រដ្ឋមន្រ្តីយុត្តិធម៌៖ ឧក្រិដ្ឋជនឆបោកតាម Online ដែលចាប់បាននៅកម្ពុជា​ភាគច្រើន​ប្រើស៊ីមកាត​បរទេស

រដ្ឋមន្រ្តីក្រសួងយុត្តិធម៌កម្ពុជា បានបញ្ជាក់ថា ឧក្រិដ្ឋជនឆបោកតាមប្រព័ន្ធបច្ចេកវិទ្យា ដែល​បង្រ្កាប​បាន​នៅក​ម្ពុជាជាបន្តបន្ទាប់នាពេលកន្លងមកនោះ គឺភាគច្រើន បានប្រើប្រាស់​ប្រព័ន្ធ​អ៊ិន​ធើណែត​បរទេស ពោលគឺប្រើស៊ីមកាតបរទេស ដោយរកឃើញរហូតដល់រាប់ម៉ឺនស៊ីមឯណោះ។

នៅក្នុងសន្និសីទសារព័ត៌មាន អំពី «ច្បាប់ ស្តីពីការប្រឆាំងការឆបោកតាមប្រព័ន្ធបច្ចេកវិទ្យា» នា​ព្រឹក​ថ្ងៃទី៣ ខែមេសានេះ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បាន​បញ្ជាក់ថា​ កម្ពុជាក៏ដូចជាបណ្តាប្រទេសមួយចំនួនទៀតដែរ គឺត្រូវបានគេយក​ធ្វើ​ជា​ជង្រុក​សម្រាប់​ប្រព្រឹត្ត​អំពើ​ឧក្រិដ្ឋកម្មឆបោកតាមប្រព័ន្ធអនឡាញ ខណៈបទល្មើសនេះ បាន​ធ្វើឲ្យ​ប៉ះពាល់​ដល់​សន្តិសុខ ​និង​សេដ្ឋកិច្ចកម្ពុជាផងដែរ។ ប៉ុន្តែទោះជាយ៉ាងណា រាជរដ្ឋាភិបាល​បាន​នឹង​កំពុង​ខិតខំ​ធ្វើ​ការ​បង្រ្កាប​បទ​ល្មើសនេះឱ្យអស់ពីកម្ពុជា ដើម្បីធានាឱ្យបាននូវ​សន្តិសុខ​សុវត្ថិភាព​ដល់​សង្គម​ខ្មែរ​ទាំង​មូលរួមទាំងផ្តល់ទំនុកចិត្តដល់អ្នកទេសចរ និងអ្នកវិនិយោគ​បរទេស​មក​កម្ពុជា​យើង​ផង​ដែរ​។

ឯកឧត្តមរដ្ឋមន្រ្តីក្រសួងយុត្តិធម៌ បានលើកឡើងទៀតថា បញ្ហា Online Scams នេះ គឺ​មិន​មែន​កើ​តឡើងនៅតែកម្ពុជានោះទេ ពោលគឺកន្លែងណាដែលមានអ៊ីនធឺណិតកន្លែងនោះ គឺ​ពួកឧ​ក្រិដ្ឋ​ជន​​ទាំងនោះ​អាច​ធ្វើ​សកម្មភាពបានទាំងអស់។ ដោយឡែកសម្រាប់កម្ពុជាវិញ ពួក​ឧក្រិដ្ឋ​ជន​ឆបោក​តាម​ប្រព័ន្ធ​បច្ចេកវិទ្យា បានប្រើប្រាស់មធ្យោបាយផ្សេងៗជាច្រើន ជាពិសេស​ប្រើប្រព័ន្ធ​អ៊ីនធឺណិត​បរទេសធ្វើសកម្មភាពឆបោក។ តែយ៉ាងណាក៏ដោយកងកម្លាំងកម្ពុជា បានខិត​ខំ​ស្រាវ​ជ្រាវ​រក​ឃើញ​យកមកផ្តន្ទាទោសទៅតាមច្បាប់ឲ្យខាងតែបាន ដោយគ្មាន​ការ​លើក​លែង​នោះ​ឡើយ ​ហើយជនណាដែលជាប់ពាក់ព័ន្ធនឹងករណីនេះក៏នឹងមិនរួចខ្លួនដែរ ខណៈ​ពេល​នេះ​សំណាញ់​ច្បាប់​កម្ពុជា​មានក្រឡាញឹកជាងមុន ដូច្នេះបុគ្គលដែលឆបោក គឺមិនអាចរត់​រួច​ពីផ្លូវ​ច្បាប់​នោះ​ឡើយ​៕ អត្ថបទ៖ បាន ចក់