អភិបាលខេត្តឧត្តរមានជ័យ ចុះសួរសុខទុក្ខកងកម្លាំងឈរជើងតាមព្រំដែនកម្ពុជា-ថៃ នៅចំណុចប្រាសាទតាក្របី និងប្រាសាទតាមាន់

ឧត្តរមានជ័យ៖ ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ នៅរសៀលថ្ងៃទី១៦កក្កដាឆ្នាំ២០២៤ ម្សិលមិញនេះ បានចុះសួរសុខទុក្ខបងប្អូនកងកម្លាំង ​តាមខ្សែ​បន្ទាត់ព្រំដែន​នៃ​ចំណុចប្រាសាទតាក្របី ប្រាសាទតាមាន់ និងតំបន់ច្រកជប់គគី ដែលកំពុងឈរជើងប្រចាំការ ការពារបូរណភាពទឹកដី នៃខេត្តឧត្តរមានជ័យ។

ក្នុងឱកាសនោះឯកឧត្តម មាន ចាន់យ៉ាដា បានផ្តាំផ្ញើការសាកសួរសុខទុក្ខដោយ​ក្តី​នឹករលឹកពី​សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ​និងលោកជំទាវបណ្ឌិត ដែលជា​និច្ចជាកាល​តែង​គិតគូរ​យកចិត្តទុកដាក់ជាប់ជានិច្ច​ពី​សុខទុក្ខ និងជីវភាពរស់នៅរបស់បងប្អូនកងកម្លាំង​ប្រដាប់​អាវុធរបស់យើង និយាយដោយឡែកកងកម្លាំងប្រដាប់អាវុធដែលកំពុងឈរជើង​ការពារ​តាមបន្ទាត់ព្រំដែន កម្ពុជា-ថៃ និងក្រុមគ្រួសារផងដែរ។

ឯកឧត្តម មាន ចាន់យ៉ាដា បានបញ្ជាក់ថា ប្រាសាទតាមាន់ ​និងប្រាសាទតាក្របី គឺជា​កេរ្តិ៍ដំណែល​របស់ដូនតាយើង​បានបន្សល់ទុកសម្រាប់កូន ​ចៅជំនាន់ក្រោយ ​នៅលើទឹកដីនៃខេត្តឧត្តរមានជ័យ ពោពេញដោយ​បារមី​តេជៈពូកែខ្លាំងខ្លា​ ដូច្នេះសូម​កម្លាំងដែលឈរជើងតាម​តំបន់​ទាំងនោះ ត្រូវមានជំនឿ និងធ្វើការកោរព​បូជាឲ្យបានល្អប្រសើរ ដើម្បីទទួលបានសេចក្តីសុខគ្រប់ៗគ្នា។

នាឱកាសនោះ ឯកឧត្តមអភិបាលខេត្ត បានអំពាវនាវ និង​គោរព​អញ្ជើញដល់បងប្អូន​ប្រជាពលរដ្ឋ​នៅ​គ្រប់មជ្ឈដ្ឋាន​សូមមកទស្សនា​ប្រាសាទដែលជាកេរ្តិ៍តំណែលដូនតាយើង​ ដែលបានបន្សល់ទុក ​ឲ្យបានច្រើនកុះករ។ ឯកឧត្តមគ្រោង​នឹងរៀបចំ​ឲ្យ​មាន​អ្នក​មគ្គុទ្ទេសក៍​ផងដែរ ​ដើម្បីរង់ចាំជូន​ដល់​បងប្អូន​ចូលរួម​ទស្សនា​ប្រាសាទតាមាន់​ និងប្រាសាទតាក្របី ​ដោយឥតគិតថ្លៃ។

ក្នុងនាមរដ្ឋបាលខេត្តឧត្តរមានជ័យឯកឧត្តមមាន ចាន់យ៉ាដា បានថ្លែង​នូវការ​គោរព​ដឹងគុណ និង​កោតសរសើរដោយស្មោះអស់ពីដួងចិត្ត ​ជូនចំពោះកងកម្លាំងប្រដាប់​អាវុធគ្រប់ប្រភេទ ដែល​បានលះបង់សាច់ស្រស់​ឈាមស្រស់ ​ក្នុងបុព្វហេតុ​ការពារទឹកដី នៅតាមខ្សែបន្ទាត់ព្រំដែន និងលើកទឹកចិត្តជូនចំពោះកងកម្លាំងគ្រប់ពេលវេលា​ ក្នុងការការពារទឹកដីតាមខ្សែ​បន្ទាត់​ព្រំដែនផងដែរ៕