FFC នឹងជំរុញការងារចម្បង៣ ដើម្បីបង្កើនការអភិវឌ្ឍបាល់ទាត់ និងជម្រើស​ជាតិ​កម្ពុជា​ខ្លាំង​គ្រប់​កម្រិត

ឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា(FFC) បាន​បង្ហាញ​ផែន​ការយុទ្ធសាស្ដ្រសំខាន់ៗជាច្រើន ដែលគ្រប់ភាគីពាក់ព័ន្ធ ត្រូវរួមគ្នាលើកស្ទួយ និង​ជំរុញ​ការ​អភិវឌ្ឍ ពិសេសក្រុមជម្រើសជាតិកម្ពុជាឲ្យមានការប្រកួតប្រជែងខ្ពស់គ្រប់កម្រិត ក្នុ​ង​នោះ​កា​រងារចម្បង ៣ ដែលត្រូវពង្រឹង ដើម្បីឆ្ពោះទៅសម្រេចគោលដៅនេះ។

ការគូសបញ្ជាក់នេះ ធ្វើឡើង​ក្នុង​ពិធី​បើក​កម្ម​វិធី​ «ការ​ធ្វើប​ទ​បង្ហាញ​ស្តីពី​ការ​អភិវឌ្ឍ​បាល់​ទាត់​រយៈ​ពេល​វែង​ ចាប់ពីកម្រិតមត្តេយ្យរហូតដល់ក្រុមជម្រើសជាតិ» កាលពីថ្ងៃទី១ ខែមេសា ឆ្នាំ២០២៦ កន្លងទៅ នៅសណ្ឋាគារហ្គាឌិនស៊ីធី ដោយ​មាន​ការចូលរួ​មជា​វា​គ្មិន​ពី​អ្នក​ជំនាញ​អន្ដរជាតិ​លោក ​Byer​ Thomas Farncis ហើយក៏មានការចូលរួមពីតំណាងក្លិប ក៏ដូចជាគ្រូបង្វឹក តាមបណ្ដា​ក្លិប​ជា​ច្រើន​ផងដែរ។

ក្នុងនាមប្រធានសហព័ន្ធ ឯកឧត្តមបានបង្ហាញទស្សនវិស័យវែងឆ្ងាយ ក្នុងការជំរុញ​វិស័យ​បាល់​ទាត់​កម្ពុជា​ឱ្យ​រីកចម្រើនគ្រប់កម្រិត ទាំងផ្នែកបច្ចេកទេស និងគុណផល ដើម្បីអាច​ប្រកួត​ប្រជែង​យ៉ាង​មាន​ប្រសិទ្ធភាពលើឆាកអន្តរជាតិ។ ទោះបីជាកន្លងមកមហាគ្រួសារបាល់ទាត់កម្ពុជា សម្រេច​បាន​សមិទ្ធផលគួរឱ្យកត់សម្គាល់ជាច្រើនក៏ពិតមែន ប៉ុន្តែអ្វីដែល​ជា​លទ្ធផល​ពិសិដ្ឋ​ដែល​សហព័ន្ធ​ចង់បានបំផុត គឺជោគជ័យជាក់ស្តែងក្នុងការប្រកួតរបស់ក្រុមជម្រើសជាតិកម្ពុជា។

ក្នុង​ស្មារតីទទួលខុសត្រូវខ្ពស់សម្រាប់អាណត្តិថ្មី ឯកឧត្តមបានបញ្ជាក់ជំហរយ៉ាងម៉ឺងម៉ាត់ ក្នុង​ការ​ជំរុញ​ការងា​រច​ម្បងចំនួន៣ ដើម្បីឈានទៅពង្រឹងបាននូវធនធានកីឡាករប្រកបដោយសក្ដានុពល ក៏​ដូចជាពង្រឹងក្រុមជម្រើសជាតិកម្ពុជាឲ្យបានខ្លាំង ទី១-គឺការ​ពង្រឹង​ថ្នាល​បាល់​ទាត់​តាម​បណ្ដា​ខេត្ត​​​ឲ្យ​កាន់តែទូលំទូលាយ ទី២-បង្កើនប្រព័ន្ធប្រកួតឲ្យមានស្ថិរភាព និងទី៣-ការបញ្ជូន​មន្ដ្រី​បច្ចេក​ទេស​ចុះ​ពិនិត្យ វាយតម្លៃ និងយន្ដការជ្រើសរើស​កីឡាករ​ដោយ​ផ្ទាល់​ប្រកប​ដោយ​ប្រសិទ្ធភាព​។

ឆ្លៀតឱកាសនោះដែរ ដើម្បីពន្លឿនដំណើរការអភិវឌ្ឍវិស័យបាល់ទាត់ជាតិនេះដែរ ឯកឧត្តម សៅ សុខា ក៏បានជំរុញឲ្យអាណាព្យាបាលចូលរួមជំរុញ លើកទឹកចិត្ត និងបណ្ដុះ​ការ​ស្រលាញ់​បាល់​ទាត់ ​ដល់កុមារចាប់ពីអាយុ ៦ឆ្នាំឡើង ដែលស្របទៅ​នឹង​ផែន​ការ​បណ្ដុះ​កុមារ​លេង​បាល់​ទាត់​ពី​ថ្នាក់​មតេ្ដយ្យ។ នេះគឺជាផ្នែកមួយដ៏សំខាន់ ដែលប្រជាពលរដ្ឋទូទាំងប្រទេស ត្រូវរួមគ្នា ដើម្បី​លើក​ស្ទួយ​វិស័យ​កីឡាបាល់ទាត់ជាតិប្រកបដោយសុខដុមនីយកម្ម និងការអភិវឌ្ឍ តាមរយៈបាល់ទាត់ ដោយ​មិនរង់ចាំតែនណរម្នាក់ឡើយ៕ អត្ថបទ លី ឈុនឡា