រដ្ឋមន្រ្តីក្រសួងបរិស្ថាន ចូលរួមដាំកូនឈើ១៥០០០ដើម នៅដែនជម្រកសត្វព្រៃសង្ឃរុក្ខាវន្ត

ឧត្តរមានជ័យ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាថ្ងៃព្រឹកទី២៥ ខែកក្កដា ឆ្នាំ២០២៤នេះ បានអញ្ជើញជាអធិបតី ក្នុងពិធីដាំកូនឈើចំនួន១៥០០០ដើម លើផ្ទៃដី៣ហិកតា នៅចំណុចបរិវេណដែនជម្រកសត្វព្រៃសង្ឃរុក្ខាវន្ត ស្ថិតនៅភូមិថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ព្រមទាំងមានការចូលរួមពីមន្ទីរស្ថាប័នអង្គភាពជុំវិញខេត្ត ប្រជាពលរដ្ឋ និងសិស្សានុសិស្សយ៉ាងច្រើនកុះករ ។

ក្នុងឱកាសនោះឯកឧត្តមបណ្ឌិត អ៊ាង សុផល្លែត បានថ្លែងកោតសរសើរ និងវាយតម្លៃខ្ពស់ ចំពោះ​ការខិតខំ​ប្រឹងប្រែង​ការងារកន្លងមក ​របស់មន្រ្តីបរិស្ថាន​ខេត្តឧត្តរមានជ័យ ដែលជានិច្ចកាល​តែងតែពុះពារជំនះរាល់​ឧបសគ្គ​ក្នុងការ​ការពារ​ទប់ស្កាត់​ប្រឆាំងរាល់បទល្មើសនានា​ក្នុងដែនព្រៃឈើ​សហគមន៍​ក្នុងភូមិសាស្រ្តខេត្តឧត្តរមានជ័យ។ ក្នុងនោះបានបំផុសស្មារតីដល់ មន្ទីរស្ថាប័ន គ្រឹះស្ថាន​អប់រំ អង្គការសង្គមស៊ីវិល អង្គការក្រៅរដ្ឋាភិបាល ព្រះសង្ឃ អាជ្ញាធរមូលដ្ឋាន សិស្សានុសិស្ស និងប្រជាពលរដ្ឋ បានចូលរួមយ៉ាង​ផុសផល​​ក្នុងការដាំកូនឈើឡើងវិញ ​ដើម្បីធ្វើឲ្យសហគមន៍​យើង​ទទួលបានបរិស្ថានល្អប្រកបដោយពណ៌បៃតងស្រស់បំព្រងផងដែរ។

យ៉ាងណាម៉ិញ​ឯកឧត្តមបណ្ឌិត អ៊ាង សុផល្លែត បានណែនាំ​ដល់​គ្រប់មន្ទីរស្ថាប័នទាំងអស់ ពិសេស​អាជ្ញាធរមូលដ្ឋាន និង​ប្រជាសហគមន៍​ឲ្យចេះ​ស្រលាញ់​ធនធាន​ធម្មជាតិ និង​នាំគ្នាចូលរួម​ដាំ​បន្ត​ទៀត​ឲ្យ​បានកាន់តែច្រើន​នៅគ្រប់ទីកន្លែង ដើម្បី​ស្តារ​គម្រប​ព្រៃឈើ និងអភិរក្សព្រៃឈើ​ឲ្យកាន់តែសំបូរឡើងវិញ​នៅគ្រប់ទីកន្លែងដែល​ខ្វះ​ចន្លោះ។ ពិសេសនោះក្មួយៗ​សិស្សានុសិស្ស​ត្រូវចូលរួម​ដាំនៅតាមសាលារៀន និងនៅតាមខ្នងផ្ទះ ដោយសិស្សម្នាក់​ដើមឈើមួយដើម ក្នុងមួយឆ្នាំ​យើង​អាច​ដាំ​ឲ្យបាន​មួយ​ម៉ឺន​ដើមផងដែរ៕

អត្ថបទ៖ BTV NEWS