រដ្ឋបាលខណ្ឌដូនពេញចាប់ផ្តើមអនុវត្តយុទ្ធនាការ «ចាស់អ្នក ថ្មីខ្ញុំ» ក្នុងមូលដ្ឋាន ដើម្បីអាចឱ្យពលរដ្ឋចូលរួមបរិច្ចាគ

ភ្នំពេញ៖ រដ្ឋបាលខណ្ឌដូនពេញ បានចាប់ផ្តើមអនុវត្តយុទ្ធនាការ “ចាស់អ្នក ថ្មីខ្ញុំ”ដើម្បីទទួល​យក​របស់​របរមានដូចជា សំលៀកបំពាក់ ឬសម្ភារៈសិក្សា ដែលពលរដ្ឋសិស្សនិស្សិតទូទៅ ឈប់​ប្រើ​ប្រាស់​តែនៅមានគុណភាពល្អ និងមានតម្លៃ សម្រាប់យកទៅកែច្នៃឱ្យក្លាយជារបស់របរថ្មី មាន​ប្រយោជន៍សម្រាប់អ្នកដែលត្រូវការ ។

ជាក់ស្ដែងនៅព្រឹកថ្ងៃទី១៦ ខែកក្កដា ឆ្នាំ២០២៤ ថ្នាក់ដឹកនាំ និងមន្រ្តីរាជការ នៃរដ្ឋបាល​ខណ្ឌ​ដូន​ពេញ រាជធានីភ្នំពេញ បាននាំយកសំលៀកបំពាក់ និងរបស់ប្រើប្រាស់មួយចំនួនចូលរួមបរិច្ចាគ ក្នុង​យុទ្ធនាការ “ចាស់អ្នក ថ្មីខ្ញុំ” ។

លោក ជា ខេមា អភិបាលនៃគណៈអភិបាលខណ្ឌដូនពេញ បានអំពាវនាវសូមអញ្ជើញពុកម៉ែ បងប្អូន​ប្រជាពលរដ្ឋទាំងអស់គ្នា ចូលរួមបរិច្ចាគ ដើម្បីចូលរួមយុទ្ធនាការនេះ ។ រដ្ឋបាល​ខណ្ឌ​ដូន​ពេញ នឹងបន្តចែករំលែក របស់របរសម្ភារទាំងនេះទៅអ្នកដែលត្រូវការ។

ប្រជាពលរដ្ឋ សិស្សនិស្សិត បានបង្ហាញការគាំទ្រ និងពេញចិត្តចូលរួមចំណែក ក្នុងការផ្តល់​ជា​សម្ភា​រៈ​ដែ​លពួកគាត់គិតថាឈប់ប្រើប្រាស់ យកទៅដាក់ក្នុង​ធុង​តាម​ទីតាំង​ដែល​អាជ្ញាធរ​តាម​តំបន់​បាន​កំណត់ ។ ក្រុមនិស្សិត បន្ថែមថា ៖ « ចាស់អ្នក ថ្មីខ្ញុំ » គឺជាកម្មវិធីដ៏ល្អ សម្រាប់ឱ្យ​ប្រជាពលរដ្ឋ​ទាំង​អស់ និងគ្រប់ស្រទាប់វណ្ណៈ អាចចូលរួមចំណែក​ជាមួយ​សកម្មភាព​សប្បុរស​សង្គម​មនុស្ស និងសង្គមជាតិទាំងមូលផងដែរ ។

យុទ្ធនាការនេះ គឺជាអនុវត្តតាមគំនិតផ្ដួចផ្ដើម និងដឹកនាំ​ប្រកប​ដោយគតិបណ្ឌិត​ដោយ​លោក​ជំទាវ​បណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា ដែល​បាន​ចាប់​អនុវត្តតាំងពីថ្ងៃទី១២ រហូតដល់ថ្ងៃទី៣១ ខែកក្កដា ឆ្នាំ២០២៤ ។

គួរបញ្ជាក់ថាជនរួមជាតិទាំងអស់ ក៏អាចចូលរួមបរិច្ចាគទៅកាន់ទីតាំង ផ្ទះលេខ ៥អេ ផ្លូវលេខ ១៣៤ សង្កាត់មិត្តភាព ខណ្ឌ៧មករា រាជធានីភ្នំពេញឬលេខទំនាក់ទំនង៖ 096 646 4574 / 093 858 893៕

អត្ថបទ៖ កុម្ភះ