អ្នកជំនាញភស្តុភាកម្ម និងការធ្វើដំណើរទេសចរណ៍ថា ព្រែកជីកហ្វូណនតេជោនឹងធ្វើឲ្យតម្លៃ​សេវា​ដឹកជញ្ជូនធ្លាក់ចុះ

បណ្តាអ្នកជំនាញភស្តុភាកម្ម និងការធ្វើដំណើរទេសចរណ៍ បានថ្លែងគាំទ្រ និងអបអរសាទរ ដែល​កម្ពុជា​នឹងបើកការដ្ឋានព្រែកជីកហ្វូណនតេជោ នៅថ្ងៃទី៥ ខែសីហា ខាងមុខនេះ ខណៈ​ព្រែកជីក​នេះ​នឹង​ជំរុញតម្លៃសេវាការដឹកជញ្ជូនទំនិញ និងសេវាកម្មទេសចរណ៍ធ្លាក់ចុះ ហើយជំរុញ​សេដ្ឋកិច្ច​ជាតិ​មាន​កំណើនល្អប្រសើរ។

លោកឧកញ៉ា បណ្ឌិត ស៊ិន ចន្ធី អ្នកជំនាញវិជ្ជាជីវៈ វិស័យដឹកជញ្ជូន និងភស្តភាកម្ម នៃ​ក្រម​ប្រឹក្សា​ភិបាល សមាគមភស្តុភាកម្មកម្ពុជាថ្លែងប្រាប់ BTV នៅថ្ងៃទី៣ ខែកក្កដានេះថា បច្ចុប្បន្ន​គ្រប់​ការ​ដឹកជញ្ជូនទំនិញតាមផ្លូវទាំងបួនប្រភេទរួមមាន៖ ផ្លូវទឹក ផ្លូវគោក ផ្លូវដែក និងផ្លូវអាកាស គឺ​មានតែការដឹកជញ្ជូនផ្លូវទឹកទេ មានតម្លៃទាបជាងគេ ហើយតាម​រយៈ​ព្រែក​ជីកហ្វូណន​តេជោ​នេះនឹ​ង​ធ្វើ​ឱ្យតម្លៃដឹកជញ្ជូនមានការធ្លាក់ចុះ និងជួយលើក​កម្ពស់​សេដ្ឋកិច្ច​វិស័យ​ដឹក​ជញ្ជូន​របស់​កម្ពុជា​។

លោក បណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីភិក PATA ប្រចាំនៅកម្ពុជា ថ្លែងថា សមាគម PATA បច្ចុប្បន្នបាន និងកំពុង​ផ្តោត​ការ​ធ្វើ​ការងារ​ខ្លាំង​លើ​ផ្នែក​ការ​ធ្វើ​ដំណើរ​ទេសចរណ៍​អន្តរជាតិ ហើយថា ព្រែកជីកហ្វូណនតេជោ​នឹង​រួម​ចំណែក​កាត់​បន្ថយ​ការ​ចំណាយ​ថ្លៃ​ដើម​ការ​ផលិតផលិតផលក្នុងស្រុក ហើយជាពិសេសទៀតនោះ គឺធ្វើឲ្យកម្ពុជា​មាន​ឯករា​ជ្យ​ភាព​ក្នុង​ការ​ជញ្ជូនទំនិញ និងសេវាកម្មទេសចរណ៍នានា។

សូមជម្រាបថា គម្រោងព្រែកជីកហ្វូណនតេជោនឹងផ្ដល់អត្ថប្រយោជន៍ជាច្រើនដល់ប្រទេសកម្ពុជា ជាពិសេសវិស័យដឹកជញ្ជូន និងការវិនិយោគផ្សេងៗ ខណៈគម្រោងត្រូវប្រើពេលវេលាសាងសង់ ៤ ឆ្នាំ និងចាយថវិកាប្រមាណ ១ ៧០០ លានដុល្លារមានប្រវែងជាង ១៨០ គីឡូម៉ែត្រ៕

អត្ថបទ: ស៊ុម សុខជា