ព័ត៌មាន

ឧបនាយករដ្ឋមន្រ្តី ហ៊ុន ម៉ានី ផ្ញើសារជូនពរក្រុមរុករកឧទ្ធម្ភាគចក្រដែលបាត់នៅខេត្តពោធិ៍សាត់ឲ្យទទួលបានជោគជ័យឆាប់ៗ

ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ឯកឧត្តម ហ៊ុន ម៉ានី បានផ្ញើសារជូនពរដល់កងកម្លាំងយោធិនដែលកំពុងធ្វើការរុករក នូវឧទ្ធម្ភាគចក្រដែលបានបាត់នៅជួរភ្នំក្រវាញនាពេលកន្លងទៅថ្មីៗឲ្យទទួលបានជោគជ័យនាពេលឆាប់ដ៏ខ្លីខាងមុខនេះ ខណៈក្រុមប្រតិបត្តិការរុករកបានឈានដល់ថ្ងៃទី៦ហើយនៅតែពុំទាន់មានតម្រុញណាមួយជាក់លាក់នោះ។

តាមរយៈបណ្តាញសង្គមហ្វេសបុក នាយប់ថ្ងៃទី១៧ ខែ កក្កដា ឆ្នាំ២០២៤នេះ ឯកឧត្តមឧប នាយករដ្ឋមន្រ្តី ហ៊ុន ម៉ានី បានលើកឡើងថា «រយៈពេល៥ថ្ងៃហើយ ដែលឧទ្ធម្ភាគចក្រមួយគ្រឿងបានបាត់ដានទាក់ទងនៅតំបន់ជួរភ្នំក្រវាញ ខណៈពេលកំពុងហ្វឹកហ្វឺនការហោះហើរ។ ក្នុងនាមជាប្រជាជនខ្មែរមួយរូប ខ្ញុំពិតជាមានក្តីបារម្ភ ព្រមទាំងបាន និងកំពុងតាមដានយ៉ាងយកចិត្តទុកដាក់លើករណីនេះ»។

ឯកឧត្តមបានបន្ថែមទៀតថា«ខ្ញុំសូមយកឱកាសនេះ ចូលរួមជាមួយប្រជាជនកម្ពុជា ផ្ញើសារសាកសួរសុខទុក្ខជូនដល់កម្លាំងចម្រុះនៃកងយោធពលខេមរភូមិន្ទ និងអ្នកដែលពាក់ព័ន្ធទំាងអស់ ដែលកំពុងប្រឹងប្រែងបំពេញបេសកកម្មរុករកឧទ្ធម្ភាគចក្រមួយគ្រឿងនេះ ហើយសូមចូលរួមជាមួយគ្នា ក្នុងស្មារតីនៃប្រតិបត្តិការរុករកពីចម្ងាយ»។

តាមរយៈបណ្តាញសង្គមហ្វេសបុកនេះដែរ ឯកឧត្តម ហ៊ុន ម៉ានី ក៏បានចូលរួមលើកទឹកចិត្ត និង សូមផ្តាំផ្ញើរដល់កងកម្លាំងទាំងអស់ សូមមានការប្រុងប្រយ័ត្នខ្ពស់ ខណៈអាកាសធាតុ និងស្ថានភាពភូមិសាស្ត្រនៅតំបន់នោះ កំពុងមានការលំបាក និងស្មុគស្មាញ និងសូមជូនពរឱ្យបេសកកម្មនេះទទួលបានជោគជ័យក្នុងពេលដ៏ខ្លីខាងមុខផងដែរ។

សូមបញ្ជាក់ថាឧទ្ធម្ភាគចក្រមួយគ្រឿងប្រភេទZ-9 បានបាត់ចេញពីរាដា( ធ្លាក់) នៅតំបន់ភ្នំជួរក្រវាញរវាងព្រំប្រទល់ខេត្តពោធិសាត់ និងខេត្តកោះកុងកាលពីព្រឹកថ្ងៃទី១២ ខែកក្កដា ឆ្នាំ២០២៤ កន្លងទៅនេះ ខណៈកំពុងធ្វើការហ្វឹកហ្វឺន(រៀនបើកបរ)។ បើតាមការអះអាងរបស់នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជាបានបញ្ជាក់ថា ការធ្លាក់នេះគឺកើតចេញពីអាកាសធាតុមិនអំណោយផល។

រហូតដល់ព្រឹកថ្ងៃទី១៨ ខែកក្កដា ឆ្នាំ២០២៤នេះ ក្រុមប្រតិបត្តិការរុករកពុំទាន់ឃើញពន្លឺណាមួយកំណត់គោលដៅរកឃើញកន្លែងឧបទ្វវហេតុនៅឡើយនោះទេ ខណៈក្រុមប្រតិបត្តិករ បានកំពុងរករក យ៉ាងស្វិតស្វាញ បើទោះបីជាអាកាសធាតុអាប់អួរយ៉ាងណាក៏ដោយនោះ៕