ប្រាក់រៀលបានរក្សាស្ថិរភាពល្អប្រសើរ តែមិនទាន់កាត់បន្ថយកម្រិតដុល្លារូបនីយកម្មបាននៅឡើយ

ភ្នំពេញ ៖ ប្រាក់រៀលបានរក្សាស្ថិរភាពល្អប្រសើរ នៅក្នុងរយៈពេលប្រមាណ ២ ទសវត្សរ៍ចុងក្រោយនេះ តែបានត្រឹមជួយទប់ស្កាត់ដុល្លា-រូបនីយកម្មមិនឱ្យកើនឡើងប៉ុណ្ណោះ ដោយមិនទាន់អាចបន្ថយកម្រិតដុល្លារូបនីយកម្មនៅកម្ពុជាបាននៅឡើយ។

​ឯកឧត្តម យឹម លាភ ទេសាភិបាលរងធនាគារជាតិនកម្ពុជា លើកឡើងនៅក្នុងសិក្ខាសាលាផ្សព្វផ្សាយស្ដីពី “ប្រាក់រៀល ប្រព័ន្ធ បាគង និងខេអេចហ្សូអរ”នៅខេត្តព្រៃវែង ថ្ងៃទី៣០ ខែកក្កដា ឆ្នាំ២០២៤ នេះថា ជុំវិញប្រាក់ដុល្លារនេះ នៅដើមទសវត្សរ៍ឆ្នាំ ១៩៩០ កម្ពុជាបានបោះឆ្នោតសកលជាលើកដំបូង ក្រោមការរៀបចំរបស់ អ៊ុនតាក់ ដែលនាពេលនោះ អ៊ុនតាក់បានចំណាយក្នុងប្រតិបត្តិការ របស់ខ្លួន ដោយផ្ទាល់ជាដុល្លារអាមេរិកយ៉ាងច្រើន។ គួបផ្សំនឹងការហូរចូលនៃជំនួបពាណិជ្ជកម្ម ការវិនិយោគ និងទេសចរបរទេស បាន នាំយកប្រាក់ដុល្លារអាមេរិក មកប្រើដោយផ្ទាល់បន្ថែមទៀត និងបានធ្វើឱ្យកម្ពុជាប្រើប្រាស់ប្រាក់ដុល្លារអាមេរិកយ៉ាងទូលំទូលាយ រហូតដល់បច្ចុប្បន្ន។

ឯកឧត្តម បន្តថា ការប្រើប្រាស់ប្រាក់ដុល្លារអាមេរិកនៅកម្ពុជា គឺជាទម្លាប់មួយដែលបានចាក់ឫសយ៉ាងជ្រៅ ចាប់តាំងពីការ មកដល់របស់អ៊ុនតាក់ ដែលបាននាំមកនូវថវិកានៃគម្រោងចំនួន ១.៧ ពាន់លានដុល្លារអាមេរិក មកកម្ពុជា ក្នុងអំឡុងទស្សវត្សរ៍ ៩០ ខណៈពេលដែលជំនឿចិត្តលើប្រាក់រៀល របស់ប្រជាជនកម្ពុជាមានភាពទន់ខ្សោយ ។ ទោះបីយ៉ាងណា នៅក្នុងរយៈពេល ២ ទសវត្សរ៍ ចុងក្រោយនេះ ប្រាក់រៀលរក្សាស្ថិរភាព ចន្លោះប្រមាណ ៤ ០៥០ រៀល ក្នុងមួយដុល្លារ ដោយបានត្រឹមតែទប់ស្កាត់ដុល្លារូបនីយកម្ម មិនឱ្យកើនឡើងតទៅទៀត ប៉ុន្តែមិនទាន់អាចបន្ថយកម្រិត ដុល្លារូបនីយកម្មនៅឡើយទេ។

ឯកឧត្តម យឹម លាភ លើកឡើងបន្ថែមថា ជុំវិញបញ្ហាខាងលើនេះ វាគឺជាមេរៀនប្រវត្តិសាស្រ្ត ដែលបានបង្ហាញថា ការបាត់បង់ ទំនុកចិត្តលើប្រាក់រៀល កើតឡើងក្នុងរយៈពេលដ៏ខ្លី តែការស្តារទំនុកចិត្តឡើងវិញគឺជាការលំបាក ដែលទាមទារនូវពេលវេលា និងការ ចូលរួមយ៉ាងសកម្មរបស់ក្រសួង-ស្ថាប័ន ឯកជន និងជាពិសេសប្រជាពលរដ្ឋយើងទាំងអស់គ្នា។ ជាក់ស្តែងជុំវិញការងារលើកកម្ពស់ ប្រាក់រៀលវិញ, ដើម្បីសេដ្ឋកិច្ចកម្ពុជារឹងមាំ រាជរដ្ឋាភិបាលកម្ពុជាបានដាក់ចេញនូវគោលនយោបាយជាច្រើន ជាពិសេសចាប់តាំងពីដើម ទសវត្សរ៍ឆ្នាំ ២០០០ មក ការលើកកម្ពស់ការប្រើប្រាស់ប្រាក់រៀល ស្របពេលដែលស្ថានភាពម៉ាក្រូសេដ្ឋកិច្ចមានលំនឹងល្អប្រសើរ ក្រោយកម្ពុជាទទួលបានសុខសន្តិភាពពេញលេញនៅចុងឆ្នាំ ១៩៩៨ ក្រោមនយោបាយឈ្នះ-ឈ្នះ របស់សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា មកដល់បច្ចុប្បន្នឃើញថា ប្រាក់រៀលបានកំពុងរក្សាស្ថិរភាពល្អប្រសើរ៕

អត្ថបទ៖ សុន រ៉ាឌី