សាទី ជួយឱ្យភ្នំពេញក្រោនដណ្តើមបានជ័យជំនះនៅចុងម៉ោងលើក្រុមអាយអេសអាយ

ក្លឹបបាល់ទាត់ភ្នំពេញេក្រោនបានកែប្រែឱកាសទទួលបានមួយពិន្ទុ មកបីពិន្ទុវិញ ពេលដែលកីឡាករ សា ទី ទាត់បញ្ចូលទីគ្រាប់ជ័យជំនះ នៅវិនាទីចុងក្រោយនៃនាទីថែមបង្គ្រប់ នៅកីឡដ្ឋានភ្នំពេញក្រោន ថ្ងៃទី០១ ខែកុម្ភៈ ការប្រកួតបាល់ទាត់ជាតិកម្ពុជាសប្ដាហទី១៩។

តាមពិតទៅភ្នំពេញក្រោន ត្រូវនាំមុខតាំងតែពីវគ្គទី១ ប៉ុន្តែកីឡាករ Moses Dyer ទាត់បាល់ពិន័យ១១ម៉ែត្រ មិនបានសម្រេច។ ទោះបីភ្នំពេញក្រោនព្យាយាមដាក់សម្ពាធ និងគ្រប់គ្រងបាល់បានច្រើនយ៉ាងណាក៏ដោយ នៅតែមិនអាចរកគ្រាប់បាល់បានក្នុងម៉ោងធម្មតា៩០នាទី។ ទីបំផុត មុនអាជ្ញាកណ្ដាលផ្លុំកញ្ចែបញ្ចប់ការប្រកួត នៅនាទីទី៩០បូក៨ ខ្សែប្រយុទ្ធសា ទី ក៏ទាត់បញ្ចូលទីបានសម្រេច ពេលដែលកីឡាករ MAKERLO TELLEZ MELENDEZ លើកបាល់ទៅឱ្យ។

ពេលនេះ ភ្នំពេញក្រោនកំពុងដេញតាមព្រះខ័នរាជស្វាយរៀង ពីរពិន្ទុដដែល ក្រោយលេងបាន១៧ប្រកួតស្មើគ្នា។ សប្ដាហ៍ទី២០នៃលីគកំពូល ថ្ងៃទី៧ ខែកុម្ភៈ ភ្នំពេញក្រោន ត្រូវទទួលណាហ្កាវើលដ៍ ក្រោយពេលទទួលខេត្តត្បូងឃ្មុំ ថ្ងៃទី៤ ខែកុម្ភៈ វគ្គ១៦ក្រុមចុងក្រោយពានរង្វាន់សម្តេចអគ្គមហាសេនាបតីតេជោ ហ៊ុនសែន ជើងទី២៕