កម្ពុជាគ្រប់គ្រង និងប្រើប្រាស់បំណុលសាធារណៈយ៉ាងមានប្រសិទ្ធភាព ខណៈភាគច្រើន​ជាកម្ចីសម្បទាន

មន្ត្រីជាន់ខ្ពស់កម្ពុជាបានថ្លែងថា ក្រោមការដឹកនាំប្រកបដោយចក្ខុវិស័យរបស់សម្តេចតេជោ ហ៊ុន សែន អតីត នាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រាជរដ្ឋាភិបាល​បានគ្រប់គ្រង និងប្រើប្រាស់បំណុលសាធារណៈយ៉ាងមានប្រសិទ្ធភាព ដែលក្នុង​នោះភាគ​ច្រើននៃកម្ចីដែលទទួលបានមានលក្ខណៈជាសម្បទាន និងត្រូវបានប្រើប្រាស់ សម្រាប់​អភិវឌ្ឍ​វិស័យអាទិភាព​ដោយចីរភាពដែលគាំទ្រដល់កំណើនសេដ្ឋកិច្ចរយៈ ពេលវែងប្រកប និង បង្កើនផលិតភាពសេដ្ឋកិច្ច។

ឯកឧត្តមទេសរដ្ឋមន្ត្រី លី ធុជ ប្រធានគណៈកម្មាធិការជាតិអេស្តាប់ ថ្លែងបញ្ជក់បែបនេះ ក្នុង​ឱកាសអញ្ជើញជាអធិបតី កិច្ចពិគ្រោះយោបល់គោលនយោបាយលើរបាយ ការណ៍សេដ្ឋកិច្ច សង្គមនៅក្នុងតំបន់អាស៊ី និងប៉ាស៊ីហ្វិក ឆ្នាំ២០២៤ ដែលរៀបចំដោយគណៈកម្មាធិការជាតិ​អេស្តាប់ និងគណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិករបស់អង្គការ​សហប្រជាជាតិ (UN-ESCAP)នៅថ្ងៃទី១៥ ខែ កក្កដា ឆ្នាំ២០២៤ នៅសណ្ឋាគារហ៊ីម៉ាវ៉ារី រាជធានីភ្នំពេញ។

ឯកឧត្តម លី ធុជ បញ្ជាក់ថា អស់រយៈពេលជាង ១១ ខែរាជរដ្ឋា ភិបាលបានដាក់ចេញ​នូវ​គំនិតផ្តួចផ្តើម​ជាច្រើនជាពិសេសលើវិស័យសុខាភិបាលការបណ្តុះបណ្តាលវិជ្ជាជីវៈ សុខុមាលភាពការងារ ការដោះស្រាយទំនាស់ សកម្មភាពអាកាស ធាតុ និងផ្សេងៗទៀត។ កត្តាសំខាន់រាជរដ្ឋាភិបាលកម្ពុជាបន្តប្តេជ្ញាថានឹង “មិនទុកនរណាម្នាក់ចោល” និងបន្តកិច្ចខិតខំប្រឹងប្រែងរបស់ខ្លួនដើម្បីជួយដល់ក្រុមដែលខ្វះខាត និងងាយរងគ្រោះដើម្បីធានាឱ្យប្រជាជនទាំងអស់ទទួលបានអត្ថប្រយោជន៍ពីវឌ្ឍនភាពឆ្ពោះទៅរកការសម្រេចបាននូវគោលដៅអភិវឌ្ឍន៍ប្រកបដោយចីរភាពកម្ពុជា។

ក្នុងឱកាសនោះឯកឧត្តមបានថ្លែងអំណរគុណចំពោះអង្គការសហប្រជាជាតិ ជាពិសេស UN- ESCAP និង កម្មវិធីអភិវឌ្ឍន៍សហប្រជា ជាតិ (UNDP) ដែលបានចូលរួមយ៉ាងសំខាន់ក្នុងការអភិ វឌ្ឍសេដ្ឋកិច្ច-សង្គម ការកសាងសន្តិភាពនិងស្ថិរភាព និងការការពារបរិស្ថាននៅកម្ពុជានោះ ប្រទេសកម្ពុជាក៍ប្តេជ្ញាបន្តកិច្ចសហប្រតិបត្តិការជាមួយ UN-ESCAP ដើម្បីផ្តល់ប្រយោជន៍ឲ្យប្រជាជនកម្ពុជា ខណៈដែលកម្ពុជាបាន និងកំពុងបន្តចូលរួមយ៉ាងសកម្មក្នុងកិច្ចប្រឹងប្រែងជាសកលក្នុងការដោះស្រាយបញ្ហាប្រឈមនិងគ្រោះថ្នាក់នានាដែលគំរាមកំហែងដល់សន្តិភាពសន្តិសុខរបៀបរបបអន្តរ ជាតិមួយដែលផ្អែកលើច្បាប់ និងការអភិវឌ្ឍប្រកបដោយចីរភាព៕

អត្ថបទ: ភារម្យ