រដ្ឋបាលខេត្តកណ្តាល នឹងរៀបចំប្រគំតន្ត្រីអបអរសាទរការបើកការដ្ឋានព្រែកជីកហ្វូណនតេជោ

នៅថ្ងៃទី៥ ខែសីហាខាងមុខនេះ រដ្ឋបាលខេត្តកណ្តាលគ្រោងនឹងរៀបចំការប្រគំតន្ត្រីធំ អបអរសាទរការបើកការដ្ឋានផ្លូវការអនុវត្តគម្រោងព្រែកជីកហ្វូណនតេជោ នៅសួនច្បារមាត់ទន្លេបាសាក់ ក្រុងតាខ្មៅ ខណៈបច្ចុប្បន្នរដ្ឋបាលខេត្តកណ្ដាល បានរៀបចំដាក់តាំងបង្ហាញផ្ទាំងប៉ាណូ គាំទ្រគម្រោងព្រែកជីកហ្វូណនតេជោ នៅតាមបណ្ដោយផ្លូវសំខាន់ៗមួយចំនួនផងដែរ។

លោក ជៀម ខូយ ប្រធានក្រុមប្រឹក្សាសង្កាត់តាខ្មៅ ថ្លែងប្រាប់ BTV នៅថ្ងៃទី១៩ ខែកក្កដានេះថា មកដល់ពេលនេះ ក្រុមការងារសង្កាត់តាខ្មៅ បានទទួលការណែនាំរួចហើយ ពីថ្នាក់ដឹកនាំរដ្ឋបាលខេត្តកណ្តាល ឲ្យរៀបចំសម្អាតបរិស្ថាន រៀបចំសណ្តាប់ធ្នាប់ បញ្ចៀស ការលក់ដូរ នៅបរិវេណច្រមុះជ្រូកសួនច្បារមាត់ទន្លេបាសាក់ក្រុងតាខ្មៅ ដើម្បីយកទីតាំងនោះរៀបចំពិធីជួបជុំ និងការប្រគំតន្ត្រីធំមួយ ដើម្បីអបអរសាទរការបើកការដ្ឋានការព្រែកជីកហ្វូណនតេជោនៅថ្ងៃទី៥ ខែសីហា ឆ្នាំ២០២៤ខាងមុខនេះ។

លោកបន្តថា នៅក្នុងពិធីប្រគំតន្ត្រីអបអរសាទរការបើកការដ្ឋានព្រែកជីកហ្វូណនតេជោ នេះនឹងមានមន្ត្រីគ្រប់ជាន់ខ្ពស់ថ្នាក់ និងប្រជាពលរដ្ឋចូលរួមប្រមាណជាង៥០០០នាក់។ លោកបន្ថែមថា ដើម្បីចូលរួមអបអរសាទរថ្ងៃជាប្រវត្តិសាស្ត្រ បើកការដ្ឋានផ្លូវការ​ព្រែកជី​កហ្វូណន​តេជោ​នេះដែរ រដ្ឋបាលសាលាសង្កាត់ ​បានចុះណែនាំពលរដ្ឋតាមខ្នងផ្ទះ តាមផ្សារ សាលារៀន វត្តអារាម ​និងមូលដ្ឋានអាជីវកម្មនានាឱ្យរៀបចំពិធីទូងស្គរ វាយជួង រគាំង ត្រដោក ​និងធុងជាដើម ដើម្បីបន្លឺជាសំឡេងអបអរសាទរថ្ងៃបើកការដ្ឋានព្រែកជីកហ្វូណនតេជោ នៅវេលាម៉ោង៩ និង៩នាទីព្រឹកថ្ងៃទី៥ ខែសីហានេះផងដែរ៕