វត្តអារាមនៅភ្នំពេញ និងខេត្តកណ្តាលត្រៀមជួបជុំធ្វើពិធីទូងស្គរអបអរការជីកព្រែកហ្វូណនតេជោ

នៅសល់ប្រមាណតែ១៩ ថ្ងៃទៀតប៉ុណ្ណោះ ថ្ងៃបើកការដ្ឋានផ្លូវការជីកព្រែកហ្វូណនតេជោ នឹង​ឈាន​ចូលមកដល់។ នាអំឡុងពេលនេះ បណ្តាវត្តអារាមមួយចំនួនខេត្តកណ្តាល និងរាជ​ធានី​ភ្នំពេញ បានត្រៀមខ្លួនរួចរាល់អស់ហើយ និងរងចាំថ្ងៃបើក​ការដ្ឋាន​ជីកព្រែក​ឈាន​ចូល​ដល់​ដើម្បី​ជួប​ជុំ​ព្រះសង្ឃ និងពុទ្ធបរិស័ទ ធ្វើពិធីសាសនា និងទូងស្គរ អបអរសាទរ​ការជីក​ព្រែកហ្វូណន​តេជោ។

ព្រះចៅអធិការ និងតំណាងព្រះចៅអធិការវត្តនៅរាជធានីភ្នំពេញ និងខេត្តកណ្តាល មាន​ថេរ​ដីកា​ឲ្យ​ BTV ដឹងនៅថ្ងៃទី១៦ ខែកក្កដានេះថា ដោយមានការអនុញ្ញាតិពីរាជរដ្ឋាភិបាល នៅថ្ងៃទី៥ ខែ​សីហានេះ តាមវត្តនឹងមានរៀបចំធ្វើការជួបជុំព្រះសង្ឈ និងប្រជាពុទ្ធបរិស័ទ ប្រារព្ធពិធីសាសនា និង​ធ្វើ​ការទូងស្គរ វាយជួង រគាំង អបអរសាទរ និងធ្វើ​ពិធី​សាសនា​បួង​សួង​សុំ​ការ​ជីក​ព្រែក​ហ្វូណន​តេជោ ដំណើរការរលូន និងជីកឲ្យហើយរួចរាល់តាមផែនការគ្រោងទុក ដើម្បីបាន​ជា​ប្រយោជន៍​ផ្នែក​សេដ្ឋកិច្ច កសិកម្ម ទេសចរណ៍ និងការចរាចរទំនិញខ្មែរចេញចូល នៅក្នុង​សង្គម​ខែ្មរ​ត​រៀងទៅគ្រប់ជំនាន់។

សូមបញ្ជាក់ថា ដើម្បីចូលរួម គាំទ្រ និងអបអរសាទរការបើកការដ្ឋានគម្រោងព្រែកហ្វូណនតេជោ នៅ​ថ្ងៃទី៥ ខែសីហា ឆ្នាំ២០២៤ ដែលនឹង​ក្លាយ​ជា​កេរ្តិ៍​មរតក​ប្រវត្តិសាស្រ្ត​សម្រាប់​កូន​ចៅ​ជំនាន់​ក្រោយ ក្រសួងធម្មការ និងសាសនា បានណែនាំមន្ទីរធម្មការ និងសាសនារាជធានីខេត្ត ត្រូវ​សហការ​ជា​មួយព្រះមេគណ ព្រះអនុគណ ព្រះចៅអធិការ និងមេដឹកនាំ​គ្រប់​សាសនា​រៀប​ចំ​វាយ​គង​ជួង​រគាំង ទូងស្គរ ទះប៉ោត គោះត្រដោក នៅក្នុងតាមទីវត្តអារាមឲ្យបានព្រមៗគ្នា នៅថ្ងៃទី៥ ខែ​សីហា ឆ្នាំ២០២៤ វេលាម៉ោង ៩និង៩នាទីព្រឹក៕

អត្ថបទ៖ ស៊ុម សុខជា