សម្ដេចតេជោ និងប្រធានគណៈប្រចាំការគណៈលេខាធិការមជ្ឈឹមបក្សកុម្មុយនិស្តវៀតណាម បន្តយកចិត្តទុកដាក់ និងសាមគ្គីភាពបង្កើតនូវការចងចាំនៃមិត្តភាព និងការតស៊ូពីអតីតកាល

នៅល្ងាចថ្ងៃទី២៥ ខែកក្កដា ឆ្នាំ២០២៤ ដដែលនេះ ឯកឧត្តម លឿង គឿង ប្រធាន​គណៈ​ប្រចាំការ​នៃ​គណៈលេខាធិការមជ្ឈឹមបក្សកុម្មុយនិស្តវៀតណាម ក៏បានទទួល​សម្ដែង​ការ​គួរសម​ចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និង​ជា​ប្រធានគណបក្សប្រជាជនកម្ពុជា និងបានទទួលស្វាគមន៍អាហារពេលល្ងាចជាមិត្តភាព។

ក្នុងកិច្ចសំណេះសំណាលនេះ ភាគីទាំងពីរក៏បានឯកភាពគ្នាខ្ពស់ ចំពោះគុណតម្លៃដែល ឯក​ឧត្តម​ ង្វៀន ហ្វូជុង គឺជាមនុស្សគំរូរបស់ប្រជាជនវៀតណាម ហើយក៏ជាការចងចាំមួយ នៃ​តម្លៃ​របស់​លោក​ក្នុង​ការដឹកនាំគណបក្ស ប្រជាជន និងរដ្ឋវៀតណាមឲ្យមានកិត្តិយសដ៏ឧត្តុង្គឧត្តម ។

ភាគីទាំងពីរ ក៏បានពិភាក្សាគ្នាដោយបន្តយកចិត្តទុកដាក់ និងសាមគ្គីភាព ហើយនឹង​បង្កើតនូវ​ការ​ចងចាំ​នៃ​មិត្តភាព និងការតស៊ូពីអតីតកាល ហើយក៏ដូចគ្នា ក្នុងការប្រឹងប្រែង​បង្កើន​កិច្ច​សហ​ប្រតិបត្តិការ​ឲ្យ​កាន់តែល្អថែមទៀត ពីមួយឆ្នាំទៅមួយឆ្នាំ និងបន្តពីស្នាដៃរបស់ ឯកឧត្តម វេនភូជុង ។

ភាគីទាំងពីរ ក៏បានផ្ដល់តម្លៃខ្ពស់ទៅដល់កិច្ចសហប្រតិបត្តិការ ដើម្បី​ផ្ដល់​ផល​ប្រយោជន៍​គ្នា​ទៅ​វិញ​ទៅ​មក ដោយការរីកចម្រើនរបស់វៀតណាម ក៏ដូចជាការរីកចម្រើនរបស់កម្ពុជា ហើយបន្ត​បំពេ​ញ​គ្នា​នូវ​ការរីកចម្រើននេះ និងការជួយគ្នាទៅវិញទៅមកឱ្យបានល្អ។

ឯកឧត្តម លឿង កឿង ក៏បាន ឯកភាពទទួលយកនូវការអញ្ជើញរបស់សម្ដេចតេជោ នៅពេល​ខាង​មុខ ដើម្បីទស្សនកិច្ច បង្កើននូវជំនឿជឿជាក់មិត្តភាព និងប្រពៃណី​ដ៏​ល្អស​ម្រាប់​ការ​ផ្លាស់​ប្ដូរ​គណៈ​ប្រតិភូ​​ទៅវិញទៅមក ក្នុងគំនិតជាន់ខ្ពស់ និងកម្រិតគណបក្សទាំងពីរ៕

អត្ថបទ៖ BTV NEWS