មនី្ទរវប្បធម៌ និងវិចិត្រសិល្បៈខេត្តព្រះវិហារ ធ្វើតេស្តរកសារធាតុញៀន ចំពោះថ្នាក់ដឹកនាំ មន្ត្រីរាជការទាំងអស់

ភ្នំពេញ ៖ មន្ទីរវប្បធម៌ និងវិចិត្រសិល្បៈខេត្តព្រះវិហារ នៃក្រសួងវប្បធម៌ និងវិចិត្រសិល្បៈ បានធ្វើតេស្តរកសារធាតុញៀនជូនមន្រ្តីរាជការ និងមន្រ្តីជាប់កិច្ចសន្យា ដែលបម្រើការងារក្នុងមនី្ទរវប្បធម៌ខេត្ត នាព្រឹកថ្ងៃទី១៧ ខែកក្កដា ឆ្នាំ២០២៤នេះ។

​ការធ្វើតេស្តរកសារធាតុញៀនជូនមន្រ្តីរាជការ និងមន្រ្តីជាប់កិច្ចសន្យានេះ ក្រោមវត្តមានលោក នៅ ចាន់គង់ ប្រធានមនី្ទរវប្បធម៌ និងវិចិត្រសិល្បៈខេត្តព្រះវិហារ និងមានការចូលរួមពីលោកវរសេនីយ៍ឯក ស៊ុន ចលនា នាយការិយាល័យប្រឆាំងគ្រឿងញៀន និងមន្រ្តីជំនាញ មកពីស្នងការដ្ឋាននគរបាលខេត្តព្រះវិហារ។

ថ្លែងក្នុងឱកាសធ្វើតេស្តរកសារធាតុញៀន លោក នៅ ចាន់គង់ ប្រធានមនី្ទរវប្បធម៌ និងវិចិត្រសិល្បៈខេត្តព្រះវិហារ បានមានប្រសាសន៍ថា ការធ្វើតេស្តរកសារធាតុញៀន របស់ថ្នាក់ដឹកនាំ មន្រី្តរាជការ និងមន្រ្តីជាប់កិច្ចសន្យា ដើម្បីអនុវត្តតាមបទបញ្ជាលេខ ០១ បប ចុះថ្ងៃទី២០ ខែកុម្ភៈ ឆ្នាំ២០២៤ របស់រាជរដ្ឋាភិបាលកម្ពុជា ស្តីពីការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។ ក្នុងគោលបំណងលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អ ក្នុងស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិ ក្នុងការងារប្រយុទ្ធប្រឆាំងគ្រឿងញៀនខុសច្បាប់។ បទបញ្ជាលេខ០១ បប គឺជាការអនុវត្តគោលការណ៍ដឹកនាំ «សម្អាតផ្ទះយើង» របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា ដើម្បីឲ្យក្រសួង ស្ថាប័ន ពង្រឹងគុណភាពធនធានមនុស្ស ប្រកបដោយភាពស្អាតស្អំ និងភាពជាគំរូ នៃការអនុវត្តច្បាប់ ដែលបទបញ្ហានេះ ត្រូវបានទទួលការគាំទ្រយ៉ាងពេញទំហឹងពីប្រជាពលរដ្ឋ និងមហាជនទូទៅ ទាំងក្នុង និងក្រៅប្រទេស។

សូមបញ្ជាក់ផងដែរថា ថ្នាក់ដឹកនាំ មន្រ្តីរាជការ និងមន្រ្តីជាប់កិច្ចសន្យា ដែលបម្រើការងារក្នុងមនី្ទរវប្បធម៌ខេត្ត ចំនួន 22នាក់ ស្រី08នាក់, មន្រ្តីជាប់កិច្ចសន្យា ចំនួន 65នាក់ ស្រី 12នាក់ សរុបចំនួន 87នាក់ បានមកចូលរួមធ្វើតេស្តរកសារធាតុញៀន ជាលទ្ធផលមិនបានរកឃើញសារធាតុញៀនឡើយ៕

អត្ថបទ៖ រដ្ឋា