ឯកឧត្តម ហ៊ុន ម៉ានី ប្រគល់ថវិកាមនុស្សធម៌ជូនមន្ទីរពេទ្យកុមារជាតិ ចំនួន២៨០លានរៀល

ភ្នំពេញ ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញចូលរួមជាអធិបតីក្នុងកម្មពិធីប្រគល់ថវិកាមនុស្សធម៌ជូនមន្ទីរពេទ្យកុមារជាតិ ចំនួន២៨០លានរៀល ដែលថវិកាទាំងអស់ទទួលបានពីការលក់សំបុត្រទស្សនាការប្រកួតពានរង្វាន់បាល់ទាត់ ដើម្បីសប្បុរសធម៌នៅមន្ទីរពេទ្យកុមារជាតិ, កាលពីរសៀលថ្ងៃទី១៥ ខែកក្កដា ឆ្នាំ២០២៤។

​ពិធីប្រគល់ថវិកាមនុស្សធម៌ជូនមន្ទីរពេទ្យកុមារជាតិនេះ អញ្ជើញមានវត្តមាននាឱកាសនោះរួមមានទាំងវត្តមានរបស់ឯកឧត្តមវេជ្ជបណ្ឌិត ញឹប អង្គាបុស្ស នាយកមនី្ទរពេទ្យកុមារជាតិ រួមទាំងក្រុមគ្រូពេទ្យ ឯកឧត្តម លោកជំទាវ សមាជិកគណៈកម្មាធិកាអចិន្ត្រៃយ៍ ស.ស.យ.ក. និងក្រុមការងាររៀបចំការប្រកួតពាន់រង្វាន់បាល់ទាត់ Soccer League។

ឯកឧត្តមវេជ្ជបណ្ឌិត ញឹប អង្គាបុស្ស នាយកមនី្ទរពេទ្យកុមារជាតិ បានធ្វើរបាយការណ៍អំពីវឌ្ឍនភាពរបស់មនី្ទរពេទ្យ ចាប់តាំងថ្ងៃបង្កើតដំបូង រហូតមកដល់បច្ចុប្បន្ន និងស្ថានភាពរបស់កុមារ ដែលមានជំងឺមកទទួលសេវាពិនិត្យ ព្យាបាល និងសម្រាកក្នុងមនី្ទរពេទ្យកុមារជាតិ។

នាឱកាសនោះ ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយ ដែលបានដឹកនាំ សមាជិក សមាជិកា ដើម្បីមកប្រគល់ថវិកាជូនមន្ទីរពេទ្យកុមារជាតិនាឱកាសនោះ។ ទន្ទឹមនឹងនោះ ឯកឧត្តម បានកោតសសើរ និងថ្លែងអំណរគុណដល់គណៈកម្មាការរៀបចំការប្រកួតបាល់ទាត់ពានរង្វាន់ Soccer League ដែលដឹកនាំដោយឯកឧត្តមអភិសន្តិបណ្ឌិត ស សុខា ដែលបានធ្វើការលក់សំបុត្រទស្សនាការប្រកួតពានរង្វាន់បាល់ទាត់ និងកៀរគរសប្បុរសជន ដើម្បីប្រមូលថវិកាជូនមន្ទីរពេទ្យកុមារជាតិ ក្នុងគោលបំណងជួយសម្រួលបន្ទុកមួយចំនួនដល់មន្ទីរពេទ្យ និងកុមារ។

គួរបញ្ជាក់ផងដែរថា ការប្រកួតបាល់ទាត់ដើម្បីសប្បុរសនេះ គឺជាជាគំនិតផ្តួចផ្តើមដ៏ថ្លៃថ្លារបស់ក្រុមគ្រួសារ ស.ស.យ.ក. មានគោលបំណងក្នុងការប្រមូលថវិកាពីការលក់សំបុត្រមកជួយឧបត្តម្ភជូនមន្ទីរពេទ្យដែលត្រូវជួយសង្រ្គោះកុមារ។ ការប្រកួតបាល់ទាត់សប្បុរសបានបញ្ចប់ទៅដោយរលូន ដោយមានចូលរួមជួយជ្រោមជ្រែង និងគាំទ្រពីសំណាក់សប្បុរសជន ក្រុមហ៊ុនឯកជន កីឡាករ កីឡាការិនី តារាចម្រៀង តារាសម្តែង និងសមាជិក សមាជិកា ស.ស.យ.ក. ជាច្រើននាក់ផងដែរ៕