ក្រសួងបរិស្ថាននឹងចែកកូនឈើជាង៤ម៉ឺនដើម ជូនសាធារណជន​ដោយឥតគិតថ្លៃ​ក្នុងពិព័រណ៍កូនឈើ

តាមការគ្រោងទុក ក្រសួងបរិស្ថាននឹងចែកកូនឈើចំនួនជាង ៤ម៉ឺនដើម​ជូន​ដល់​សាធារណ​ជន​ដោយ​ឥតគិតថ្លៃក្នុងពិព័រណ៍ផ្សព្វផ្សាយ និងចែកកូនឈើ ក្រោមមូលបទ «ពន្លកបៃតង» និង​វេទិកា​កេសរកូលជាតិ លើកទី៤ ចាប់ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៤ ស្ថិត​នៅ​ស្តីការ​ក្រសួងបរិស្ថាន រាជធានីភ្នំពេញ។

មានប្រសាសន៍ក្នុងសន្និសីទសារព័ត៌មានស្តីពី «ពន្លកបៃតង» នៅថ្ងៃទី០៥ ខែកក្កដានេះ ឯកឧត្តម​បណ្ឌិត សាម អ៊ីន រដ្ឋលេខាធិការក្រសួងបរិស្ថាន បានឱ្យដឹងថា គិតមកដល់ពេលនេះ ក្រសួង​បរិស្ថានបានត្រៀមលក្ខណៈរួចរាល់ រៀបចំពិព័រណ៍ផ្សព្វផ្សាយ និងចែកកូនឈើ ក្រោម​មូល​បទ«ពន្លកបៃតង» និងវេទិកាកេសរកូលជាតិលើកទី៤។ ឯកឧត្តមបន្តថា ក្នុងពិព័រណ៍នេះ នឹង​ចែក​កូន​ឈើដែលបានមកពីបណ្តាមន្ទីររាជធានីខេត្ត និងអង្គការដៃគូ​ពាក់ព័ន្ធ​សរុប​ចំនួន​ជាង​៤ម៉ឺន​ដើម ជូនដល់សាធារណជនដោយឥតថ្លៃ និងមានមន្រ្តីជំនាញប្រាប់ពីរបៀបដាំ និងថែទាំ។ ក្រៅពីនេះ ក៏មានការតាំងបង្ហាញសមិទ្ធផលនានារបស់ក្រសួង មន្ទីរបរិស្ថាន ដៃគូអភិវឌ្ឍន៍ និង​សមាគម​យុវជន ផលិតផលខ្មែរ ផលិតផលជីវៈចម្រុះ ពីសហគមន៍ និងអង្គការដៃគូផងដែរ។

ពិព័រណ៍ផ្សព្វផ្សាយ និងចែកកូនឈើ ក្រោមមូលបទ«ពន្លកបៃតង» និងវេទិកាកេសរកូលជាតិ លើក​ទី៤ នឹងប្រារព្ធបើកជាផ្លូវការ នារសៀលថ្ងៃទី១០ ខែកក្កដា ឆ្នាំ២០២៤ ក្រោម​អធិបតីភាព​ដ៏​ខ្ពង់​ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជា​ប្រធាន​សហ​ភាព​សហព័ន្ធយុវជនកម្ពុជា ដោយមានការអញ្ជើញចូលរួមពីថ្នាក់ដឹកនាំ មន្រ្តីរាជការ​ក្រសួង​បរិស្ថាន តំណាងក្រសួង-ស្ថានប័ន ស្ថានទូត និងដៃគូពាក់ព័ន្ធផ្សេងៗទៀត។

គួរបញ្ជាក់ដែរថា ការៀបចំពិព័រណ៍នេះ គឺជាការ​ឆ្លើយ​តប​ទៅ​នឹង​កម្ម​វិធី​គោល​នយោបាយ​របស់​រាជ​រដ្ឋាភិបាលកម្ពុជា នីតិកាលទី៧ នៃរដ្ឋសភា ដែលដឹកនាំដោយសម្តេចមហាបវធិបតី ហ៊ុន ម៉ាណែត ​នាយករដ្ឋមន្ត្រីនៃព្រះរាជាណាចក្រកម្ពុជា និងការ​អនុវត្ត​តាម​យុទ្ធសាស្រ្ត​ចក្រា​វិស័យ​បរិស្ថាន ឆ្នាំ២០២៣-២០២៨ ដែលបានផ្តោតលើមុំបីសំខាន់ គឺស្អាត បៃតង និងចីរភាព។ ម្យ៉ាង​វិញទៀត ក៏​ដើម្បីឆ្លើយតបទៅនឹងតម្រូវការស្ថានភាពជាក់ស្តែងរបស់ប្រទេសកម្ពុជា និងនិន្នាការ​បរិស្ថាន​ពិភពលោក ក្នុងកិច្ចការពារថែរក្សា អភិរក្សជីវៈចម្រុះ និងធនធានធម្មជាតិ ក្នុងតំបន់​ការពារ​ធម្មជាតិ ឱ្យទទួលបានប្រសិទ្ធភាព និងមានចីរភាព ព្រមទាំងជា​ការ​ជំរុញ​ឱ្យ​ប្រទេស​កម្ពុជា​ឆ្ពោះ​ទៅ​ជាប្រទេសអព្យាក្រឹតកាបូន និងមានគម្របព្រៃឈើចំនួន៦០% នៅឆ្នាំ២០៥០៕

អត្ថបទ៖ ទូច សោភ័ណ