NEA បន្តផ្សព្វផ្សាយឱកាសការងារដល់និស្សិតតាមសាកលវិទ្យាល័យ

រហូតមកដល់ពេលនេះ មជ្ឈមណ្ឌលការងារចល័តរបស់ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ បានបន្ត​សកម្មភាព​ចុះ​ផ្សព្វ​ផ្សាយ​ឱកាស​ការងារ​នៅ​តាមសាកលវិទ្យាល័យនានា ដើម្បីផ្តល់ព័ត៌មានអំពីទីផ្សារការងារ និងនាំយក​ឱកាស​ការងារ​ឲ្យ​ខិតជិតដល់យុវជន ក្នុងគោលបំណង​បង្កើន​លទ្ធភាព​នៃ​ការ​ទទួល​បាន​ការងារ​កាន់​តែ​ឆាប់​រហ័ស។

យោងតាមកាលវិភាគរបស់ទីភ្នាក់ងារជាតិមុខរបរ និងការងារ ការផ្សព្វផ្សាយ​ឱកាស​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានា នៅរាជធានីភ្នំពេញ សម្រាប់ថ្ងៃទី៣ ខែកក្កដា ឆ្នាំ​២០២៤នេះ រួមមាន៖ សាកលវិទ្យាល័យមេគង្គកម្ពុជា , សាកលវិទ្យាល័យជាតិគ្រប់គ្រង , សាកលវិទ្យាល័យវេស្ទើន , សាកលវិទ្យាល័យពុទ្ធិសាស្រ្ត , សាកលវិទ្យាល័យសេដ្ឋកិច្ច និង​ហិរញ្ញវត្ថុ និងវិទ្យាស្ថានជាតិកសិកម្មព្រែកលាប។

ក្នុងបទសម្ភាសន៍ជាមួយព័ត៌មាន ប៊ីធីវី លោក មាស សុភានិត សាកលវិទ្យាធិការរង នៃ​សាកល​វិទ្យាល័យ​មេគង្គកម្ពុជាមានប្រសាសន៍ថា ពាក់ព័ន្ធការងារផ្សព្វផ្សាយនេះ ពិតជាមាន​សារ​សំខាន់​ណាស់​មកកាន់សាលា ថែមទាំងផ្តល់អត្ថប្រយោជន៍ជាច្រើនដែរដល់សិស្ស និស្សិត ព្រោះថា ការ​សិក្សា​គឺ​ផ្សារភ្ជាប់ជាមួយឱកាសការងារ។ លោកបានទទួលស្គាល់ថា ការចុះផ្សព្វផ្សាយ​តាម​សាកល​វិទ្យាល័យ​នេះ ក៏នឹងផ្តល់នូវមូលដ្ឋានមួយទៀតដល់និស្សិត ក្នុងការពិចារណា ថាតើ​ពួក​គាត់​គួរ​ធ្វើ​ការងាអ្វី? ដើម្បីឲ្យស៊ីសង្វាក់គ្នាទៅនឹងជំនាញពួកគាត់កំពុងសិក្សា ជាពិសេស​ជួយ​កាត់​បន្ថយ​នូវ​បញ្ហារៀនខុសជំនាញ និងមិនឆ្លើយតបទៅនឹងតម្រូវការទីផ្សារកំពុងមានជាដើម។

កញ្ញា ថុល គីមហ័រ និស្សិតឆ្នាំទី១ ជំនាញផ្នែកអប់រំភាសាអង់គ្លេស និងកញ្ញា រិទ្ធី លីកា ជា​និស្សិត​ឆ្នាំទី​១​ ដូចគ្នា ជំនាញផ្នែកហិរញ្ញវត្ថុនិងធនាគារ នៃសាកលវិទ្យាល័យមេគង្គកម្ពុជា បានឲ្យ ប៊ីធីវី ដឹង​ស្រដៀង​គ្នាថា បច្ចុប្បន្ននេះឱកាសការងារជាច្រើន បានបង្ហាញ​អំពី​តម្រូវ​ការ​កម្លាំង​ពលកម្ម​លើ​គ្រប់​វិស័យ​។ ប៉ុន្តែអ្វីដែលសំខាន់ចំពោះមុខ គឺការត្រៀមខ្លួនឲ្យបានត្រឹមត្រូវ ទាំងចំណេះដឹង និង​ជំនាញ ដើម្បីឆ្លើយតបតម្រូវការទីផ្សារការងារទាំងពេលបច្ចុប្បន្ន និងអនាគត។

សូមជម្រាបជូនទៀតថា នៅថ្ងៃទី៤ ខែកក្កដា ឆ្នាំ២០២៤ស្អែកនេះ មជ្ឈមណ្ឌលការងារចល័ត របស់​ទីភ្នាក់ងារជាតិមុខរបរ និងការងារ (NEA) នឹងបន្តសកម្មភាព​ចុះ​ផ្សព្វផ្សាយ​ឱកាស​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានាបន្ថែមទៀត ដែលរួមមាន៖ សាកល​វិទ្យាល័យ​ភូមិន្ទ​មីតិសាស្រ្ត និងវិទ្យាស្ថានសេដ្ឋកិច្ច , សាកលវិទ្យាល័យភូមិន្ទវិចិត្រសិល្បៈ , សាកល​វិទ្យាល័យ​អន្តរជាតិ និងសាកលវិទ្យាល័យបញ្ញាសាស្រ្តកម្ពុជា៕

អត្ថបទ: ឈិត បូរ៉ាវី