាសាធារណៈ សន្តិសុខ​សណ្តាប់​​ធ្នាប់​សាធារណៈ ការបង្ការ បង្រ្កាបល្បែងស៊ីសង នឹងការ​បង្ការ​បង្រ្កាប​បទ​ល្មើស​គ្រឿង​ញៀន​, ចំពោះក្មេងទំនើង គណៈបញ្ជាការឯកភាព ត្រូវតែបន្តបង្ក្រាបឲ្យខ្លាំងក្លា ដើម្បីធ្វើ​យ៉ាង​ណា​ឲ្យភូមិសង្កាត់មានសុវត្ថិភាព បង្កភាព​កក់​ក្តៅដ​ល់​ប្រជាពលរដ្ឋ​ស្រប​​តាម​អនុសាសន៍​ដ៏​ខ្ពង់​ខ្ពស់​រប​ស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។

លោកអភិបាល បានសង្កត់ធ្ងន់ថា ចំពោះល្បែងស៊ីសងគ្រប់ប្រភេទ ជាពិសេសប្រភេទ ល្បែង​ឡូតូ​តូច​ធំ ត្រូវតែលប់បំបាត់ មិនត្រូវឲ្យមាននៅក្នុងមូលដ្ឋានរបស់ខ្លួនដាច់ខាត តាមរយៈ​ការ​ពង្រឹង​ពី​មួយ​ថ្ងៃ​ទៅ​មួយថ្ងៃឲ្យបានខ្លាំង ដើម្បីឈានទៅលប់បំបាត់ឲ្យអស់។

លោកអភិបាលបានបញ្ជាក់បន្ថែមថា បញ្ហាក្មេងទំនើងនៅក្នុងមូលដ្ឋាន ជាហេតុបង្ក​ឲ្យ​មាន​ភាព​អសន្តិសុខ ធ្វើឲ្យប្រជាពលរដ្ឋមានការភ័យខ្លាច ដូច្នេះសូម​ឲ្យ​កម្លាំង​មាន​សមត្ថកិច្ច​ត្រូវ​មាន​ការ​ល្បាត​ពួន​ស្ទាក់២៤ម៉ោងលើ២៤ ម៉ោង នៅតំបន់ស្មុគស្មាញ ក្នុងមូលដ្ឋាន ដើម្បីរក្សាសន្តិ​សុខ​សុវត្ថិភាព​ជូន​ប្រជាពលរដ្ឋ និងទទួលសេចក្ដី​រាយ​ការណ៍​ពី​ប្រជាពលរដ្ឋ​កម្លាំង​ចេញ​ជួយ​អន្ត​រាគមន៍បានទាន់ពេលវេលា៕

អត្ថបទ៖ កុម្ភះ