បេក្ខជនបេក្ខនារីជាង ១២០០០នាក់ ចូលរួមប្រឡងគ្រូបឋមសិក្សា​នៅថ្ងៃទី២ នៃ​ដំណើរការប្រឡងនេះ

ថ្ងៃទី១៥ ខែកក្កដា ឆ្នាំ២០២៤នេះ ជាថ្ងៃទី ២ នៃដំណើរ​ការ​រៀបចំ​ការ​ប្រឡង​ជ្រើស​រើស​គ្រូ​បឋម​សិក្សា លើវិញ្ញាសាសរសេរលើកទី១។ នៅថ្ងៃនេះ មានបេក្ខជនរហូតដល់ជាង ១២ ០០០នាក់ មក​ពីភូមិភាគខេត្ត បាត់ដំបង ចូលរួមប្រកួតប្រជែង។ ទីតាំងប្រឡង គឺធ្វើឡើ​ង​នៅ​សាកល​វិទ្យាល័យភូមិន្ទភ្នំពេញ។

ថ្ងៃទី២នេះ ជាការប្រឡងសម្រាប់បេក្ខជនមកពីភូមិភាគខេត្តបាត់ដំបង ដែលចំនួនរហូតដល់ជាង ១២ ០០០នាក់។ ភូមិភាគបាត់ដំបងនេះ សំដៅលើខេត្ត សៀមរាប ពោធិ៍សាត់ ប៉ៃលិន បាត់ដំបង បន្ទាយមានជ័យ និងខេត្តឧត្តរមានជ័យ។ ការប្រឡងលើវិញ្ញាសាសរសេរលើកទី១នេះ ប្រព្រឹត្តិទៅ​រយៈពេល ៤ថ្ងៃ ដោយធ្វើឡើងនៅថ្ងៃទី១៤ ថ្ងៃទី១៥ ថ្ងៃទី២០ និងថ្ងៃទី២១ ខែកក្កដា ឆ្នាំ២០២៤​។ ការប្រឡងមានបេក្ខជនចូលរួមសរុប រហូតដល់ ៣៨ ១៦៨នាក់ ដោយក្នុងនោះ​មាន​បេក្ខនារីរហូតដល់ ២៨ ៤៥៦នាក់។

ការប្រឡងជ្រើសរើសគ្រូបឋមសិក្សា ក៏រៀបចំដូចទៅនឹង​ការ​ប្រឡង​ជ្រើសរើស​គ្រូ​អនុវិទ្យាល័យ​ផងដែរ​។ ការប្រឡងធ្វើឡើងជា ពីរលើក ដោយការប្រឡងលើកទី១ ជាការប្រឡងសម្រាំង​យក​បេក្ខជន ដែលទទួលបានពិន្ទុខ្ពស់ ក្នុងរង្វង់ជាង ៤០០០នាក់ ជាចំនួន ៣ដង នៃចំនួន​គ្រូ​ជ្រើស​រើស ១៣៤៧នាក់។

ស្របពេលដែល បេក្ខជនចូលទៅក្នុងបន្ទប់ប្រឡង វត្តមានអាណាព្យាបាល ជាច្រើន ក៏បន្តអង្គុយ​រង់​ចាំ​លើកទឹកចិត្តកូន ពេលចេញពីប្រឡងផងដែរ។ ក្នុងនាមជាអាណាព្យាបាល ពួក​គាត់​សុខ​ចិត្ត​ចំណាយ​ថវិកា ឈប់សម្រាកពីការងារ បិទទ្វាផ្ទះ និងរៃអង្គាសថវិកាគ្នា ជួលរថយន្តជូន​កូន​មក​ប្រឡង​នៅ​ភ្នំពេញ។ ជាអាណាព្យាបាល ពួកគាត់សូមជូនពរឱ្យ កូនទទួលជោគជ័យ។ នេះជា​ការ​លើក​ឡើង​របស់ អាណាព្យាបាល ដែលអញ្ជើញមកពីខេត្ត សៀមរាប។

ក្រោយបញ្ចប់ដំណើរការប្រឡង ក្រសួងមុខងារសាធារណៈនឹងរៀបចំដំណើរការកំណែភ្លាមៗ។ ការ​ធ្វើកំណែនឹងធ្វើឡើងនៅថ្ងៃទី ២២ ខែ កក្កដា ខណៈការប្រឡងវិញ្ញាសាសរសេរលើកទី ១ ថ្ងៃចុង​ក្រោយប្រព្រឹត្តិទៅនៅថ្ងៃទី ២១ ខែកក្កដា។ ការធ្វើកំណែ តាមការគ្រោងមានរយៈពេល ១សប្ដាហ៍ ហើយការប្រឡងលើកទី ២ ជាការប្រឡងចុងក្រោយ អាចប្រព្រឹត្តិទៅនៅដើមខែ សីហា ឆ្នាំ ២០២៤។

ជាមួយគ្នានេះគណៈកម្មការរៀបចំការប្រឡង ក្រោមការដឹកនាំដោយក្រសួងមុខងារសាធារណៈ ដែល​មាន​ឯកឧត្តម ឧបនាយករដ្ឋមន្ត្រី ហ៊ុន ម៉ានី ជារដ្ឋមន្ត្រី បានរៀបចំការសម្រួលជាច្រើន ដើម្បី​ផ្ដល់​ភាពងាយស្រួលជូនបេក្ខជន ក៏ដូចជាអាណាព្យាបាលរបស់បេក្ខជន៕