សហជីព-កម្មករជូនពរថ្នាក់ដឹកនាំ និងអ្នកបំពេញ​ការងារ​គម្រោងព្រែក​ជីកហ្វូនណនតេជោ​ឱ្យដំណើរការល្អប្រសើរ

ខណៈនៅថ្ងៃទី៥ ខែសីហាខាងមុខនេះ គម្រោងព្រែកជីកហ្វូណនតេជោ នឹង​បើក​ការដ្ឋាន​ដើម្បី​សាងសង់ សហជីព កម្មករ និងកម្មការនីរោងចក្រកាត់ដេរ បានបង្ហាញទឹកមុខសប្បាយរីករាយ និង​សម្តែងការការអបអរសាទរ ជូនពរចំពោះថ្នាក់ដឹកនាំ ក៏ដូចជា​ក្រុម​ការងារ​ដែល​ត្រូវ​បំពេញ​បេសកម្ម​នេះ​ឲ្យប្រព្រឹត្តទៅដោយរលូន និងជោគជ័យគ្រប់ភារកិច្ច។

ជួបសម្ភាសន៍រវាងព័ត៌មាន ប៊ីធីវី នៅព្រឹកថ្ងៃទី១៩ ខែកក្កដានេះលោក ផាត់ ហ៊ុន សហជីព​កម្ម​ករ​កម្ពុជា​ (CLUF) បាននិយាយថាដោយសារថ្ងៃប្រកាស​បើកការដ្ឋាន​ផ្លូវការ​ព្រែកជីក​ហ្វូណនតេជោ​ចំថ្ងៃ​កម្ម​ករនិយោជិតធ្វើការងារ ដោយខក​ខានមិនបានចូលរួមអបអរសាទរដោយផ្ទាល់ តាមរយៈ​ការ​ជួបជុំ​ធ្វើពិធីទូងស្គរ និងវាយជួងជាដើម ប៉ុន្តែរូបលោកក៏ដូចជាកម្មករ កម្មការិនី​ជា​ច្រើន​នាក់​ផ្សេងទៀ​ត​ពិតជាសប្បាយចិត្តនិងគាំទ្រ ១០០% ព្រោះបានបង្ហាញពីចលនាជាតិ និង​ការ​សាមគ្គី​ភាព​​របស់​ជនរួមជាតិទាំងមូលទៅលើគម្រោងព្រែកជីកជាប្រវត្តិសាស្រ្តដ៏សំខាន់នេះ។

ទាក់ទិនគម្រោងព្រែកជីកនេះដែរ កម្មករ កម្មការនីរោងចក្រផលិតស្បែកជើង ស្ថិត​នៅស​ង្កាត់​កាកាប​២ ខណ្ឌពោធិ៍សែនជ័យ រាជធានីភ្នំពេញបាន​បង្ហាញ​ការ​គាំទ្រ​យ៉ាង​ពេញ​ទំហឹង​ចំពោះ​ការ​អនុវត្ត​គម្រោង​ព្រែកជីកហ្វូណនតេជោ ហើយរំពឹងទៀតថា ក្រោមការដឹកនាំរបស់​រាជ​រដ្ឋាភិបាល​កម្ពុជា ក្រោមគោលនិយោបាយរបស់គណបក្សប្រជាជន នឹងដឹកនាំ​ប្រទេស​រីកចម្រើន​ទៅ​មុខ​បន្ថែម​ទៀត​ជាពិសេសទាក់ទាញអ្នកវិនិយោគកាន់​តែច្រើន​ឲ្យ​មក​បណ្តាក់​ទុន​បើក​រោង​ចក្រថែម​ទៀត ដើម្បីផ្តល់ឱកាសការងារជូនប្រជាពលរដ្ឋគ្រប់ទិសទី និងមានប្រាក់ចំណូលទៀងទាត់។

ដើម្បីជាការអបអរសាទរ ការបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ ខែសីហា ឆ្នាំ​២០២៤ ខាងមុខនេះ រាជរដ្ឋាភិបាលកម្ពុជា បានចេញសារាចរណែនាំដល់សាធារណជន ក្រសួង ស្ថាប័ន ទាំងថ្នាក់ជាតិ និងថ្នាក់ក្រោមជាតិទាំងអស់ ចូលរួមឲ្យបានកុះករ និងអធិកអធម តាមរយៈ​ការទូងស្គរ វាយគង ជួង រគាំង ទះប៉ោត និងគោះត្រដោក តាមគ្រប់មធ្យោបាយ នៅ​វេលា​ម៉ោង ៩:០៩នាទីព្រឹក៕

អត្ថបទ: ឈិត បូរ៉ាវី