ឯកឧត្តម ឈាង រ៉ា ផ្ដល់អនុសាសន៍១០ចំណុចដល់មន្រ្តីនៃនាយកដ្ឋានសុខភាពផ្លូវចិត្ត និង​ការបំពានគ្រឿងញៀន

ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានជួបសំណេះ​សំណាល​ជា​មួយ​មន្រ្តី​នៃនាយកដ្ឋានសុខភាពផ្លូវចិត្ត និងការបំពានគ្រឿងញៀន ដោយមានការចូលរួមពីឯកឧត្តម រដ្ឋលេខាធិការទទួលបន្ទុក អនុរដ្ឋលេខាធិការ អគ្គនាយក លោក លោកស្រី អគ្គនាយករង ប្រធាន​នាយកដ្ឋាន អនុប្រធាននាយកដ្ឋាន ប្រធានការិយាល័យ និងអនុប្រធានការិយាល័យ, កាល​ពី​រសៀល​ថ្ងៃទី១១ ខែកក្កដា ឆ្នាំ២០២៤។

ឯកឧត្តមសាស្រ្តាចារ្យរដ្ឋមន្រ្តី បានបង្ហាញពីសារៈសំខាន់ និងអាទិភាពនៃសុខភាពផ្លូវចិត្ត សម្រាប់​ប្រជាជនគ្រប់ស្រទាប់ និង​បានជំរុញ​ឱ្យ​មាន​ការ​បញ្ជ្រាប​ការងារ​សុខ​ភាព​ផ្លូវ​ចិត្ត​ឱ្យ​ដល់​សហគមន៍​។ ទន្ទឹមនឹងនេះ ឯកឧត្តមសាស្រ្តាចារ្យរដ្ឋមន្រ្តី បានផ្ដល់អនុសាសន៍ ចំនួន១០ចំណុច ក្នុងនោះ​មាន៖ ១)ត្រូវខិតខំកៀរគរធនធានមនុស្ស និងមធ្យោបាយថែមទៀតកុំឱ្យមានការបែកខ្ញែក ២) ខិតខំ​ធ្វើការបណ្តុះបណ្តាលបន្ថែមទៀត ៣) ត្រូវគិតដល់ការថែទាំសុខភាពបឋម និងធ្វើ​យុទ្ធនាការ​ឱ្យ​បានទូលំទូលាយដល់សហគមន៍ ៤) ត្រូវបញ្ជ្រាប និងដាក់បញ្ចូល​ទៅ​ក្នុង​កម្ម​វិធី​សុខភាព​ផ្សេងៗទៀត ៥) ត្រូវខិតខំតាក់តែងគោលនយោបាយប្រកបដោយនវានុវត្តន៍ ៦) ត្រូវ​មាន​កិច្ចសហការជាមួយដៃគូឱ្យបានច្រើន រួមទាំងកិច្ច​សហការ​ក្នុង​ស្ថាប័ន​ឱ្យ​មាន​វិសាល​ភាព​កាន់​តែ​ទូលំ​ទូលាយ ៧) ត្រូវស្រង់ និងចងក្រងព័ត៌មាន និងការស្រាវជ្រាវពាក់ព័ន្ធនឹងសុខភាពផ្លូវចិត្ត ៨) ត្រូវគិតគូររៀបចំប្រព័ន្ធនៃការស្តារនីតិសម្បទា រួមទាំងការប្រើបច្ចេកវិជ្ជា ៩) ត្រូវធ្វើការ​វាយ​តម្លៃ​ស្ថានភាពឱ្យកាន់តែស៊ីជម្រៅ និងទូលំទូលាយ ១០) យកចិត្តទុកដាក់​កិច្ច​សហការ​ជាមួយ​ដៃ​គូ​ពាក់​ព័ន្ធ។

ក្នុងឱកាសនេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បាន​លើក​ទឹក​ចិត្ត​ឱ្យ​ខិតខំ​បំពេញការងារបន្ថែមទៀត និងក៏បានផ្តាំផ្ញើសួរសុខទុក្ខ ដល់មន្ត្រីសុខាភិបាល​ទាំង​អស់​ក្នុង​នាយកដ្ឋាន​៕

អត្ថបទ៖ រដ្ឋា