គម្រោងរេដបូកកែវសីមា បានរួមចំណែកលើកកម្ពស់ជីវភាពពលរដ្ឋរស់នៅសហគមន៍ទេសចរណ៍ធម្មជាតិទឹកធ្លាក់ឡែងកៅ

គម្រោងរេដបូកកែវសីមា បានរួមចំណែកលើកកម្ពស់ជីវភាពពលរដ្ឋរស់នៅសហគមន៍ទេសចរណ៍ធម្មជាតិទឹកធ្លាក់ឡែងកៅ តាមរយៈការបណ្តុះបណ្ដាលជំនាញចម្អិនអាហារ ការគ្រប់គ្រងភ្ញៀវ និងកសាងហេដ្ឋានរចនាសម្ព័ន្ធជាដើម។

លោក ខៀវ សំណាង តំណាងអង្គការWCS នៅរសៀលថ្ងៃទី៥ខែវិច្ឆិកា ឆ្នាំ២០២៦ បានលើកឡើងថា ការបង្កើតសហគមន៍ទេសចរណ៍ធម្មជាតិទឹកធ្លាក់ឡែងកៅ ស្ថិតនៅស្រុកកែវសីមា ខេត្តមណ្ឌលគិរី គម្រោងរេដបូកកែវសីមា បានគាំទ្រការដោះស្រាយវិវាទ និងការកំណត់ព្រំប្រទល់ បោះបង្គោលព្រំ ការកែលម្អផ្លូវទស្សនាចូលទៅកាន់ទឹកជ្រោះ ធ្វើស្ពានឈើ បន្ទប់ទឹក ជណ្តើរ និងកន្លែងអង្គុយលេងជាដើម។លោកបន្តថា បច្ចុប្បន្នប្រជាពលរដ្ឋរស់នៅក្នុងសហគមន៍នេះ មានជីវភាពសមរម្យជាងមុន តាមរយៈការផ្ដល់សេវាទេសចរ និងលក់ផលិតផលនៅក្នុងសហគមន៍។

ពលរដ្ឋរស់នៅសហគមន៍ទេសចរណ៍ធម្មជាតិទឹកធ្លាក់ឡែងកៅ បានលើកឡើងដែរ តាមការសង្កេតបច្ចុ​​ប្បន្ន​មានភ្ញៀវទេសចរមកលេងកម្សាន្តនៅទឹកធ្លាក់ឡែងកៅជាបន្តបន្ទាប់ ដែលធ្វើឲ្យការលក់វត្ថុអនុស្សា​​វរីយ៍​ និងផលិតផលចំណីអាហារមួយចំនួនទៀត ទទួលបានចំណូលសមរម្យ សម្រាប់ផ្គត់ផ្គង់ជីវភាពរស់នៅ​ប្រ​ចាំថ្ងៃ។

បើតាមរបាយការណ៍ពី សហគមន៍ទេសចរណ៍ធម្មជាតិទឹកធ្លាក់ឡែងកៅ បានឱ្យដឹងថា ចាប់ពីខែកក្កដាឆ្នាំ២០២៤ រហូតដល់ខែកញ្ញា ឆ្នាំ២០២៦ សហគមន៍ទេសចរណ៍ ធម្មជាតិទឹកធ្លាក់ឡែងកៅ បានស្វាគមន៍ភ្ញៀវទេសចរចំនួនជាង១ពាន់៥រយនាក់ និងភ្ញៀទេសចរណ៍អន្តរជាតិ ១០៥នាក់។អត្ថបទ៖ទូច សោភ័ណ