អាមរិក-កម្ពុជា កំពុងជួសជុលជណ្ដើរ៥ថ្នាក់ និងចម្លាក់តោនៅទិសខាងត្បូងនៃប្រាសាទភ្នំបាខែង

ក្រោមកិច្ចសហប្រតិបត្តិការរវាងអាជ្ញាធរជាតិអប្សរា ជាមួយអង្គការមូលនិធិប្រាសាទពិភពលោក (World Monument Fund) របស់សហរដ្ឋអាមេរិក កំពុង​ជួសជុល​រចនា​សម្ព័ន្ធ​ជណ្តើរ​ទាំង​៥​ថ្នាក់​ទិសខាងត្បូងនៃប្រាសាទភ្នំបាខែង មកដល់ពាក់ក​ណ្តាល​ឆ្នាំ​២០២៤នេះ។ ការ​ជួស​ជុល​សម្រេ​ចបានជណ្ដើរចំនួន៤ថ្នាក់ ចម្លាក់តោអមសងខាងជណ្តើរចំនួន៥ ហើយបន្ត​ជួស​ជុល​រចនា​សម្ព័ន្ធ​ជណ្ដើរ​ចំនួន១ថ្នាក់ទៀត។

លោក វ៉ាន វ៉ា ប្រធានការដ្ឋានជួសជុលនៅប្រាសាទភ្នំបាខែង នៃអាជ្ញាធរជាតិអប្សរា ឱ្យដឹងថា ការ​ងារជួសជុលកាំជណ្តើរចំនួន៥ថ្នាក់របស់ប្រាសាទភ្នំបាខែងទិសខាងត្បូងសម្រេចបាន៨០%ហើយ នៅ​សល់តែចំនួន១ថ្នាក់ទៀត ក្នុងចំណោមរចនាសម្ពន្ធជណ្តើរចំនួន៥ថ្នាក់ ដែលត្រូវ​នឹង​ប្រើ​ពេល​វេលា​ប្រមាណ​ជា​៥ខែទៀត។ ចំណែកចម្លាក់តោអមសងខាងជណ្តើរទិសខាងត្បូងនេះ ប្រធាន​ការដ្ឋាន​រូបនេះបញ្ជាក់ថា នៅសេសសល់តែតោចំនួន៥ ក្នុងចំណោមតោទាំង១២ ត្រូវបាន​ក្រុម​ការងារ​ជួសជុលរួចរាល់ហើយដែរ ព្រោះថាតោនីមួយៗខ្លះបាក់បែកផ្នែកជើងទម្រជើង ឬដងខ្លួន និង​ក្បាលជាដើម។ ចម្លាក់តោទាំងនោះ ក៏ធ្លាប់មាន​ការ​ជួស​ជុល​ម្តង​មក​ហើយ​នៅ​សម័យ​អាណា​ព្យាបាល​បារាំង។ ក្រៅពីនេះ គេឃើញមានបំណែកតោមួយចំនួនទៀត ដែលរងការខូចខាតធ្ងន់ធ្ងរ មិនអាចកំណត់អត្តសញ្ញាណ និងផ្គុំឡើងវិញបានទេ៕

អត្ថបទ៖ BTV NEWS