សិស្សានុសិស្សគាំទ្រគម្រោងព្រែកជីកហ្វូនណនតេជោ និងចាត់ទុកជា​សមិទ្ធផល​ប្រវត្តិសាស្ត្រ​ថ្មី​របស់កម្ពុជា

ខណៈគម្រោងព្រែកជីកហ្វូនណនតេជោ នឹងចាប់ផ្ដើមបើកការដ្ឋានសាងសង់នៅថ្ងៃទី៥ ខែសីហា ឆ្នាំ២០២៤ខាងមុខនេះ។ គម្រោងព្រែកជីកនេះ​ជា​គម្រោង​ទទួល​បាន​ការ​សាទរ​ពី​ប្រជាជាតិ​គ្រប់​មជ្ឈដ្ឋាន ក្នុងនោះសិស្សានុសិស្សក៏បានបង្ហាញការសាទរ គាំទ្រ និងចាត់ទុកថា​គម្រោង​ព្រែក​ជីក​ហ្វូណន​តេជោ ជាសមិទ្ធផលប្រវត្តិសាស្ត្រថ្មីមួយទៀតសម្រាប់ប្រទេសកម្ពុជា។

គម្រោងព្រែកជីកហ្វូណនតេជោ ជាគម្រោងប្រព័ន្ធដឹកជញ្ជូនផ្លូវទឹកដ៏ធំសម្រាប់កម្ពុជា ដែល​បាន​ផ្ដួច​ផ្ដើម​ឡើង​ដោយសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដី និងជា​ប្រធាន​ព្រឹទ្ធសភានៃកម្ពុជា។ ដើម្បីឱ្យគម្រោងព្រែកជីកនេះសម្រេចទៅបាន រាជរដ្ឋាភិបាល​អាណត្តិទី​៧ ក្រោមការដឹកនាំ ដោយ សម្ដេចធិបតី ហ៊ុន ម៉ាណែត បានប្រកាស​រួចមក​ហើយ​ដោយ​កំណត់​យកថ្ងៃទី៥ ខែសីហា ឆ្នាំ២០២៤ ជាការចាប់ផ្ដើម​បើកការដ្ឋាន​សាងសង់​ព្រែក​ជីក​ហ្វូណន​តេជោ។

មុនថ្ងៃបើកការដ្ឋានសាងសង់ព្រែកជីកហ្វូណនតេជោ ចូលមកដល់ប្រជាពលរដ្ឋ​កម្ពុជា​គ្រប់​មជ្ឈ​ដ្ឋាន​បាន​បង្ហាញនូវការសាទរ និងគាំទ្រជាខ្លាំងលើគម្រោងមួយនេះ។ ចំណែកសិស្សា​នុសិស្ស​ក៏​បាន​បង្ហាញ​ការ​មើលឃើញថា ព្រែកជីកហ្វូណនតេជោនេះដែរ ដែលនឹងក្លាយជា​សមិទ្ធផល​ថ្មី​ជា​ប្រវត្តិសាស្ត្រ​ស​ម្រាប់កម្ពុជា។ ពួកគេថា​ព្រែក​ជីកហ្វូណន​តេជោ​ជា​គម្រោង​ដែល​នឹង​ផ្ដល់​ជា​អត្ថ​ប្រយោជន៍​ជា​ច្រើនជួយជំរុញដល់កំណើនសេដ្ឋកិច្ចជាតិ។

សូមជម្រាបថា នៅថ្ងៃទី ៥ ខែសីហា ខាងមុខនេះ សម្ដេចធិបតី ហ៊ុន ម៉ាណែត នាយករដ្ឋ​មន្ត្រី​កម្ពុជា នឹងអញ្ជើញជាអធិបតីពិធីបើកការដ្ឋានសាងសង់ ព្រែកជីកហ្វូណនតេជោដោយផ្ទាល់។ ការ​បើក​ការដ្ឋាន គឺនឹងធ្វើឡើងនៅ ភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្ដាល។ ព្រែក​ជីកនេះឆ្លងកាត់ខេត្តកណ្ដាល តាកែវ កំពត និងខេត្តកែប ដោយមាន​ទីតាំង​ចាប់​ពី​ព្រែក​តាកែវ ឆ្លងកាត់ព្រែកតាឯក ចូលតាមព្រែកតាហ៊ីង និងបន្តរហូតដល់សមុទ្រខេត្តកែប។

ព្រែក​ជីក​នេះ មានទទឹងខាងលើ ១០០ម៉ែត្រ ទទឹងខាងក្រោម ៨០ម៉ែត្រ និងជម្រៅ ៥,៤ម៉ែត្រ។ ព្រែក​ជីកហ្វូណនតេជោ នេះមានសន្ទះផ្លូវនាវាចរណ៍មាន ០៣កន្លែង ស្ពាន ១១កន្លែង ផ្លូវអម​សង​ខាង​ប្រវែងសរុបប្រមាណ ២០៨គីឡូម៉ែត្រ។ ព្រែកជីកហ្វូណន នឹងក្លាយជាប្រព័ន្ធ​ដឹក​ជញ្ជូន​ថ្មី ដ៏សំខាន់ សម្រាប់កម្ពុជា ក្នុងការដឹកជញ្ជូនទំនិញចេញ ចូល របស់កម្ពុជា និងបណ្ដា​ប្រទេ​ស​ដទៃ​ទៀត​៕

អត្ថបទ៖ គឹម ហុក