វិហារអ៊ីស្លាមនៅខេត្តកណ្តាល និងកំពង់ស្ពឺនឹងធ្វើពិ​ធី​ជួបជុំ​អបអរ​ថ្ងៃ​បើកការដ្ឋានព្រែកជីកហ្វូណនតេជោ

នៅសល់ប្រមាណតែ១៨ ថ្ងៃទៀតប៉ុណ្ណោះថ្ងៃបើកការដ្ឋានផ្លូវការជីកព្រែកហ្វូតេជោ នឹង​ឈាន​ចូល​មក​ដល់។ នៅក្នុងឱកាសថ្ងៃបើកការដ្ឋាននោះដែរ បណ្តាវិហាឥស្លាមទាំងអស់នៅខេត្តកណ្តាល និង​ខេត្តកំពង់ស្ពឺ ក៏ដូចបណ្តាវត្តអារ៉ាមនានាដែរ នឹងរៀបចំពិ​ធី​ជួប​​ជុំ​ធំ​ធ្វើការ​បួង​សួង​ចាក់​មេក្រូ​បន្លឺ​សំឡេង​ដើម្បីធ្វើការគាំទ្រអបអរសាទរ និងបួងសួងឲ្យការជីកព្រែកហ្វូណនតេជោដំណើរការលូន និង​សម្រេចតាមផែនការគ្រោងទុក។

លោក ស៊ូ សេន គណៈមេគណអ៊ីស្លាមខេត្តកណ្តាល ឬហៅគណៈអ៊ីម៉ាំខេត្តកណ្តាល និង​តំណាង​មេ​គណៈអ៊ីស្លាមមកពីខេត្តកំពង់ស្ពឺ ថ្លែងប្រាប់ BTV នៅថ្ងៃទី១៧ ខែកក្កដានេះថា ដោយមាន​ការ​អនុញ្ញាត​ពីរាជរដ្ឋាភិបាលនៅថ្ងៃទី៥ ខែសីហា ឆ្នាំ២០២៤នេះ បណ្តាសាសនិក​អ៊ីស្លាម​នឹង​ធ្វើ​ការ​ជួបជុំ​គ្នា​តាមបណ្តាព្រះវិហារអ៊ីស្លាមទាំង២១ទីតាំងនៅទូទាំងខេត្តកណ្តាល និងព្រះវិហារ​អ៊ីស្លាម​ចំនួន​២​ទីតាំងនៅខេត្តកំពង់ស្ពឺ ដើម្បីអបអរសាទរ​ការ​បើកការដ្ឋាន​ជា​ផ្លូវ​ការ​ការ​ជីក​ព្រែក​ហ្វូណនតេជោ និងបួងសួងសុំសេចក្តីសុខចម្រើន។

សូមបញ្ជាក់ថា ដើម្បីចូលរួមគាំទ្រ និងអបអរសាទរការបើកការដ្ឋានគម្រោង​ព្រែកហ្វូណន​តេជោ​នៅ​ថ្ងៃ​ទី៥ ខែសីហា ឆ្នាំ២០២៤ ក្រសួងធម្មការ និងសាសនា បានណែនាំមន្ទីរធម្មការ និង​សាសនា​រាជធានីខេត្ត ត្រូវសហការជាមួយព្រះមេគណ ព្រះអនុគណ ព្រះចៅអធិការ និងមេ​ដឹកនាំ​គ្រប់​សាសនារៀបចំវាយគង ជួង រគាំង ទូងស្គរ ទះប៉ោត គោះត្រដោក ដោយបន្លឺ​ជា​សំឡេង​ឲ្យបានកងរំពងនៅក្នុងតាមទីវត្តអារាមសាសនា ដូចជា វត្ត មណ្ឌលវិបស្សនា អាស្រម សាលា​បុណ្យ វិហាសាសនា ស្នាក់ការស៊ូរ៉ាវឲ្យបានព្រមៗគ្នា នៅថ្ងៃទី៥ ខែសីហា ឆ្នាំ២០២៤ វេលា​ម៉ោង ៩ និង០៩នាទីព្រឹក៕

អត្ថបទ៖ ស៊ុម សុខជា