ចំណោទកំណាត់ផ្លូវជាតិ៤៨មួយចំនួន ត្រូវបានកែសម្រួលចរាចរណ៍

កោះកុង៖ លោកជំទាវ មិថុនា ភូថង អភិបាលខេត្តកោះកុង បានអះអាងថា កំណាត់ផ្លូវជាតិ៤៨ដែលកំពុងធ្វើការដ្ឋាស្ថាបនា គឺចំណោតដែលលំបាកធ្វើចរាចរណ៍ត្រូវបានកែសម្រួលជូនដល់អ្នកដំណើររួចរាល់ហើយ។

តាមរយៈសារបង្ហោះលើហ្វេសប៊ុកផ្លូវការរបស់លោកជំទាវ មិថុនាភូថង អភិបាលខេត្តកោះកុងនៅថ្ងៃទី៣ ខែកក្កដា ឆ្នាំ២០២៤នេះ បានថ្លែងថា កន្លងមក មានអ្នកលេងបណ្តាញសង្គមខ្លះ បានថតបង្ហោះអំពីស្ថានភាពលំបាកបន្តិចបន្តួច ក្នុងការធ្វើដំណើរលើបណ្តោយផ្លូវជាតិលេខ៤៨ ចំនួន២កន្លែង ដូចនៅត្រង់:ទី១- ចំណុចចុះចំណោតទឹកជ្រោះតាប៉ន (បង្គោលគីឡូម៉ែតលេខ ១៤០ +៣០០ -> ១៤០+៧០០) និងទី២- ចំណុចបង្គោលអង់តែន៣ដើម (បង្គោលគីឡូម៉ែត្រលេខ ១៣៧ -> ១៤០)។

លោកជំទាវអភិបាលខេត្ត គូសបញ្ជាក់ដែរថា នៅដើមខែកក្កដា ឆ្នាំ២០២៤នេះ អាកាសធាតុល្អ រាំងភ្លៀង គឺក្រុមហ៊ុនម៉ៅការសាងសង់ បានយកចិត្តទុកដាក់យ៉ាងខ្លាំងបំផុត ក្នុងការស្ថាបនា និងឈូសឆាយកៀរដីស្អិត និងចាក់កម្ទេចថ្មបង្ហាប់ណែន ដើម្បីសម្រួលជាបណ្តោះអាសន្នជូនបងប្អូនធ្វើដំណើរបានស្រួលវិញរួចរាល់ហើយ។

គួរកត់សម្គាល់ថា ការស្ថាបនាលើកកម្រិតគុណភាពផ្លូវជាតិលេខ៤៨ ដោយអ៊ុតកៅស៊ូAC ប្រវែង១៤៨គីឡូម៉ែត្រ ទទឹង១១ម៉ែត្រ និងកម្រាស់៧០មីលីម៉ែត្រ មាន២គន្លង និង៤គន្លង។ កាលពីថ្ងៃទី១៨ ខែមេសា ឆ្នាំ២០២៤កន្លងទៅ ក្រសួងសាធារណការ និងដឹកជញ្ជូន ឱ្យដឹងពីវឌ្ឍនៈភាពនៃការដ្ឋានផ្លូវជាតិលេខ៤៨ថា គម្រោងលើកកម្រិតគុណភាពផ្លូវជាតិលេខ៤៨ (ស្រែអំបិល-កោះកុង) កំពុងដំណើរការយ៉ាងរលូន ដោយសម្រេចបានលទ្ធផល ៥២.១២% ហើយ។ នៅរដូវប្រាំង ត្រឹមខែមិថុនា ឆ្នាំ២០២៤ ខាងមុខ ត្រូវសម្រេចឱ្យបាន ៦០%។

ទន្ទឹមនឹងវឌ្ឍនភាព គម្រោងនេះក៏ជួបភាពយឺតយ៉ាវខ្លះមកផងដែរ ដែលបណ្តាលមកពីបញ្ហាកូវីដ-១៩ និងកត្តាភូមិសាស្ត្រ។ តំបន់នោះនារដូវវស្សាមានភ្លៀងធ្លាក់ខ្លាំងរយៈពេល ៦ខែក្នុងមួយឆ្នាំ ដូច្នេះរយៈពេលនៃការអនុវត្តការងារមានពេលតែ ៦ខែ៕

អត្តបទៈឈឹម មករា