អាជ្ញាធរតាមសង្កាត់ត្រៀមបន្លឺសំឡេងជាមួយពលរដ្ឋអបអរថ្ងៃបើកការដ្ឋានព្រែកជីកហ្វូណនតេជោ

អាជ្ញាធរតាមសង្កាត់ ក្នុងរាជធានីភ្នំពេញ ត្រៀមបន្លឺសំឡេងជាមួយប្រជាពលរដ្ឋមូលដ្ឋានរបស់ខ្លួន ដើម្បីអបអរសាទរជាមួយថ្ងៃបើកការដ្ឋានគម្រោងព្រែកជីកហ្វូណនតេជោនៅទីតាំងសាលាសង្កាត់។

ស្របពេលពិធីបើកការដ្ឋានគម្រោងព្រែកជីកហ្វូណនតេជោនៅសល់រយៈពេលតែ១៧ថ្ងៃទៀតប៉ុណ្ណោះ បណ្តារាជធានី-ខេត្តមួយចំនួនចាប់ផ្តើមណែនាំដល់អាជ្ញាធរដែនដីក្នុងមូលដ្ឋាន​ចូលរួម​មាន​សកម្មភាពអបអរសាទរថ្ងៃបើកការដ្ឋានគម្រោងព្រែកជីកហ្វូណនតេជោ។

លោកស្រី ឡុង ផល្លី ចៅសង្កាត់មិត្តភាព ខណ្ឌ៧មករា រាជធានីភ្នំពេញ បានប្រាប់ BTV ឱ្យដឹង​នៅ​ថ្ងៃទី១៨ ខែកក្កដា ឆ្នាំ២០២៤ថា ក្នុងនាមអាជ្ញាធរមូលដ្ឋានបានត្រៀមលក្ខណៈរួចរាល់ ក្នុងការ​អញ្ជើញ​បង​ប្អូនប្រជាពលរដ្ឋក្នុងមូលដ្ឋានរបស់ខ្លួនមកចូលរួមឱ្យបានផុលផុស ដើម្បីអបអរសាទរ​ប្រទេស​កម្ពុជា​ទទួលបានគម្រោងជាប្រវត្តិសាស្ត្រដែលមិនធ្លាប់មានពីមុនមក។

លោកស្រី បញ្ជាក់ថា តាមការគ្រោងទុកអាជ្ញាធរ​នឹង​រៀបចំ​ការ​ជួបជុំ​ជាមួយ​ប្រជាពលរដ្ឋ​អបអរ​សាទរ​ថ្ងៃ​បើកការដ្ឋានគម្រោងព្រែកជីកហ្វូណនតេជោ​នេះ​ដោយ​មាន​ការត្រៀម​ជា​បដា​នូវ​សារ​គាំទ្រ និងទង់ជាតិនៃព្រះរាជាណាចក្រកម្ពុជាជាដើម ដើម្បីបង្ហាញថាប្រជាពលរដ្ឋគ្រប់មជ្ឈដ្ឋា​ន​ទាំងអស់​គាំទ្រ​គម្រោងព្រែកជីកហ្វូណនតេជោ។

ជាមួយគ្នានេះ ប្រជាពលរដ្ឋរស់នៅក្នុងមូលដ្ឋាននោះ លើកឡើងថា ពួកគាត់នឹងចូលរួម​អបអរ​សាទរ​ជាមួយ​រាជរដ្ឋាភិបាល ក៏ដូចជាប្រជាពលរដ្ឋនៅតាមមូលដ្ឋានផ្សេងទៀត ដើម្បីបង្ហាញ​ពី​ទឹក​ចិត្ត និងការគាំទ្រដល់ថ្ងៃបើកដំណើរការគម្រោងព្រែកជីកហ្វូណនតេជោ។

សូមជម្រាបថា គម្រោងព្រែកជីកហ្វូណនតេជោ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីប្រកាសពិធីបើកការដ្ឋាននៅថ្ងៃទី៥ ខែសីហា ឆ្នាំ២០២៤ខាងមុខនេះ។ គម្រោង​នេះ​ត្រូវ​បានមជ្ឈដ្ឋានក្នុង និងក្រៅប្រទេសបន្តគាំទ្រយ៉ាងពេញទំហឹង ដើម្បីឱ្យគម្រោង​នេះ​ក្លាយ​ជា​ផ្លូវ​នាវា​ចរណ៍ និងប្រព័ន្ធភស្ដុភារកម្មទន្លេបាសាក់ ដោយតភ្ជាប់​ផ្លូវ​ទឹក​រវាង​ទន្លេ​ទៅ​កាន់​សមុទ្រ​កម្ពុជា ឆ្លងកាត់ខេត្តកណ្តាល តាកែវ កំពត និងខេត្តកែប និងមានប្រវែង១៨០គីឡូម៉ែត្រ ខណៈ​គម្រោងគ្រោងចំណាយទុនសាងសង់ប្រមាណ ១,៧០០លានដុល្លារអាមេរិក៕

អត្ថបទ៖ សេក ឧត្តម