អភិបាលខណ្ឌដូនពេញ ណែនាំមន្ត្រីត្រូវចេះសាមគ្គីគ្នា ដើម្បីបម្រើ​ការងារ​ជូន​ប្រជាជន​ឱ្យ​កាន់តែប្រសើរ

ជាការដាស់តឿន ដ៏ដូចជាការបន្តក្រើនរំលឹក លោកជា ខេមា អភិបាលខណ្ឌដូនពេញ បាន​ណែនាំ​ដល់មន្ត្រីរដ្ឋបាល នៅក្រោមឱវាទទាំងអស់ ឱ្យបន្តរក្សាសាមគ្គីភាពផ្ទៃក្នុងឱ្យបានល្អ ដើម្បី​ចាប់​ដៃ​រួម​ការងារគ្នាបម្រើដល់ផលប្រយោជន៍ប្រជា និងសង្គមជាតិឱ្យបានប្រសើរ ។

ការណែនាំរបស់លោកអភិបាលខណ្ឌ ថ្លែងឡើង នាព្រឹកថ្ងៃទី១២ ខែកក្កដា ឆ្នាំ២០២៤នេះ ក្នុង​កិច្ចប្រជុំសម្រាប់រៀបចំរបាយការណ៍វឌ្ឍនភាព បញ្ហាប្រឈមក្នុងការអនុវត្តការងារកំណែ ទម្រង់​វិមជ្ឈការ និងវិសហមជ្ឈការ រយះពេល ៣ឆ្នាំ (ឆ្នាំ២០២១-២០២៣) និងឆមាសទី១ ឆ្នាំ២០២៤ របស់រដ្ឋបាលខណ្ឌដូនពេញ ។

កិច្ចប្រជុំខាងលើនេះដែរ ធ្វើឡើង ក្រោមវត្តមានដឹកនាំដោយលោក ហែម អាន ប្រធាន​ក្រុម​ប្រឹក្សា​ខណ្ឌ​ដូនពេញ ព្រមទាំងមានការចូលរួមពី សមាជិក-សមាជិកា ក្រុមប្រឹក្សាខណ្ឌដូនពេញ, គណៈ​អភិបាលខណ្ឌ, គណៈនាយករដ្ឋបាលខណ្ឌ, លោក ប្រធានការិយាល័យទាំង១១, លោក-លោក​ស្រី ​ចៅសង្កាត់ទាំង១១ និងលោក-លោកស្រីស្មៀនសង្កាត់ទាំង១១ ។

លោកជា ខេមា អភិបាលខណ្ឌ បានបន្ថែមថា ៖ កិច្ចការងារបម្រើប្រជាពលរដ្ឋ វាជា​អ្វី​ដែល​មន្ត្រី​អាជ្ញាធរ ត្រូវចាំបាច់មានទំនួសខុសត្រូវខ្ពស់ក្នុងការបំពេញជូនពួកគាត់ ។ ប៉ុន្តែវាក៏​ទាមទារ​ឱ្យ​មន្ត្រី​ទាំង​អស់ ទាំងថ្នាក់រដ្ឋបាលសង្កាត់ និងខណ្ឌ និងការិយាល័យចំណុះជំនាញពាក់ព័ន្ធ ត្រូវចេះ​សាមគ្គី​គ្នា​ឱ្យមានល្អ និងស្អិតរមួតជាមួយគ្នាបំផុត ទើបប្រសិទ្ធិភាព នៃការងារ អាច​ដំណើរ​ការ​ទៅ​បាន​ដោយ​រលូន មិនមានការរាំងស្ទះ ។

លោកអភិបាល បានណែនាំ ដល់មន្ត្រីឱ្យ​រូតរះ​បំពេញ​ឱ្យ​កិច្ច​ការងារ​ទាំង​ឡាយ​ណាដែ​ល​នៅ​សេស​សល់ ត្រូវធ្វើឱ្យបានរួចរាល់ ដើម្បីអាចមានលទ្ធិភាព និងពេលវេលាច្រើន ទៅធ្វើកិច្ច​ការងារ​ថ្មីៗ​ជា​ច្រើន​ទៀត ដែលត្រូវការឱ្យក្រុមមន្ត្រីទាំងអស់ត្រូវបំពេញជូនពលរដ្ឋ និងសង្គមជាតិជាចាំបាច់ ។

ក្នុងកិច្ចប្រជុំដដែលនាំ ប្រធានអង្គប្រជុំ ក៏បានណែនាំឱ្យ មន្ត្រីរបស់រដ្ឋបាលខណ្ឌ ត្រូវបន្តការ​យក​ចិត្ត​ទុកដាក់ឱ្យបានខ្ពស់ដដែល លើការផ្តល់សេវាសសាធារណះជូនប្រជាពលរដ្ឋតាមមូលដ្ឋាន ឱ្យ​មាន​ប្រសិទ្ធិភាព ព្រោះសេវាតម្រូវការឯកសារនេះ ជាអ្វីដែលប្រជាពលរដ្ឋត្រូវការជាចាំបាច់ ដើម្បី​យក​ទៅ​ប្រើប្រាស់តាមតម្រូវការផ្សេងៗរបស់ពួកគាត់រៀងៗខ្លួន ៕