ពលរដ្ឋ និងអាជ្ញាធរនៅស្រុកគៀនស្វាយ ត្រៀមចូលរួម​បើកការដ្ឋាន​ជីកព្រែកហ្វូណនតេជោ​ដើមខែក្រោយ

នៅសល់ប្រមាណតែ២០ថ្ងៃទៀតប៉ុណ្ណោះ ថ្ងៃបើកការដ្ឋានផ្លូវការគម្រោងព្រែកជីកហ្វូណនតេជោ នឹង​ឈានចូលមកដល់។ បណ្តាពលរដ្ឋ និងអាជ្ញាធរមូលដ្ឋាន ស្ថិតនៅស្រុកគៀនស្វាយ ខេត្ត​កណ្តាល បានបង្ហាញក្តីរំភើប នឹងត្រៀម​ចូលរួម​អបអរ​សាទរ​ដែល​មូលដ្ឋាន​ខ្លួនយក​ធ្វើ​ជា​ទីតាំង​បើក​ការដ្ឋានជីកព្រែកហ្វូណនតេជោ ហើយត្រៀមនឹងរៀបចំកម្មវិធីវាយស្គរ គោះជួង អបអរ​ការ​ជីក​ព្រែក​ដែលផ្តល់ឧត្តមប្រយោជន៍ សម្រាប់ប្រទេសជាតិទាំងមូលដ្ឋាន។

ពលរដ្ឋ និងអាជ្ញាធរមូលដ្ឋានឃុំសំរោងធំ ស្រុកគៀនស្វាយ ខេត្តកណ្តាល ថ្លែងប្រាប់BTV នៅ​ថ្ងៃ​ទី​១៥ ខែកក្កដានេះថា ពលរដ្ឋនៅមូលដ្ឋានឃុំសំរោងធំ ពិតជាមានមោទនភាពណាស់ ដែល​រាជ​រដ្ឋាភិបាល​ជ្រើសធ្វើជាទីតាំងធំបើកការដ្ឋានជីកព្រែកហ្វូណនតេជោ ហើយក៏មាន​ការ​សប្បាយ​ចិត្ត​ផង​ដែរ ដែលឃុំរបស់ខ្លួនមានព្រែកហ្វូណនតេជោ ជីកឆ្លងកាត់ ដែលនឹងផ្តល់​ប្រយោជន៍​ផ្នែក​សេដ្ឋកិច្ច កសិកម្ម ពាណិជ្ជកម្ម ទេសចរណ៍ ជូនពលរដ្ឋទៅថ្ងៃអនាគត។

សូមបញ្ជាក់ថា គម្រោងព្រែកជីកហ្វូណនតេជោ នឹងប្រកាសបើកការដ្ឋានជីកជាផ្លូវការ នៅ​ថ្ងៃ​ទី​១៥ ខែសីហា ឆ្នាំ២០២៤នេះ ដែលក្នុងគម្រោងការជីក មានប្រវែង១៨០គីឡូម៉ែត្រ ប្រើ​រយៈ​ពេល​ជីក​ចំនួន ៤ឆ្នាំ និងគ្រោងចំណាយថវិកាប្រមាណ ១ ៧០០ លានដុល្លារ ខណៈ​គម្រោង​ព្រែកជីក​នេះ​នឹងចូលរួមជំរុញសក្ដានុពលសេដ្ឋកិច្ច និងឯករាជលើ​វិស័យ​ដឹក​ជញ្ជូន​ផ្លូវ​ទឹក​របស់​កម្ពុ​ជា​នា​ពេលអនាគត៕

អត្ថបទ៖ ស៊ុម សុខជា