ព័ត៌មាន

វត្តអារាមនៅភ្នំពេញត្រៀមទូងស្គរអបអរសាទរថ្ងៃបើកការដ្ឋានព្រែកជីកហ្វូណនតេជោនាដើមខែក្រោយ

វត្តអារាមនៅរាជធានីភ្នំពេញ ចាប់ផ្តើមត្រៀមទូងស្គរ វាយគង ដើម្បីចូលរួមអបអរសាទរ ថ្ងៃបើកការដ្ឋានព្រែកជីកហ្វូណនតេជោនាដើមខែសីហាខាងមុខនេះ។

ស្របពេលពិធីបើកការដ្ឋានគម្រោងព្រែកជីកហ្វូណនតេជោនៅសល់តែរយៈពេលជិត១ខែប៉ុណ្ណោះ បណ្តាវត្តអារាមមួយចំនួនក្នុងរាជធានីភ្នំពេញ បានចាប់ផ្តើមត្រៀមលក្ខណៈរៀបចំឧបករណ៍បន្លឺសំឡេង និងការជូនដំណឹងរបស់ពុទ្ធបរិស័ទឱ្យចូលរួមកាន់តែច្រើនកុះករក្នុងថ្ងៃប្រារព្ធពិធីអបអរសាទរទៅដល់ការចាប់ផ្តើមដំណើរការគម្រោងព្រែកជីកហ្វូណនតេជោ។

បើតាមសង្ឃដីការបស់ព្រះសុមេធវង្ស សុខ ប៊ុនធឿន ព្រះអនុគណខណ្ឌមានជ័យ និងជាព្រះចៅអធិការវត្តនន្ទមុនី បានបញ្ជាក់ថា វត្តនន្ទមុនីមិនខុសពីវត្តដទៃទៀតក្នុងមូលដ្ឋានបានត្រៀមរៀបចំខ្លួនទូងស្គរចូលរួមអបអរសាទរគម្រោងព្រែកហ្វូណនតេជោ ដោយព្រះអង្គមានសង្ឃដីកាទៀតថា ក្នុងសង្គមខ្មែរតាំងពីបុរាណដល់បច្ចុប្បន្ន គឺអាណាចក្រ និងពុទ្ធចក្រត្រូវដើរទន្ទឹមគ្នា។

ជាមួយគ្នា លោកតាជីចំណុះជើងវត្តនន្ទមុនី បានឱ្យដឹងថា ពួកគាត់នឹងចូលរួមជាមួយគណៈកម្មការវត្ត ដើម្បីអបអរសាទរព្រមគ្នាក្នុងឱកាសដែលកម្ពុជាមានគម្រោងប្រវត្តិសាស្រ្តព្រែកជីកហ្វូណនតេជោ ដែលជាប្រយោជន៍របស់សង្គមជាតិទាំងមូល។

សូមជម្រាបថា គម្រោងព្រែកជីកហ្វូណនតេជោ ត្រូវបានកំណត់ពិធីបើកការដ្ឋាននៅថ្ងៃទី៥ ខែសីហា ឆ្នាំ២០២៤ វេលាម៉ោង ៩ និង៩នាទីព្រឹក។ ខណៈនៅថ្ងៃបើកការដ្ឋាននេះ ក្រសួងធម្មការ និងសាសនា បានណែនាំដល់ប្រធានមន្ទីរធម្មការនិងសាសនា រាជធានី-ខេត្តទាំងអស់ ត្រូវសហការជាមួយព្រះមេគណ ព្រះអនុគណ ព្រះចៅអធិការ និងមេដឹកនាំគ្រប់សាសនា រៀបចំ វាយគង ជួង រតាំង ទូងស្គរ ទះប៉ោត និងគោះត្រដោក ដោយបន្លឺជាសំឡេងឱ្យបានកងរំពង នៅតាមទីអារាមសាសនា ដូចជា វត្ត មណ្ឌលវិបស្សនា អាស្រម សាលាបុណ្យ វិហារសាសនា ស្នាក់ការស៊ូរ៉ាវឱ្យបានព្រមៗគ្នា។ ក្នុងនោះ ត្រូវបង្កលក្ខណៈនៅតាមអារាមសាសនានីមួយៗ ដើម្បីឱ្យបរិស័ទទាំងអស់បានចូលរួមអបអរសាទរឱ្យបានឱឡារិកអធិកអធម៕ អត្ថបទ សេក ឧត្តម