ជិតចូលឆ្នាំខ្មែរ ពលរដ្ឋអញ្ជើញសិល្បៈរបាំត្រុដិសម្តែងដើម្បីសុំសិរីសួស្ដី ផ្ដាច់ឆ្នាំចាស់ចូលឆ្នាំថ្មី

របាំត្រុដិ ជាសិល្បៈនៃកិច្ចបណ្ដេញឧបទ្រពចង្រៃ ចេញពីគេហដ្ឋាន និងការិយាល័យ ដើម្បី​សុំ​សិរី​សួស្ដី ​ផ្ដាច់ឆ្នាំចាស់ ផ្លាស់ចូលឆ្នាំថ្មី ដែលជាអត្តសញ្ញាណខ្មែរ មានការគាំទ្រច្រើនពីប្រជាពលរដ្ឋ។

លោក ភូ វន័យ សិល្បៈករផ្នែកបុរាណ និងជាគ្រូជំនួយនៅសាលាសិល្បៈជាតិ បានប្រាប់ BTV នៅ​ថ្ងៃ​ទី០៣ ខែមេសា ឆ្នាំ២០២៦នេះថា របាំត្រុដិ ដែលជាមរតក អត្តសញ្ញាណវប្បធម៌របស់ខ្មែរ មាន​ការ​គាំទ្រច្រើន ពីពលរដ្ឋទូទៅ ពីក្រសួងស្ថាប័នរដ្ឋ និងក្រុមហ៊ុនឯកជន។ សម្រា​ប់​ក្រុម​របស់​លោក ទទួលការកក់ តាំងតែពីដើមខែមករា មក ដែលមានរហូតដល់ថ្ងៃទី១៣ ខែមេសា។ លោក​ថា ​ការគាំទ្រច្រើនឡើងនេះ គឺជាការចូលរួមថែរក្សាមរតកវប្បធម៌ខ្មែរ។

ចំណែក អ្នកស្រី សាត សារិទ្ធ ប្រធានផ្នែកធនធានមនុស្ស នៅក្រុមហ៊ុនឯកជនមួយកន្លែង ស្ថិត​នៅ​ខណ្ឌ​ពោធិ៍សែនជ័យ រាជធានីភ្នំពេញ បានប្រាប់ដែរថា ក្រុមហ៊ុនរបស់អ្នកស្រី តែង​តែ​អញ្ជើញ​ក្រុម​សិល្បៈ​របាំត្រុតមកសម្ដែងជារៀងរាល់ឆ្នាំ ដើម្បីសុំសិរីសួស្ដីឆ្នាំថ្មីផង និងជាការ​អភិរក្ស​របាំ​ប្រពៃណី ​ដែលជាអត្តសញ្ញាណរបស់ខ្មែរផង។ ហើយម្យ៉ាងទៀត ក៏ជាការអនុវត្តន៍​តាម​អនុសាសន៍​របស់​ប្រមុខរាជរដ្ឋាភិបាល ក្នុងការថែរក្សាអភិរក្សសម្បត្តិវប្បធម៌ខ្មែរ។

សូមជម្រាប​ជូនថា របាំត្រុដិគឺជារបាំប្រជាប្រិយខ្មែរមួយប្រភេទ ដែលគេតែងតែសម្តែងក្នុងឱកាស បុណ្យ​ចូល​ឆ្នាំថ្មីប្រពៃណីជាតិ។

របាំត្រុដិមិន​ត្រឹមតែជាការសម្ដែង ទស្សនាកម្សាន្ដប៉ុណ្ណោះទេ ប៉ុន្ដែនេះ គឺជាសិល្បៈ នៃ​ការ​បន់​ស្រន់ ​សុំសេចក្ដីសុខ សិរីសួស្ដី ផ្ដាច់ឆ្នាំចាស់ផ្លាស់ឆ្នាំថ្មី។ តាមរយៈការសម្ដែង របាំត្រុត យើង​មិន​ត្រឹម​តែ​ឃើញ​នូវភាពសប្បាយរីករាយប៉ុណ្ណោះទេ ប៉ុន្ដែនោះ គឺជាការរំលឹកនូវអត្តសញ្ញាណជាតិ និង​ការ​តភ្ជាប់ស្មារតីសាមគ្គីភាព ក្នុងសហគមន៍ខ្មែរទាំងមូល មុននឹង​ឈាន​ចូល​ដល់​ចូល​ឆ្នាំ​ថ្មី​ប្រកប​ដោយ​ក្ដី​សង្ឃឹម​៕ អត្ថបទ ៖ លៀ ស៊ីណា