ក្រសួងមុខងារសាធារណៈចាប់ផ្ដើមកែសម្រាំងយកបេក្ខជនជាង ៤០០០នាក់ ប្រឡងគ្រូបឋមលើកចុងក្រោយ

ក្រសួងមុខងារសាធារណៈនៅព្រឹកថ្ងៃទី២២ ខែកក្កដា ឆ្នាំ២០២៤នេះ បានចាប់​ផ្ដើម​ធ្វើ​កំណែ​លើ​សន្លឹក​កិច្ចការប្រឡងគ្រូបឋមសិក្សា លើវិញ្ញាសាសរសេរលើកទី១។ ការធ្វើកំណែនេះ គឺសម្រាំង​យក​​បេក្ខជនដែលមានពិន្ទុខ្ពស់ ដើម្បីចូលរួមប្រឡងលើកចុងក្រោយ ដែលចំនួន​អ្នក​ជាប់​កំណត់​យក​ត្រឹមតែ ១ ៣៤៧ នាក់ប៉ុណ្ណោះ។

ក្រោយបញ្ចប់ការប្រឡង រយៈពេល៤ថ្ងៃ លើវិញ្ញាសាសរសេរលើកទី១ ក្រសួង​មុខងារ​សាធារណៈ​បាន​ចាប់​ផ្ដើមធ្វើកំណែលើសន្លឹកកិច្ចការបេក្ខជនភ្លាមៗ ដោយចាប់ផ្ដើមនៅព្រឹកថ្ងៃទី២២ ខែ​កក្កដា​នេះ។ ការធ្វើកំណែ ធ្វើឡើងក្រោមវត្តមានឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រី​ក្រសួង​មុខងារសាធារណៈ និងមានវត្តមានមន្ត្រីអង្គភាពប្រឆាំងអំពើពុករលួយ រួមទាំងអ្នក​សង្កេតការណ៍​ផងដែរ។

ការធ្វើកំណែលើវិញ្ញាសាសរសេរលើកទី១ ជាការកែដើម្បីសម្រាំងយកបេក្ខជនដែលមានពិន្ទុខ្ពស់ ដើម្បី​ចូលរួមការប្រឡងជ្រើសរើសគ្រូបឋមសិក្សាលើកចុងក្រោយ។ ចំនួនជ្រើសរើស គឺជាង ៤ ០០០​នាក់ ដើម្បីចូលរួមប្រឡងលើកចុងក្រោយ ដែលនឹងសម្រេចយកត្រឹមតែ ១ ៣៤៧នាក់​ប៉ុណ្ណោះ​។ នេះជាការលើកឡើងរបស់ ឯកឧត្តម ង៉ឺយ ធឿន សមាជិកគណមេប្រយោគ។

ឯកឧត្តម លើកឡើងដែរថា ការធ្វើកំណែនឹងបញ្ចប់នៅក្នុងសប្ដាហ៍នេះ។ ក្រសួង​នឹង​ប្រកាស​លទ្ធផល​ ដើម្បីផ្ដល់ពេលវេលាគ្រប់គ្រាន់សម្រាប់បេក្ខជនអាចត្រៀមខ្លួន ប្រឡងលើកចុងក្រោយ។ ការ​ប្រឡង​អាចធ្វើឡើងនៅក្នុងសប្ដាហ៍ទី២ នៃខែ សីហា។

ក្នុងនាមជាសមាជិកគណៈមេប្រយោគ ឯកឧត្តមលើកឡើងបន្ថែមថា ការប្រឡង​លើក​ចុង​ក្រោយ​គឺ​ផ្តោត​លើ​មុខ​វិជ្ជាគោលទាំងពីរ គឺភាសាខ្មែរ និងគណិតវិទ្យា។ វិញ្ញាសា ជាសំណួរចម្លើយ ពុំមែន​ជា​វិញ្ញាសាបែបជ្រើសរើសចម្លើយទៀតនោះទេ។

សូមជម្រាបថា ការប្រឡងជ្រើសរើសគ្រូបឋមសិក្សានេះ គឺកំណត់យកតាមប្រព័ន្ធបណ្ដុះបណ្ដាល ១២+៤ ចំនួន ៣០០នាក់ និងប្រព័ន្ធបណ្ដុះបណ្ដាល ១២+ ២ចំនួន ១ ០៤៧នាក់។ គួរ​បញ្ជាក់​ថា ការប្រឡងគ្រូបឋមសិក្សាលើវិញ្ញាសាសរសេរលើកទី ១ គឺមានបេក្ខជនចូលរួមសរុប ៣៨ ១៦៨នាក់៕ 

អត្ថបទ: គឹម ហុក