ព័ត៌មាន

មន្រ្តីបរិស្ថានខេត្ត អំពាវនាវឲ្យពលរដ្ឋត្រូវនាំគ្នាចូលរួមបង្កើនការដាំកូនឈើឲ្យបានច្រើន នៅក្នុងមូលដ្ឋានរបស់ខ្លួន

ឧត្តរមានជ័យ៖ លោក ផួង លីណា ប្រធានមន្ទីរបរិស្ថានខេត្តឧត្តរមានជ័យ បានអំពាវនាវដល់បងប្អូនប្រជាពលរដ្ឋគ្រប់មជ្ឈដ្ឋាន និងគ្រឹះស្ថានអបរំសិក្សា ព្រះសង្ឃ នៅតាមទីវត្តអារាម យុវជន អង្គការសង្គមស៊ីវិល រួមទាំងអាជ្ញាធរ មូលដ្ឋានទាំងអស់ ត្រូវនាំគ្នាបង្កើនការចូលរួមដាំកូនឈើឡើងវិញ ឲ្យបានច្រើនបន្ថែមទៀត ដើម្បីកែលម្អរសោភណ្ឌភាពបរិស្ថានប្រកបដោយពណ៌បៃតង និងដើម្បីជាជម្រកដ៏សំខាន់របស់សត្វព្រៃគ្រប់ប្រភេទរស់នៅ ។

លោកប្រធានមន្ទីរបរិស្ថានខេត្តឧត្តរមានជ័យ បានឲ្យដឹងថា ការដាំកូនឈើ គឺដើម្បីរួមគ្នាស្ដារគម្របព្រៃសហគមន៍ឡើងវិញ ក្នុងការបំពេញចន្លោះប្រហោងនៅចំណុចដែលបានរេចរឹលខ្វះខាតគ្មានដើមឈើ និងដើម្បីធ្វើឲ្យតំបន់មួយចំនួនដែលមានការខ្វះចន្លោះអាចមានកូនឈើដុះឡើងវិញ និងសម្រាប់ជួយដល់ការទ្រទ្រង់មនុស្ស សត្វ ជាពិសេសជួយកាត់បន្ថយនូវកំដៅផែនដី និងភាពរាំងស្ងួតផងដែរ។

លោកបន្តថា មន្ទីរបរិស្ថានខេត្តបានត្រៀម កូនឈើចំនួន ១០ ០០០ដើមផងដែរ នៅសួនបណ្តុះកូនឈើព្រៃសង្ឃរុក្ខាវន្ត ដើម្បីត្រៀមចែកជូនដល់បងប្អូនប្រជាពលរដ្ឋ ប្រារព្ធពិធីដាំនៅថ្ងៃទី ២៦កក្កដា ឆ្នាំ២០២៤ខាងមុខ នៅចំណុចបរិវេណសហគមន៍ដែនជម្រកសត្វព្រៃសង្ឃរុក្ខាវន្ត។

លោកបន្តថា កត្ដាទាំងអស់នេះហើយ គប្បីក្នុងនាមប្អូនៗជាយុវជនរួមទាំងព្រះសង្ឃ អង្គការសង្គមស៊ីវិលទាំងអស់ ដែលមានស្មារតីល្អ ក្នុងការចូលរួមយ៉ាងផុលផុសឲ្យចេះស្រលាញ់ធម្មជាតិ កត្ដាទាំងអស់នេះហើយ គឺផ្តើមចេញពីមនុស្សម្នាក់ ដើមឈើមួយដើម គឺជាការរួមចំណែកមួយយ៉ាងសំខាន់សំរាប់ពង្រឹងធនធានធម្មជាតិឲ្យកាន់តែសម្បូរបែបបន្ថែមទៀត៕