កីឡា

ព្រឹទ្ធាចារ្យវ័យ ៨៣ឆ្នាំ ២រូបភ្ញាក់ផ្អើលនឹងភាពអស្ចារ្យប្រាសាទភ្នំជីសូរ្យ តាមរយៈព្រឹត្តិការណ៍ជិះកង់ភ្នំពេញ-តាកែវ

កីឡាករ-កីឡាការិនីចាស់ក្មេងប្រមាណ ១ពាន់នាក់ សុទ្ធតែសប្បាយរីករាយ បន្ទាប់ពីបានចូលរួមព្រឹត្តិការណ៍ជិះកង់ភ្នំពេញ-តាកែវ ចម្ងាយ ៧៨គីឡូម៉ែត្រ កាលពីចុងសប្ដាហ៍កន្លង ។ ក្នុងនោះមានព្រឹទ្ធាចារ្យវ័យ ៨៣ឆ្នាំ ២រូប ក៏មានមោទនភាព ចំពោះការរៀបចំព្រឹត្តិការណ៍កីឡាទេសចរណ៍នេះផងដែរ ពិសេសការបង្ហាញនូវភាពអស្ចារ្យរបស់ប្រាសាទភ្នំជីសូរ្យដល់ប្រជាពលរដ្ឋទូទៅ រួមទាំងលោកតាផ្ទាល់ ដែលពុំធ្លាប់បានដឹងពីមុន។

ព្រឹទ្ធាចារ្យជិះកង់វ័យ ៨៣ឆ្នាំ អឹង សំរេច បានគាំទ្រការរៀបចំព្រឹត្តិការណ៍ជិះកង់ភ្នំពេញ-តាកែវ ដែលមិនត្រឹមលើកកម្ពស់សុខុមាលភាពប្រជាពលរដ្ឋ និងវិស័យកីឡា តែក៏បានរួមចំណែកផ្សព្វផ្សាយពីវិស័យទេសចរណ៍ក្នុងខេត្ត ក៏ដូចជានៅកម្ពុជា ជាក់ស្ដែងប្រាសាទភ្នំជីសូរ្យ ដ្បិតលោកតាធ្លាប់រស់នៅខេត្តតាកែវ តែលោកតាមានការភ្ញាក់ផ្អើលជាខ្លាំង បន្ទាប់ពីធ្វើដំណើរដល់ទិសខាងកើត ដោយមិននឹកស្មានមានប្រាសាទបុរាណជាច្រើន និងជណ្ដើរបុរាណដ៏អស្ចារ្យថែមទៀត។

ជាមួយគ្នាព្រឹទ្ធារចារ្យ គ្រុយ ប៉េងឡាយ ដែលមានវ័យ ៨៣ឆ្នាំដូចគ្នា ក៏បានសម្ដែងសេចក្ដីរីករាយជាខ្លាំង ចំពោះការផ្ដួចផ្ដើមរៀបចំព្រឹត្តិការណ៍នេះរបស់ក្រសួងទេសចរណ៍ ហើយលោកតាបានសម្រេចចូលរួមជិះពាក់កណ្ដាលផ្លូវពីស្រុកបាទី ព្រោះចង់អបអរសាទរផង និងបង្ហាញភាពជាគំរូដល់យុវជនជំនាន់ក្រោយផង ក្នុងការយកពេលទំនេរមកលេងកីឡា ក៏ដូចជាដើម្បីរួមចំណែកផ្សព្វផ្សាយវិស័យទេសចរណ៍ ពិសេសតំបន់ប្រាសាទភ្នំជីសូរ្យតែម្ដង។

ទន្ទឹមជាមួយគ្នាដែរ លោក ថោង ថាំង ដែលធ្វើដំណើរពីរាជធានីភ្នំពេញ រហូតដល់ខេត្តតាកែវ បានបញ្ជាក់ថា លោកបានចូលរួមព្រឹត្តិការណ៍នេះ ២ដងមកហើយ ហើយពិតជាភ្ញាក់ផ្អើល ចំពោះសន្ទុះនៃការចូលរួមដ៏ច្រើនរបស់ប្រជាពលរដ្ឋ និងកីឡាករ-កីឡាការិនី ដែលនេះ គឺជាការរួបរួមមួយដ៏អស្ចារ្យ ក្រោមម្លប់សន្ដិភាព ផ្សារភ្ជាប់កីឡា ដើម្បីផ្សព្វផ្សាយពីវិស័យទេសចរណ៍នៅខេត្តតាកែវ ក៏ដូចជានៅកម្ពុជា។

គួរដឹងថា ព្រឹត្តិការណ៍ជិះកង់ភ្នំពេញ-តាកែវ លើកទី២ កាលពីថ្ងៃអាទិត្យកន្លងទៅ មានអ្នកចូលរួមលើសពីការរពឹងរហូតដល់ខ្ទង់ពាន់ ដោយធ្វើដំណើរពីភ្នំពេញ រហូតដល់ទីរួមខេត្តតាកែវ ផ្សារភ្ជាប់សកម្មភាពជាច្រើន ពិសេសការផ្សារភ្ជាប់ព្រឹត្តិការណ៍នឹងតំបន់វប្បធម៌ ប្រវត្តិសាស្ដ្រ នៃប្រាសាទភ្នំជីសូរ្យ ដោយមានការអញ្ជើញចូលរួមផ្ទាល់ពីឯកឧត្តម ហួត ហាក់ រដ្ឋមន្ដ្រីក្រសួងទេសចរណ៍ អមគណៈប្រតិភូថ្នាក់ដឹកនាំក្រសួង និងមានការរង់ចាំទទួលស្វាគមន៍យ៉ាងកក់ក្ដៅពីឯកឧត្តម វ៉ី សំណាង អភិបាលខេត្តតាកែវ រួមទាំងអាជ្ញាធរ និងប្រជាពលរដ្ឋជាច្រើនផងដែរ៕ អត្ថបទ លី ឈុនឡា